KOLOSSA 4 - Pathien Lekhabu Inthieng (BSI)1 Hotuhai, nangni khawm vânah hotu in nei ti hrein, in suokhai chungah a fel le a mâwitâwk chu thaw ro. Infuina 2 Ṭawngṭai fan fan unla, chutaka chun lâwmthu hril pumin ngaiven ro. 3 Khuopa ka umna san, Krista thurûk chu hril dinga Pathienin thu ta dinga kawt a mi hawngpêk theina dingin, kei ngei khawm mi ṭawngṭai pêk ro; 4 ka hril ding ang taka ka puong theina dingin. 5 Remchângna inchaw peiin puotienga mihai lai chun vartakin um ro. 6 Mi tin iengtina dawn seng ding am a na ti in hriet theina dingin in ṭawng bausuok chu chia saw, lunginsietna ṭhang ni rawp raw se. Mi mal chibai bûkna le thu namdetna 7 Lalpaa unau dittak, rawngbâwltu ringum, kan suok chanpui Tukik hin ka chanchin po po inhriettir a ti cheu. 8 Hi lei tak hin ama chu in kuomah ka hung tir a nih, kan chanchin in hriet theina ding le in lungril a sukthlamuong theina dingin; 9 Onisema, unau ringum le indiktak, nangni laia mi le hin. Anni chun hieng tienga thil umzie po po hi inhriettir an ti cheu. 10 Aristarka ka întângpuipa hin chibai a bûk cheu; Marka, Barnaba tupa khawm hin chibai a bûk cheu (ama chungchâng thua thupêkhai in hmu kha, in kuomah a hung chun lo lâwm ro). 11 Isu, Justa an ti hin chibai a bûk bawk cheu: chuonghai chu sertan mi an na, chuonghai chau chu Pathien ram thuah ka sinthawpui a mi thlamuontuhai an nih. 12 Epaphra, nangni laia mi, Krista Isu suokpa hin chibai a bûk cheu; ama chun Pathien dit zâwng taphawta puitling le ring tlatna neia in ngîr theina dingin a ṭawngṭainahaia chun in ta dingin a thaw rawp a nih. 13 Nangni ta ding dâmin, Laodikeia umhai ta ding dâmin, Hierapolia umhai ta ding dâmin ṭhahnem a ngai bêk bêk ti ka hrietpui a nih. 14 Dittak dâktawr Luka le Dema hin chibai an bûk cheu. 15 Laodikeia unau umhai kha chibai mi hung bûkpêk ro; Numpha le a ina kohran inkhâwmhai chu chibai mi hung bûkpêk bawk ro aw. 16 Chun, hi lekhathawn hi nangni laia in tiem zo hnungin Laodikei kohran khawm intiemtir ve ro; nangni khawmin Laodikeia inthawka lekhathawn kha lo tiem ve bawk ro aw. 17 Chun, Arkippa kuoma khan, “Rawngbâwlna Lalpaa i hmu kha hlen dingin fimkhur rawh,” ti ro aw. 18 Kei Paulain kut ngeia chibai ka bûkna cheu a ni hi, ka kawl bunhai hi hre zing ro. Lunginsietna in kuomah um raw se. |
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
Bible Society of India