JOSUA 16 - Pathien Lekhabu Inthieng (BSI)

Ephraim le Manasse kuoma rambung pêka um chu

¹ Chun, Josef thlahai chanpuol chu, Jeriko zâwn, Jordana inthawkin thlalêr kâwl, saktieng panga Jeriko tuiahai chun a suok a; Jerikoa inthawk chun tlâng ramah Bethel chenin a hang fe pei a;

² chun, Bethela inthawk chun Luzah a suok a, Arka mihai ramriah Ataroth chenin a fe pei a,

³ chun, thlangtieng panga chun Japhleti mihai ramri Beth-horon thlanghnung lem ramri, Gezer chenin a fe thla a, chu chu tuisuorietah a suok a.

⁴ Chuongchun, Josef nauhai Manasse le Ephraim chihai chun chanpuolah an nei a.

⁵ Chun, an sûngkuo izir ang peia Ephraim thlahai ramri chu hieng ang hi a nih: saktieng panga an chanpuol ramri chu Ataroth-adar a nih, Bethhoron sakhnung lem chenin,

⁶ chun, ramri chu Mikmethath hmârah thlangtieng pangah a suok a; chun, ramri chu saktieng pangah Taanath-silo chenin a kîr a, Janoa saktieng a fe pei a;

⁷ chun, Janoaa inthawk chun Atarotha dâm, Naara dâm, a fe thla pei a, Jeriko a tlung a, Jordanah a suok a,

⁸ Tappuaa inthawkin ramri chu thlangtieng pangah Kana vadungte chenin a fe a; chu chu Mediterranean Tuipuiah a suok a, chuong chu a nih, Ephraim thlahai hnam an sûngkuo izir ang peia an chanpuol chu,

⁹ Manasse thlahai chanpuol laia Ephraim thlahai ta dinga khawpui ruot hranpêkhai leh, a khawpuihai po po le a khuo chînhai le chun.

¹⁰ Chun, Gezera um Kanaan mihai chu an hnawt suok naw a, Kanaan mihai chu Ephraim mihai laia chun tu chen hin an la um a, sinthawa ruoi dingin, siehlawah an um ta lem a nih.