LEVI DÂN 19 - Pathien Lekhabu Inthieng (BSI)

Inthiengna le indikna dânhai

¹ Lalpa chun Mosie a biek a,

² “Israel thla, mipuihai po po chu hril la, an kuomah, ‘In inthieng ding a nih, kei Lalpa in Pathien hi kân thieng si a.

³ Mi tinin in nu le pa in ṭi ding a na; chun, ka châwlnihai chu in inser ding a nih; Kei hi Lalpa in Pathien chu ka nih.

⁴ Milim tieng chun thle naw unla, milim sung fâwm pathienhai in ta dingin siem naw ro; Kei hi Lalpa in Pathien chu ka nih.

⁵ “Lalpa kuoma inremna thilinhlâna in inthâwi pha chun, pawm tlâk ni dingin in inhlân ding a nih.

⁶ In inhlân ni tak amanih, a zîng tûka mania fâk ding a na; ni thum chena um a la um chun râw ding a nih.

⁷ Ni thum nia fâk a ni chun thil tirdakum a na, pawm ni naw nih,

⁸ chun, a fatu taphawt chun Lalpa thil inthieng chu a sukpawrche leiin a rîtlona maw chu phur a ta, ama chu a chipuihai laia inthawkin tuithlârin um lem a tih.

⁹ “In loa bu dâm in sîk pha in lohnâwm kil rawt chenin in sîk ding a ni naw a, lâk ṭhelhai chu pâwltlâk hnungin in lâk khâwm ding a ni bawk nawh.

¹⁰ In grêp huona lo ṭhelhai in zawng nâwk ding a ni naw a, in grêp huona a ra ṭilhai in rût khâwm ding a ni bawk nawh; mi rimsihai le ram dang mihai in hlapêk ding a nih; Kei hi Lalpa in Pathien chu ka nih.

¹¹ “Inru naw unla, mî hlêm naw unla, khêl hril bawk naw ro.

¹² In Pathien hming hrilse dingin ka hming sâlin khêlin in inkhâm ding a ni nawh; Kei hi Lalpa in Pathien chu ka nih.

¹³ “I tuolbâwmhai i hnawchêp ding a ni naw a, în rûkpêk ding a ni bawk nawh. Inhlawfa hlaw chu zânkhuoin a zînga chen i hrênpêk ding a ni nawh.

¹⁴ Nasêt chu ṭawngsie în phur ding a ni naw a, mitdel hmaah inpal thlûkna i sie ding a ni bawk nawh; i Pathien chu i ṭi ding a ni lem; Kei hi Lalpa chu ka nih.

¹⁵ “Rorêlnaa chun fellotakin in rêl ding a ni nawh, mi rimsi chu i thlier ding a ni naw a, mi thilthawthei în za chuong ding a ni bawk nawh, feltakin i tuolbâwm ro chu i rêlpêk ding a nih.

¹⁶ I chipuihai lai mihai hêkin în vâk vêl ruoi ding a ni naw a, i tuolbâwm thisen thuah a ni naw zâwngin i ṭhang ding a ni bawk nawh; Kei hi Lalpa chu ka nih.

¹⁷ I lungrilin i unau i theida ding a ni nawh, i tuolbâwm chu i kâwk ngei ding a nih, a suolnaa în thiengna dingin.

¹⁸ Phuba i lâk ding a ni naw a, i chipuihai theidâna i pâi ding a ni bawk naw a, nang le nang în hmangai angin i tuolbâwm chu i hmangai ding a ni lem: Kei hi Lalpa chu ka nih.

¹⁹ “Ka thupêkhai in pawm ding a nih. I ran chu chi tum tum inthlatir naw rawh; i loah thlaichi chi hni chîng naw la, thil chi hni khâwng pawl puon i sil ding a ni bawk nawh.

²⁰ “Tukhawm suoknu, pasal huoltu nei, lân tlan lo, lân suoktir lo le zâl hmunkhat taphawt chu hrem nîng a ta, sukhlum chu ni êm naw ni a, ama chu insuo lo a la ni leiin.

²¹ Intuokna kawtkhâr bulah Lalpa kuoma a bawsiet inthâwina dingin, bawsiet thâwina berâmchal a hung kei ding a nih.

²² Chun, a thil suksuol taa bawsiet inthâwina dingin thiempu chun berâmchalin Lalpa hmaah intlanna siempêk a tih; chuongchun, a thil suksuolnaa chun ngaidam nîng a tih.

²³ “Ram chu in va hluo a, fâk dinga theikûng chi tinrêng in phun pha chun, a ra chu in ta dinga thiengnawah in ngai ding a nih; in ta dingin kum thum sûng chu inthieng nawa ngai ding a na, fâk dêr lo ding a nih.

²⁴ Amiruokchu, a kum li kum chun a ra po po chu suktum ding a ni a, Lalpa inpâkna thilinhlân ding a nih.

²⁵ A kum nga kum ruok chun, in ta dinga a pung pei theina dingin a ra chu in fâk ding a nih: Kei Lalpa in Pathien chu ka nih.

²⁶ “Ieng sa khawm a thisen pumin in fâk ding a ni nawh. Dawi dâm hmangin aisân dâm in chîng ding a ni nawh.

²⁷ I bekbawra inthawkin a vêlin i lu i vaw ding a ni naw a, i khâkhmul a sîrtuokin i tan ding a ni bawk nawh.

²⁸ Mithi leiin in taksa in ât ding a ni naw a, in inṭiel ding a ni bawk nawh; Kei hi Lalpa in Pathien chu ka nih.

²⁹ Nawchizawra siem dingin i naunu chu sukpawrche naw rawh; ram chu uiretna ramah hung inchang a ta, rîtlonain hung sip rawi a tih.

³⁰ Ka châwlnihai chu in inser ding a na, ka hmun inthieng chu in inza ding a nih: Kei hi Lalpa in Pathien chu ka nih.

³¹ “Khawhri aisânthiem zâwlhai chu pan naw unla, dâwithiemhai khawm in pawrche phâna dingin zawng suok naw ro: Kei hi Lalpa in Pathien chu ka nih.

³² “Lua kêlsam ṭohai hmaa chun i ngîr pei ding a na, tar hmêl chu în za ding a na, i Pathien chu i ṭi ding a nih; Kei hi Lalpa chu ka nih.

³³ “Ram dang mi in rama khawsa ve an um chun in sukse ding a ni nawh.

³⁴ Ram dang mi nangni laia khawsahai chu in ta dingin a ram mi ang hrim an ni ding a nih; nangma i înhmangai angin i hmangai ding a nih; nangni khawm Aigupta rama khan ram dang mi in ni kha: Kei hi Lalpa in Pathien chu ka nih.

³⁵ “Rorêl thua dâm, seizie inkhinaa dâm, bûknaa dâm, tamzie inkhinaa dâm indik nawtakin in thaw ding a ni nawh.

³⁶ Khâina indiktak, bûkna indiktak, epha indiktak, hin indiktak in nei ngei ding a nih: Kei hi Lalpa in Pathien, Aigupta rama inthawka ṭhuoi suoktu cheu ka nih.

³⁷ Chun, ka thupêkhai po po le ka rorêlhai po po chu zâwmin in thaw ding a nih: Kei hi Lalpa chu ka nih,’ ti rawh,” tiin.