JOSUA 10 - Pathien Lekhabu Inthieng (BSI)

Amor mihai hnena chu

¹ Chun, Jerusalem lal, Adonizedek chun Josuain Ai khuo a lâk a, a suksiet dêr a, Jeriko le an lal a suksiet angin, Ai khuo le an lal khawm a suksiet dêr a, Gibeona mihai chun Israelhai le chun inremna an siem a, anni lai an chêng ve tah ti a lo hriet chun, a ṭi ta hle el a.

² Gibeon chu khaw lientak, lal khawpui ang a ni si a, Ai khuo nêk chun a ropui lem a, mihriem po pohai khawm chu mi hrâttak an ni si a.

³ Chuongchun, Jerusalem khaw lal Adoni-zedek chun Hebron lal Hosham, Jarmuth lal Piram, Lakis lal Japhia le Eglon lal Debir hai chu,

⁴ “Hung unla, mi hung ṭhangpui ro khai, Gibeon hi va thawng ei tiu, Josua le Israel mihai leh inremna an siem ta si a,” tiin ân cha khâwm a.

⁵ Chuongchun, Amor mihai lalhai panga, Jerusalem lal, Hebron lal, Jarmuth lal, Lakis lal, le Eglon lal chu an pung khâwm a, an sipaihai po po leh an hang fe a, Gibeon epa chun an um a, an indopui ta a.

⁶ Chun, Gibeon mihai chun an riebûk Gilgalah, Josua kuomah mi an tir a, “I siehlawhai hi ngaitha naw raw khai; inhmawtakin kan kuomah hung vat la, mi hung sandam la, mi hung ṭhangpui rawh: tlâng rama chênghai Amor lalhai keini mi thaw dingin an inhâwrkhâwm a nih,” tiin.

⁷ Chuongchun, Josua le a kuoma râl kâp mi po po le, mi hrât huoisenhai po po chu, Gilgala inthawk chun an hang fe a.

⁸ Chun, Lalpain Josua kuomah, “Anni chu ṭi dêr naw rawh, i kutah ka pêk vawng tah a nih; anni laia mi tukhawm i hmaah ngîr thei ding hrim hrim an um nawh,” a ti a.

⁹ Chuongchun, zânkhuoa Gilgala inthawka hang fein Josua chun thâwk lekhatin anni chu a thaw ta thut a.

¹⁰ Lalpain anni chu Israelhai hmaa chun a sukbuoi ta a, Gibeona chun tamtak a that a, Beth-horon hang fena lampuiah a hnawt a, Azeka le Makeda chenin a that pei a.

¹¹ Chun, Israel mihai hmaa an tlânsie a, Beth-horona inthawka liem thlâkna hmuna an um lai chun Lalpain vâna inthawkin riel lientak takin Azeka chenin a zuk indêngtir pei a, an thi a, Israelhaiin kâwlhnâma an sât hlum nêk hmanin riel dêng hlum chu an tam lem a nih.

¹² Chuongchun, Lalpain Amor mihai chu Israelhai kuta a pêk ni chun Josua chun Lalpa kuomah thu a hril a, Israel mihai mithmua chun, “Nisa, Gibeon chungah ngîr zing rawh. Nang khawm, thlapa, Aijalon ruoma hin um zing rawh”, a ta

¹³ Chuongchun, chu hnam chun an hmêlmahai chunga phuba an lâk hmakhat chun nisa chu a ngîr ta zing a, thla khawm chu a um ta zing a. Hi thu hi Jaser buah ziek a ni naw am a nih? Chuongchun, nisa chu vân laizâwlah a um ta zing a, ni khat pumhlûm lai tlâk zai hrim hrim a rêl nawh.

¹⁴ Lalpain chuong anga mihriem râwl a ngai ni ang chu a hmain ni hrim hrim a um ngai naw a, a hnunga khawm a um ngai bawk nawh; Lalpain Israelhai chu a dopui a ni si a.

¹⁵ Chun, Josua le Israel mihai po po chu Gilgala an riebûka chun an kîr nâwk vawng ta a.

¹⁶ Chuong lal pangahai chu an tlân hmang a, Makeda pûkah an inbi a.

¹⁷ Chun, “Lal pangahai chu hmu an ni tah, Makeda pûka inbi an nih,” ti Josua chu an hril a.

¹⁸ Chuongchun, Josua chun, “Pûk kawtkhâra chun lung lientak tak inhlum unla, a vêngtuhai khawm inumtir ro.

¹⁹ Nangni ruok chu um naw unla, in hmêlmahai chu hnawt pei unla, a hnung dâlhai kha that unla, an khuoa hrim hrim inlûttir naw ro, Lalpa in Pathien chun anni chu in kutah a pêk ta si a,” a ta.

²⁰ Chun, Josua le Israel mihaiin anni chu nasataka beiin an that a, an that zo deuthaw a, an that mahla tlâwmte chu an khaw kulhaiah an tlânlût hman a.

²¹ Israel mi po po chu Josua kuom tieng Makedaa chun râl muongtakin an hung nâwk ta a, tukhawma Israelhai kal zâwnga ṭawng ngam an um der nawh.

²² Chuongchun, Josua chun, “Pûk kawtkhâr kha hang hawng unla, lal pangahai kha pûka inthawkin ka kuomah hung ṭhuoi ro,” a ti a.

²³ Chuong ang chun an thaw a, chu lal panga Jerusalem lal, Hebron lal, Jarmuth lal, Lakis lal le Eglon lal hai chu pûka inthawk chun a kuomah an hung ṭhuoi a.

²⁴ Chuong lalhai chu Josua kuoma an hung ṭhuoi chun, Josua chun Israel mihai po po chu a ko khâwm a, a kuoma fe ve râl kâp mihai laia lusa deu deuhai kuoma chun, “Hung hnai unla, hieng lalhai ringahai hin in kephahaiin sir ro,” a ta. Chun, an hung hnai a, an ringahai chun an kephahai chun an sir ta a.

²⁵ Josua chun an kuomah, “Ṭi naw unla, zâm bawk naw ro, hrâttak le huoitakin um lem ro; in hmêlmahai po po in dohai chungah Lalpa chun hieng ang hin a thaw pei ding a nih,” a ta.

²⁶ Chu zoa chun, Josua chun a thaw a, a sukhlum tâwl a, thing panga lêrah a khai a, chuongchun, zântieng chen chun thing lêra chun an inkhai a.

²⁷ Nisa tlâka chun Josua chun thu a pêk a, thing lêra inthawk chun an lâk thlâk a, an inbîkna pûka khan an peilût a, pûk kawtkhâr chu lung lientak takin an sîn a, tu chen khawm hin a la um zing.

²⁸ Josua chun chu ni chun Makeda chu a lâk a, a lal khawm kâwlhnâmin a thaw a, chu khuoa um po pohai le chun a sukhlum fai rêt a, pakhat khawm hla hrim hrim a nei nawh. Jeriko lal chunga a thaw ang bawk khan Makeda lal chunga khawm a thaw a.

²⁹ Chun, Josua chu Israelhai po po leh Makeda khuoa inthawk chun Libna tieng an fe a, Libna chu an do a,

³⁰ chuongchun, chu khuo chu an lal pumin Israelhai kutah a pêk nâwk bawk a; chun, chu khuo chu thawin a sûnga um po pohai chu kâwlhnâmin an sukhlum vawng a, a sûngah mi pakhat khawm hla hrim hrim an nei nawh; Jeriko khaw lal chunga an thaw ang bawk khan chu khaw lal chunga khawm chun an thaw a.

³¹ Chun, Josua chu Israelhai po po leh Libnaa inthawk chun Lakis tieng chun an fe a, ṭhanghmun an khuor a, an do ta a,

³² chuongchun, Lalpain Lakis chu Israelhai kutah a pêk a, a ni hni niin an lâk a, chu khuo chu thawin a sûnga umhai po po kâwlhnâmin an sukhlum vawng a, Libna chunga an thaw ang bawk khan.

³³ Chuongchun, Gezer lal Horam chu Lakis ṭhangpui dingin a hung a, chun, Josua chun ama le a rawihai leh pakhat khawm hlâ hlek lovin a lo that rip a.

³⁴ Chun, Josua chu Israelhai po po leh Lakis a inthawk chun Eglon tieng chun an fe a, ṭhanghmun an khuor a, an do ta a.

³⁵ Chu ni ma chun an lâk a, chu ni ma chun chu khuo chu thawin a sûnga um po pohai kâwlhnâmin an sukhlum fai rêt a, Lakis chunga an thaw ang bawk khan.

³⁶ Chun, Josua chu Israelhai po po leh Eglona inthawkin Hebron tieng an hang fe a, an do ta a,

³⁷ chuongchun, an lâk ta a; chu khuo le a lal le a khawpui po po leh, a sûnga um po pohai chu kâwlhnâmin an thaw a, an sukhlum vawng a, Eglon chunga an thaw ang bawk khan pakhat khawm hlâ hrim hrim an nei naw a; a suksiet letdêr a, a mi umhai po po an sukhlum fai rêt a.

³⁸ Chun, Josua le Israelhai po po chu Debir tieng chun an lêt nâwk a, an do a;

³⁹ chuongchun, chu khuo le a lal le a khawpuihai po po chu an lâk a, chun, kâwlhnâmin an thaw a, a sûnga mi um po pohai chu an sukhlum fai rêt a, pakhat khawm hlâ hrim hrim an nei nawh; Hebron chunga thaw ang khan Debir le a lal chunga khawm an thaw a, Libna khuo le a lal chunga an thaw ang bawk khan.

⁴⁰ Chuongchun, Josua chun a ram pumin, tlâng ram dâm, Sim ram dâm, phai ram dâm, ṭên pangpêr ram dâm chu sukse vawngin, an lal po pohai chu a sukhlum vawng a; pakhat bêk khawm hlâ hrim hrim a nei dêr nawh: Lalpa Israelhai Pathien thupêk angin, ân thuok thei taphawt chu a sukchimit vawng ta lem a.

⁴¹ Chun, Josua chun Kades-Barneaa inthawkin Gaza chenin, Gosen ram po po leh Gibeon chenin a lâkpêk vawng a,

⁴² chuong lalhai po po le an ramhai chu Lalpa Israelhai Pathien chun Israelhai chu a dopui leiin Josua chun ṭum khata a lâk vawng an nih.

⁴³ Chun, Josua le Israel mihai po po chu Gilgala an riebûkah an kir nâwk ta a.