JOHAN 3 - Pathien Lekhabu Inthieng (BSI)

Isu le Nikodem

¹ Chun, Pharisaihai laia mi, a hming Nikodem, Judahai hotu pakhat a um a;

² ama chu zânah Isu kuomah a hung a, a kuomah, “Rabbi, Pathiena inthawka inchûktirtua hung i ni ti kan hriet; Pathien an chungah a um naw chun hieng thilmak i thawhai hi tukhawmin thaw thei naw ni hai,” a ta.

³ Isûn a dawn a, a kuomah, “Titakzetin, titakzetin ka hril che hi mi tûkhawm an pieng thar naw chun, Pathien ram hmu thei naw ni hai,” a ta.

⁴ Nikodemin a kuomah, “Mi a tar hnungin iengtin am pieng thei a ta? A nu sulah vawi hni lûtin a pieng ding am a nih?” a ta.

⁵ Isûn a dawn a, “Titakzetin, titakzetin ka hril che hi, mi tûkhawm tuia le Thlaraua an pieng naw chun Pathien ramah lût thei naw ni hai,

⁶ taksaa pieng taphawt taksa a nih, Thlaraua pieng taphawt chu thlarau a nih.

⁷ In pieng thar ding ka ti che hi mak ti naw rawh.

⁸ Thli khâwlai khawm a nuom nuomin a hrâng hlak, a ri i hriet deh, nisienlakhawm, khâwtaka inthawka hung am, khâwlai am a fe ding ti i hriet si nawh; tûkhawm Thlaraua pieng chu chuong ang chu an nih,” a ta.

⁹ Chun, Nikodemin a dawn a, a kuomah, “Chuong thil chu iengtin am um thei a ta?” a ta.

¹⁰ Isûn a dawn a, a kuomah, “Israelhai inchûktirtu i ni si a, chuong chu i hriet naw maw?

¹¹ Titakzetin, titakzetin ka hril che hi, keinîn kan hriet chu kan hril hlak, kan hmu chu kan inhriettir hlak; nisienlakhawm, kan thu inhriettir in awi ngai si nawh.

¹² Khawvêla thil ka hril hmana awi lo cheu a, vâna thil hril lang cheu iengtin am awi in ta?

¹³ Vânah tukhawm an lâwn ngai nawh, vâna inthawka hung ṭum Mihriem Naupa chau naw hi chu.

¹⁴ “Chun, Mosiein thlalêra rûl a khai kâng ang khan, Mihriem Naupa hi khai kângin a um bawk ding a nih;

¹⁵ tûkhawm a ring taphawt chun ama leia chatuona hringna an neina dingin.

¹⁶ Pathienin khawvêl a hmangai bêk bêk a, chuongchun, a Naupa khât nei sun chu a pêk a, ama chu tûkhawm a ring taphawt chu an bohmang naw a, chatuona hringna an nei lemna dingin.

¹⁷ Khawvêl thiemnaw inchangtir dingin Pathienin a Nau khawvêlah a tir nawh, khawvêl ama leia an dam theina dingin a tir a ni lem.

¹⁸ “Tûkhawm ama ring chu inthiemlovin um naw ni hai, tukhawm a ring naw chu tuta inthawkin inthiemlovin an um nghâl a nih, Pathien Naupa khât nei hming an ring naw leiin.

¹⁹ Hi hi thiemnawna a nih, var khawvêlah a hung a, nisienlakhawm, mihaiin var nêkin inthim an dit lem a, an thilthawhai a suol leiin.

²⁰ Tûkhawm thil suksuol taphawt chun var an theida hlak, vara khawm an hung nawh, chuong naw chun, an thilthawhai inlang a tih.

²¹ Amiruokchu tûkhawm a thaw dik phawt chu, an thilthawhai Pathien leia thaw an ni ti ân langna dingin, varah an hung hlak,” a ta.

Isu le Johan thu

²² Chuong hnunga chun Isu chu a inchûktirhai leh Judai ramah an fe a, chutaka chun Isu an kuomah a um zing a, a baptis hlak a.

²³ Johan khawmin Ainonah, Salim kâwlah, a baptis bawk a, chutaka chun tui a tam leiin, chun, mi an hung a, baptisma an chang tâwl a.

²⁴ Chuong lai chun Johan intângna inah an la khum si nawh.

²⁵ Chun, Johan inchûktirhai le Juda pakhat inthien dân thuah an lo insêl a.

²⁶ Johan kuomah an hung a, a kuomah, “Rabbi, Jordan râla i kuoma um, a thu mi în hriettir khan, ngai ta, kha pa khan mi a baptis a, mi po po a kuomah an hung a nih,” an ta.

²⁷ Johanin a dawn a, “Mihriemin iengkhawm an nei thei nawh, vâna mi pêk a ni naw chun,

²⁸ ‘Kei Krista ka ni nawh, a hmaa mi tir ka nih,’ ka ti kha nangni ngei a mi hrietpuitu in nih.

²⁹ Moneitu chu a pasal chu a nih; nisienlakhawm, pasal ṭhien ngîr puma a thu hretu chu, pasal râwl leiin a lâwm bêk bêk hlak; hi ka lâwmna a tlung tah a ni hi.

³⁰ Ama chu tlatlum ding a nih, kei ruok chu inlâng ding ka nih.

Vâna inthawka hung chu

³¹ “Chung tienga hung chu mi po po nêka chunghnungtak a nih; hnuoia pieng chu hnuoia mi a nih, hnuoi thu a hril hlak, vâna inthawka hung chu mi po po nêka chunghnungtak a nih.

³² A hmu le a hriet taphawt ân hriettir hlak a nih; tukhawmin a thu inhriettir an awi nawh.

³³ A thu inhriettir awi chun, ‘Pathien chu mi indiktak a nih,’ tiin a hming namin a ziek.

³⁴ Pathien itir chun Pathien thu a hril hlak; ama chu Pathienin inkhi kherin Thlarau a pêk si nawh.

³⁵ Pa chun Nau a hmangai a, a kutah iengkim a rêngin a pêk tah.

³⁶ Tûkhawm Nau ring taphawt chun chatuona hringna an nei tah, nisienlakhawm, tûkhawm Nau thu awi naw taphawt chun hringna nei naw hi hai, Pathien lunginsenna an chungah a um zing lem a nih,” a ta.