JOSUA 5 - Pathien Lekhabu Inthieng (BSI)

Gilgala sertanna le Fekân Ruoi chu

¹ Chun, Jordan vadung thlang tienga um Amorhai lalhai po po le, Mediterranean tuipui panga um Kanaan ram lal po pohai chun, an kai hmakhat chun Lalpain Jordan tuihai chu Israelai hmaa chun a sukkangpêk ti an lo hriet a, Israel mihai lei chun an lungril chu ân tui zo ta a, annia chun lungril mumal hrim hrim a um ta naw a.

² Chuong lai chun, Lalpain Josua kuomah, “Meitâwklung chemte siem la, Israel thlahai hi sertanna neipui nâwk rawh,” a ta.

³ Chuongchun, Josua chun meitâwklung chemtehai a siem a, Israel mihai chu Gibeath-haaraloth a chun an ser a tanpêk a.

⁴ Josua chun an ser a tanna san chu hi hi a nih: Aiguptaa inthawka suokhai po po, pasal, râl kâp mi po pohai kha Aiguptaa inthawka an suok hnung khan lam kârlakah thlalêra khan an thi zo tah a nih.

⁵ A hung suokhai po po kha chu ser tan sa vawng an na, amiruokchu, Aiguptaa inthawka an suok a, thlalêra lam kârlaka pienghai po po kha chu ser tan an ni ve nawh.

⁶ Lalpa râwl an ngai nuom naw leiin mipui po po Aiguptaa inthawka hung suok, râl kap mihai chena, sukbohmanga an um vawng chenin Israelhai chu kum sâwmli zet thlalêra chun an invâk an invâk a, Lalpain an thlatuhai kuoma nênetui le khuoizua luong ram inkhâma eini mi pêk a lo tiem kha, chu ram chu hmu lo dingin Lalpain an kuomah ṭawng ân khâm hrim a nih.

⁷ Chuongchun, an nauhai anni aia a sukpuitlinghai chu Josua chun an ser a tanpêk a, lam kâra khan an ser tan a ni naw leiin, sertanlo an ni si a,

⁸ Chun, mipuihai po po ser an tan zo chun an dam hmakhat chu an riebûk mâni hmun sengah an um a.

⁹ Chun, Lalpain Josua kuomah, “Vawisûn hin Aigupta mihai hmusitna cheu hi kân hlum hmang tah,” a ta. Chuongchun, chu hmun chu tu chen hin Gilgal an lo ti a nih.

¹⁰ Israelhai chun Gilgala chun umhmun an khuor a; chun, Jeriko phaiahai chun chu thla ni sâwmpali ni, zântieng chun Fêkân Ruoiṭhe an hmang ta a.

¹¹ Fêkân Ruoiṭhe zo tûk ni ngei chun chu rama bu chawl ṭhanglo bei le bu zêupuok an fâk a.

¹² Chu rama bu an fâk zînga inthawk chun manna kha a tla ta naw a; Israelhai chun manna chu an dawng ta ngai naw a, chu kum chun Kanaan rama bu le bâl chu an fâk ta lem a nih.

Josua le Kâwlhnâm phawidawkpa chu

¹³ Chun, Josua chu Jeriko khaw bula a la um lai chun a dâk a, a hang en a; a hma zâwn ela chun mi pakhat a kâwlhnâm phawisa chawia lo ngîr zing hi a hmu a. Josua chun a hang pan a, a kuoma chun, “Keini tienga ṭhang am i ni, kan hmêlmahai tieng?” a ta.

¹⁴ Ama chun, “Ni lo e, Lalpa sipaihai hotu dinga hung ka ni lem,” a ti a. Chuongchun, Josua chu hnuoiah a bawkkhup a, chibai a bûk a, a kuomah, “Ka Lalpa chun a siehlaw kuoma hin ieng am hril ding a nei a?” a ta.

¹⁵ Chun Lalpa sipaihai hotu chun Josua kuomah, “I kephaa inthawkin i kekawk kha hlîp rawh, i ngîrna hmun kha ân thieng a nih,” a ta. Chuongchun, Josua chun chuong ang chun a thaw ta a.