JONA 4 - Pathien Lekhabu Inthieng (BSI)

Jona lungawi nawna le Pathien zângaina

¹ Amiruokchu, chu thil chun Jona chu a suklungni ta naw êm êm a, a lunginsen a,

² Lalpa kuoma chun a ṭawngṭai a, “Aw Lalpa⁠, ka ngên che, hi hi ni lo am a ni kan rama ka um laia ka hril kha? Hi lei hin Tarsis tieng khan ka tlân hmang a ni kha, nang chu lunginsietna hau, hremnaa inthawka inlêt nâwk hlak i ni ti ka hriet a.

³ Chuleichun, Aw Lalpa, tuhin ka hringna hi mi lâkpêk el dingin ka ngên che; keia ta ding chun dam nêkin thi a ṭha lem si a,” a ta.

⁴ Lalpa chun, “I lunginsen hi i thaw dik am a ni?” a ta.

⁵ Chuongchun, Jona chu khawpuia inthawk chun a fe suok a, khawpui saktieng panga chun a ṭhung a, chutaka chun sâwlbûk a bâwl a, khawpui chunga thil hung tlung ding chu hmu tumin a hnuoi inhlima chun a ṭhung ta zing a.

⁶ Chun, Lalpa Pathien chun ûm a lo ruot a, chu chu Jona chunga chun ân zâmtir a, a rinumnaa inthawka sansuok dinga a lu zâr hlietu dingin. Chuongchun, Jona chu ûm lei chun nasatakin a lâwm ta a.

⁷ Amiruokchu, Pathienin a zînga chun khawfingchat laiin, thilnge a ruot a, chu chun ûm chu a rêt a, a hung vuoi ta a.

⁸ Chun, nisa a hung suok chun Pathienin khawsak thli lum a ruot a; nisa chun Jona lu chu a em a, a thidang a, a ta ding chun thi a hni ta a; “Keia ta dingin dam nêkin thi a ṭha lem,” a ti ta a.

⁹ Pathien chun Jona kuomah, “Ûm chungchâng thua I lunginsen hi i thaw dik am a nih?” a ta. Ama chun, “Thi pha khawp hiela ka lunginsen hi ka thaw dik a nih,” a ta.

¹⁰ Lalpa chun, “I în rimpui lo, I în ṭhangtir khawm ni lo, zân khat thila hung uma, zân khat thila bohmang nâwk ûm hi i lainat a;

¹¹ Ninevi khuo, khaw ropuitak, a sûngah mi nuoi khat le sîng hni nêka tam, an changtieng le vawitieng khawm thlier thei lohai le ran ruol tamtak umna hi, ka lunginsiet naw ding am a nih?” a ta.