JOSUA 20 - Pathien Lekhabu Inthieng (BSI)

Inhumhimna dinga khawpui ruothai chu

¹ Lalpa chun Josua chu a biek a,

² “Israel thlahai kuoma hin thu hril la, ‘Inhumhimna khuohai siem ro khai, Mosie hmanga in kuoma ka hril ta kha,

³ tukhawm inringlâwk lova mî lo that paltu chu chutaka chun a tlân lût theina dingin; chuongchun, thisen phuba latua inthawka in ta dinga inhumhimna a ni ding a nih.

⁴ Chuong khawpuihai laia a ienga mani chun tlân a ta, khawpui kul kawtkhâr lûtnaa chun va ngîr a ta, chu khaw upahai na hrietah a chanchin chu intlun a tih; anni chun khaw sûngah an kuomah ṭhuoi lût an ta, anni laia a chêng ve theina dingin umna ding ruotpêk an tih.

⁵ Chun, thisen phuba latu chun ama chu a hung hnawt chun a thattu chu a kutah an lo pêk ding a ni nawh, a tuolbâwm chu inringlâwk lova a that a na, a hmain theidana a nei si naw a.

⁶ Mipui hmaa rorêl pêka um dinga a ngîr hmakhat le chuong lai huna thiempu lala um chu a thi hmakhat chun chu khuoa chun a um zing ding a na, chu hnunga chun mi thattu chu ama khaw sûng ngei, a tlânsuokna khuo, ama insûnga ngei chun a lût nâwk ding a nih,’ tiin,” a ta.

⁷ Chuongchun, Naphtali tlâng rama Galilia Kades, Ephraim tlâng rama Sekem le Juda tlâng rama Kiriath-arba (chu chu Hebron a nih) chu an ruot ta a.

⁸ Saktienga Jordan vadung râla chun Jeriko saktieng Reuben hnam rama thlalêr phaizâwla Bezer, Gad hnam Gilead rama Ramoth le Manasse hnam rama Basan rama Golan chu an ruot ta a.

⁹ Chuong khuohai chu a nih Israel thlahai po po le anni laia hnam dang umhai ta dinga ruot chu; tukhawm mi that paltu chu chutaka chun a tlân lût a, mipuihai hmaa a ngîr zet hmakhat chun thisen phuba latu kuta a thi nawna dingin.