JOSUA 14 - Pathien Lekhabu Inthieng (BSI)

Ṭhumvâwrin Kanaan ram semdar a nih

¹ Hienghai hi a nih Israel nauhaiin Kanaan ram an lâk, thiempu Eleazar hai, Nun naupa Josua hai, Israel nauhai hnam sûngkaw puipahaiin an rochan dinga an lo semhai chu.

² An rochan chu, Lalpain Mosie thu a lo pêk ta angin, ṭhum vâwrin hnam kuo le hnam zâtve hai ta dinga sem a nih.

³ Mosie chun hnam hni le hnam zâtvehai kha Jordan râla khan an rochan ding a lo pêk ta si a; Levi chihai ruok chu anni lai an rochan ding a pêk ve nawh.

⁴ Josef thlahai chu hnam hni an na, Manasse le Ephraim chu; Levi chihai chu chu rama chun chanpuol an pêk ve nawh, an umna ding khawpuihai le a khawkâwl vêl ran ruol tlatna hmun ding ti chau naw chu.

⁵ Lalpain Mosie thu a lo pêk ta ang khan Israel mihai chun an thaw a, ram chu an sem a.

Kaleb kuomah Hebron pêk a nih

⁶ Chuongchun, Juda thlahai chu Gilgalah Josua kuomah an va fe a, Keniz mi Jephunne naupa Kaleb chun a kuomah, “Kades-barneaa Pathien mi Mosie kuoma Lalpain ka chungchâng le nanga chungchâng thu a hril kha i hriet a.

⁷ Lalpa siehlaw Mosiein Kadesbarnea-a inthawka ram va enthla dinga a mi tir lai khan kum sâwmli mi ka ni ta a; chun, ka lungrila um ang chie chu a kuoma khan kân tlun nâwk a.

⁸ Amiruokchu, ka unau kei le fe vehai khan mipuihai lungril an suktuipêk a, kei ruok chun chu Lalpa ka Pathien chu titakzetin ka zui tlat a.

⁹ Chuongchun, chu ni chun Mosiein, ‘Lalpa ka Pathien hi titakzeta i zui tlat leiin i kein a lo sir ta ram chu kumkhuoin nangma le i thlahai rochan ding ni ngei ngei a tih,’ tiin ṭawng ân khâm a.

¹⁰ Ngai ta, Lalpain Mosie kuoma chuong thuhai chu a hrila inthawk Israelhai thlalêra an invâk an invâk sûng po po, kum sâwmli panga zet chu a lo hril ta angin Lalpa chun a mîn damtir ta a; chuongchun, ngai ta, tuhin kum sâwmriet panga ka lo ni ta a.

¹¹ Chuong sa khawm chun tu chen hin Mosiein a mi tir lai ang el khan ka la hrât zing a, inhmaa indona ding le suok invâkna dinga thahrui ka nei ang khan tu khawm hin ka la nei zing i sawnnaw.

¹² Chuongchun, hi tlâng Lalpain kha nia a lo hril ta kha mi pe el ta la, khânga Anakim mihai an um a, an khawpuihai khawm a ropuiin kula inhuon khup a nih ti kha nia khan i hriet kha, Lalpa chun mi umpuiin, anni chu ka hnawt suok thei rawi mawh, Lalpain a lo hril ta ang khan,” a ta.

¹³ Chuongchun, Josua chun ama chu mal a sâwm a; Jephunne naupa Kaleb chu a rochan dingin Hebron chu a pêk ta a.

¹⁴ Chuleiin, Hebron chu tu chen hin Keniz mi, Jephunne naupa Kaleb rochan a hung ni tah a nih, Lalpa Israelhai Pathien chu titakzeta a zui tlat leiin.

¹⁵ Hebron khuo hming chu a hma chun Kiriath-arba a na, Arba chu Anakim mihai laia mi lientak a nih. Chuongchun, ram chu râlmuongin a um hri taphawt a.