LEVI DÂN 13 - Pathien Lekhabu Inthieng (BSI)

Phârhai chungthua dânhai

¹ Lalpa chun Mosie le Aron a biek a,

² “Mi a taksa vun ân vûng amanih, ân khir amanih, a puor amania, a vuna chun inphâr hri ni âwma ân lang chun thiempu Aron kuoma manih, a naupasal thiempuhai pakhat phawt phawt kuoma ṭhuoi ding a nih.

³ Thiempu chun taksa vuna hri chu lo en a ta; a hri umna lai hmul chu a hung vâr a, a hri chu taksa vun nêka inthûka ân lang chun inphârna hri a ni a; thiempu chun ama chu en a ta, mi inthiengnaw a ni chu a puong ding a nih.

⁴ A taksa vuna puorhai chu a hung vâr a, vun nêka inthûk lema ân lang naw a, a hmul chu a vâr naw chun, hri invawitu chu thiempu chun ni sari khum a tih;

⁵ thiempu chun ni sari ni chun ama chu en a ta, a hri chu a pângngai zinga a hmu a, a hri chu vuna chun a lo indar lien chuong naw chun, ni sari ma khum nâwk a tih.

⁶ Chun, thiempu chun ni sari ni chun en nâwk a ta; hri chu a lo duk a, vuna chun a lo indar lien naw chun, thiempu chun ân thieng a nih ti puong a tih; inkhir el a ni a, a puonhai sâwp a ta, inthieng hung ni tâng a tih.

⁷ Amiruokchu, a inthienna dinga thiempu ân entir hnunga a khir chu vuna chun a lo indar lien chun, thiempu chu ân entir nâwk ding a nih.

⁸ Chun, thiempu chun lo en a ta, a khir chu vuna chun a lo indar lien chun, thiempu chun inthieng naw a nih ti puong a tih; inphâr a nih.

⁹ “Inphârna hri mîn a kawl chun thiempu kuoma ṭhuoi ding a nih.

¹⁰ Thiempu chun lo en a ta, vuna chun a vâra a hung invûng suok a, a hmul chu a hung sukvâr a, ân vûngnaa chun taksa châr a hung inlang chun,

¹¹ a taksa vuna inphârna hri det lo um zing tah a nih; thiempu chun inthiengnaw a nih ti puong a ta, khum hran chuong naw nih, inthiengnaw a ni leiin.

¹² A phârna chu a vuna chun ân dar lien a, a hri invawitu chu a lua inthawka a ke chena thiempu hriet thei tâwka inphârnain a bâwm chun,

¹³ thiempu chun en a ta, inphârna chun a tisa po po chu a bâwm suok ta chun, hri invawitu chu ân thieng a nih ti a puong ding a nih; a vâr zo ta a, ân thieng tah a nih.

¹⁴ Amiruokchu, taksa châr a hung inlang chun ân thieng naw a nih.

¹⁵ Thiempu chun taksa châr chu en a ta, ân thieng nawh ti a puong ding a nih; taksa châr chu ân thieng naw a ni a, inphârna a nih.

¹⁶ Amiruokchu, taksa châr chu a hung danglam nâwk a, a hung vâr nâwk chun thiempu kuomah fêng a ta;

¹⁷ thiempu chun lo en a ta; a hri chu a hung vâr chun, thiempu chun hri invawitu chu ân thieng a nih ti a puong ding a nih, ân thieng tah a nih.

¹⁸ “Tisa vun chu a hung khuoihli a, a hung dam a,

¹⁹ khuoihli umna hmuna chun a hung vâr pâwng amanih, vâr sen deua a hung puor amani khawmin, thiempu inentir ding a nih.

²⁰ Thiempu chun lo en a ta, vun nêka inthûka ân lang a, a hmul chu a hung vâr chun, thiempu chun inthiengnaw a nih ti a puong ding a nih; inphârna hri a na, khuoihlia inthawk chun a hung inṭan a nih.

²¹ Amiruokchu, thiempu chun a lo en a, hmul vâr a um naw a, vun nêkin ân thûk naw a, a duk deu chau a ni chun, thiempu chun ni sari khum hran a ta;

²² vuna chun a hung indar lien chun, thiempu chun ân thieng nawh ti a puong ding a nih; hri a nih.

²³ Amiruokchu, a puor vâr chu a umna ngaiah a um a, a lo indar lien naw chun khuoihli pânser el a na; thiempu chun ân thieng a nih ti a puong ding a nih.

²⁴ “Chun, taksa vun chu a kâng a, a kâng inlâwngna lai chu a vâr sen deu amanih, a vâr amania a hung puor chun,

²⁵ thiempu chun lo en a ta; a puorna lai taka hmul chu a vâr a, vun nêka inthûka ân lang chun, inphârna a na, kângnaa chun a hung inṭan a nih; chuongchun, thiempu chun ân thieng nawh ti a puong ding a nih, inphâr hri a nih.

²⁶ Amiruokchu, thiempu chun a lo en a, a lo puor a, hmul vâr a um naw chun, vun nêka inthûk lova, a hmuk deu chau a ni chun, thiempu chun ni sari sûng khum hran a ta;

²⁷ chun, thiempu chun ni sari ni chun ama chu en a ta, vuna chun a lo indar lien chun, thiempu chun inthiengnaw a nih ti a puong ding a nih; inphâr hri a nih.

²⁸ A puor chu a umna pângngaia chun a um zing a, vuna chun a lo indar lien naw a, a hmuk deu chau a ni chun, mei kâng ser el a na, thiempu chun ân thieng ti a puong ding a nih, mei kâng ser el a nih.

²⁹ “Nuhmei khawm, pasal khawm, a lua manih, a khâkhmula manih hri a kai chun,

³⁰ thiempu chun hri chu lo en a ta; chun, vun nêka inthûk lema ân lang a, hmul eng zai inhmitak a um chun thiempu chun inthiengnaw a nih ti a puong ding a nih, inbuotna hri a na, lua manih, khâkhmula mania inphâr hri a nih.

³¹ Thiempu chun inbuotna hri chu a en a, vun nêka inthûk lema ân lang naw a, a hmuk dum a um naw chun, thiempu chun inbuotna hri invawitu chu ni sari khum hran a ta;

³² ni sari niin thiempu chun hri chu en a ta; inbuotna hri chu ân dar lien naw a, hmul eng khawm a um bawk naw a, inbuotna hri chu vun nêka inthûk nawa ân lang chun,

³³ vaw ding a na, ân buotna lai ruok chu a vaw ding a ni nawh; thiempu chun ama chu ni sari dang khum hran nâwk a tih;

³⁴ chun, thiempu chun ni sari ni chun inbuotna chu en nâwk a ta, inbuotna chu a lo indar lien naw a, vun nêka inthûka ân lang naw chun, thiempu chun ân thieng ti a puong ding a nih; chun, a puonhai sâwp a ta, hung inthieng tâng a tih.

³⁵ Amiruokchu, chu inbuotna chu an thien fai hnunga vuna chun a hung indar lien chun,

³⁶ thiempu chun ama chu lo en a ta; chun, inbuotna chu vuna chun a lo indar lien chun, thiempu ta ding chun hmul eng chu zawng kher ngai naw ni a, ân thieng naw a nih.

³⁷ Amiruokchu, inbuotna chu a ngai zingin a hmu a, hmul dum a mâwng chun, inbuotna chu a dam a na, ân thieng a nih; thiempu chun ân thieng ti a puong ding a nih.

³⁸ “Nuhmei amanih, pasal amanih an taksa vuna chun a puor vârṭak a um chun,

³⁹ thiempu chun en a ta, an taksa vuna puor chu a vâr mâwk deu chau a ni chun, a puor mei mei a na, vuna hung inṭan a na, ân thieng a nih.

⁴⁰ “Mi a sam a tla kawl chun lukawl a na; nisienlakhawm, ân thieng a nih.

⁴¹ Chun, mi a bâwk le a barêp samhai a tla chun bâwk kawl a na; nisienlakhawm, ân thieng a nih.

⁴² Amiruokchu, chu lukawlnaa manih, bâwkkawlnaa manih chun hri sen dâng deu a um chun, a lukawlnaa manih, bâwkkawlnaa mania hung inṭan inphârna a nih.

⁴³ Chuongchun, thiempu chun lo en a ta, a lukawla manih, a bâwkkawla mani hri chu a sen dâng hlar a, taksa vuna inphârna anga ân lang chun,

⁴⁴ mi inphâr a na, ân thiengnaw a nih; thiempu chun ama chu inthiengnaw a nih ti a puong ngei ding a nih; ân phârna chu a luah a nih.

⁴⁵ “Inphâr hri invawi chu a puonhai keithlêr nîng a ta, a sam a tlâiin put a ta, a hmûr chungtieng tuom a ta, ‘Inthiengnaw, inthiengnaw,’ tiin a khêk ding a nih.

⁴⁶ Inphârnain a bâwm sûng po chu inthiengnaw nîng a ta, ân thiengnaw a na, a um hran ding a nih; a umna ding chu riebûk puotieng nîng a tih.

⁴⁷ “Silfên khawm, sahmul silfên amanih, puonzai inhmi silfên amani khawm;

⁴⁸ a phiera phier amanih, a khâwnga khâwng amani khawm; puonzai inhmi amanih, sahmul amani khawm, savun amanih, iengkhawm savuna siem amanih inphârna hri a um a,

⁴⁹ chu hri chu silfêna manih, savuna manih, a khâwnga khâwng amanih, a phiera phier amanih, iengkhawm savuna siem amania a hring deuin amanih, a sen deuin amani khawm a hung inlang suok chun, inphâr hri a na, thiempu inentir ding a nih.

⁵⁰ Chun, thiempu chun hri chu en a ta, hri kaina chu ni sari sie hran a ta;

⁵¹ ni sari ni chun hri chu en a ta, hri chu silfên a khâwnga khâwng amanih, a phiera phier amanih, ieng ding khawma an ihmang savuna manih ân dar lien chun, hri chu inphârna hri nghettak chi a ni a, ân thieng naw a nih.

⁵² Silfên chu a khâwnga khâwng amanih, a phiera phier amanih, sahmul amanih, patzai inhmi amanih, savuna siem chi tinrêng amanih, inphâr hri umna taphawt chu râw ding a na, inphâr dettak chi a ni si a, râw ngei ding a nih.

⁵³ “Chun, thiempu chun a lo en a, silfên khâwnga manih, phiera manih, savuna siem chi hrim hrima a lo indar lien naw chun,

⁵⁴ thiempu chun hri umna chu sâwp thu pêng a ta, ni sari dang sie hran nâwk a tih.

⁵⁵ Chun, hri umna sâwp hnung chun thiempu chun en nâwk a ta; hri umdân chu a danglam naw chun, hri lo indar lien naw sien khawm, ân thieng chuong naw a nih; inphârna umna chu a hnung khawm ni sien, a hma tieng khawm ni sien i râw ding a nih.

⁵⁶ “Chun, thiempuin a lo en a, sâwp hnunga hri kaina chu a lo da deu chun, chu hmun chu, silfêna mi khawm, savuna mi khawm, khâwnga mi khawm, phîera mi khawm chu kei thlâng a ta;

⁵⁷ chu, silfêna manih, khâwnga manih, phiera manih, savun thil ienga khawm ân langa an dar lien chun, hri umna chu i râw ding a nih.

⁵⁸ Silfên chu khâwng amanih, phier amanih, savun thil iengkhawm, i sâwp hnunga hri chun ân kiengsan chun, sâwp nâwk ding a na; chuongchun, inthieng hung nîng a tih.

⁵⁹ “Hi hi silfên, sahmul amanih, puonzai inhmi amanih, khâwng amanih, phier amanih, savuna siem thil hrim hrimhaia inphârna hri uma, ân thieng le ân thiengnaw puongna dân ding chu a nih,” tiin.