JOHAN 2 - Pathien Lekhabu Inthieng (BSI)

Kana khuoa inneina

¹ Chun, ni thum niah, Galili rama Kana khuoah inneina ruoiṭhe a um a, chutaka chun Isu nu a um a.

² Isu le a închûktirhai khawm inneinaa chun an fiel a.

³ Chun, uoinin a dai ta naw a, Isu nu chun a kuomah, “Uoin an tlasam ta ie,” a ta.

⁴ Isu chun a kuomah, “Nuhmei, nanga mi lo hrietpêk ding ieng am a um a? ka hun a la tlung nawh,” a ta.

⁵ Chun, a nu chun rawngbâwltuhai kuomah, “In kuoma a hril taphawt chu thaw pei ro,” a ta.

⁶ Chun, Judahai inthien dân angin lung tuibêl paruk, bûk sâwmli hmun hni amanih, hmun thum amanih keng seng chutaka chun an intung a.

⁷ Chun, Isûn an kuomah, “Tuibêlahai tui suksip ro,” a ta. A rei inruolin an suksip seng a.

⁸ Chun, an kuomah, “Tuhin thâl unla, ruoiṭhe hotu kuomah fepui ro,” a ta. Chun, an fepui ta a.

⁹ Chun, ruoiṭhe hotu chun tui uoina hung inchang chu ân tem a, a suokna chin a hriet naw a, (tui thâl rawngbâwltuhai ruok chun an hriet a), nuhmei nei tupa chu a ko ta a,

¹⁰ a kuomah, “Mi tinin a tirin uoin ṭha an sie suok hlak, chun, a tam deu an dâwn hnungin a ṭha naw deu chu an sie suok hlak, nang ruok chun tu chen hin uoin ṭha i la nei zing a,” a ta.

¹¹ Isûn hi a thilmak thaw phutna hi Galili ram Kana khuoa chun a thaw a nih, a ropuizie ân langtir a; chun, a inchûktirhai chun ama chu an ring ta a.

¹² Chun, chu hnunga chun, Kapernaumah a zu fe a, ama le a nu leh, a unauhai le, a închûktirhai leh; chutaka chun ni sâwt nawtê an um a.

Biekin sukthieng

¹³ Chun, Judahai Fekân Ruoiṭhe a hnai ta a, Isu Jerusalemah a hang fe a.

¹⁴ Chun, Pathien biekina sebâwnghai, berâmhai, vaṭhuhai zawrtuhai le tangka thlengtuhai ṭhung a hmu a.

¹⁵ Chun, hruihruol invuokna a siem a, sebâwng le berâm an rêngin Pathien biekina inthawk chun a hnawt dawk a, tangka thlengtuhai tangka chu a bunthlâk a, an dawkânhai a nam thlûkpêk bawk a;

¹⁶ chun, vaṭhu zawrtuhai kuoma chun, “Hieng thilhai hi hitaka inthawkin fepui ro, ka Pa in sumdâwngna inin siem naw ro,” a ta.

¹⁷ Chun, a inchûktirhai chun, “I ina ka ṭhahnemngainân mi fa zo a tih” ti ziek a nih ti an hriet nâwk ta a.

¹⁸ Chun, Judahaiin a kuomah, “Hieng thil i thaw hi inchikna ieng am i mîn hmutir thei a?” tiin ama an in dawn a.

¹⁹ Isûn an kuomah, “Hi in hi sukse unla, ni thum sûngin inngîr nâwk ka tih,” a ta, a dawn a.

²⁰ Chun, Judahai chun, “Hi in hi kum sâwmli paruk sûng bâwl a nih, nangin ni thum sûngin inngîr i ti maw?” an ta.

²¹ (Nisienlakhawm, a taksa in chu hril a lo ni lem si a.

²² Chuleiin, mithi laia inthawka a thonâwkin, chu thu chu a hril tah ti a închûktirhai chun an hriet nâwk ta a; chun, Pathien Lekha Thu le Isu thu hril chu an ring ta a).

Isûn mi po po a hriet

²³ Chun, Fekân Ruoiṭhea Jerusalema a um lai chun, a thilmak thawhai an hmu a, mi tamtakin a hming an ring ta a.

²⁴ Nisienlakhawm, Isu chu anni lai a ngam nawh, mi po po a hriet a.

²⁵ Mihriem thu tukhawm ihril a ngai nawh, ama chun mihriem sûnga um taphawt chu a hriet si a.