JOHAN 12 - Pathien Lekhabu Inthieng (BSI)

Bethania Mariin hriek a nâl

¹ Chun, Fekân Ruoiṭhena ding ni ruk a la umin, Isu mithi laia inthawka a keitho Lazar umna Bethani kha a hung tlung a.

² Chun, chutaka chun ama ta dingin zânah ruoi an ṭhe a; Martha chun rawng a bâwl a, Lazar chu a thlaithlêng awtpuitu pakhat a nih.

³ Chun, Mariin bûk zâtve Spiknard hriek rim inhnik totak a hung chawi a, Isu kehai a nâl a, a samin a kehai chu a hrûk a; chuongchun, chu hriek rim chun in chu a sip rum rum el a.

⁴ Nisienlakhawm, Iskariot Juda, a închûktir pakhat, ân mantirtu ding chun,

⁵ “Hi hriek rim inhnik hi iengdinga duli za thuma zawra pasiehai kuoma an pêk lem naw am a na?” a ta.

⁶ (Pasiehai a ngaisak leia chu thu chu hril a ni nawh; inru a na, tangka ip a kawl a, a sûnga um chu a lâk hlak lei a ni lem a).

⁷ Chun, Isûn, “Tosan rawh, an mi phûm nia dingin khêk raw se.

⁸ Pasiehai chu kumkhuoin in kuoma um an nih, kei ruok chu kumkhuoa in kuoma um ding ka ni nawh,” a ta.

Lazar khawm sukhlum an tum

⁹ Chun, Isu chutaka chun a um ti Juda mi narânhai chun an lo hriet ta a; chun, an hung a, Isu chau chu an hungna san a ni naw a, mithi laia inthawka a keitho Lazar khawm kha hmu dingin a ni bawk a.

¹⁰ Chun, thiempu lalhai chu Lazar khawm sukhlum dingin an inrâwn a;

¹¹ ama leia Juda tamtakin an pakai san a, Isu an ring hlak leiin.

Jerusalema Isu ropuitaka a lût thu

¹² A zînga chun, ruoiṭhenaa hung mipui tamtakin Isu Jerusalemah a hung ding a nih ti an hrietin,

¹³ tûm kauhai an chawi a, a tuok dingin an va suok a, “Hosanna, Lalpa hminga Israel Lal hung chu inpâkin um raw se,” tiin an khêk a.

¹⁴ Chun, Isûn sabengtungtê a hmu a, a chungah a chuong a,

¹⁵ “Ṭi naw, Zion naunu, En ta, i Lal chu, Sabengtungtê chunga chuongin, A hung ding a nih,” ti ziek ang khan.

¹⁶ Chuong thu chu a tîrin a închûktirhaiin an hriet nawh; nisienlakhawm, Isu chawimawia a um hnung chun, a chanchinah chuong thu chu ziek a nih ti le, a chungah chuong thil chu an lo thaw ngei ti an hriet ta a.

¹⁷ Chun, Lazar thlâna inthawka a ko suok a, mithi laia inthawka a keitho laia mipui umhai khan, a thu chu an inhriettir ta pei a.

¹⁸ Chu lei chun a nih mipuihai khawmin ama chu an tuok chu; chu thilmak chu a thaw ti an hriet si a.

¹⁹ Chuongchun, Pharisaihai chun, “Hre ro, iengkhawm in law thei naw hi; en ta u, khawvêlin ama an zui ta hi,” an ta.

Grik mi tuhaiin amanih Isu an zawng

²⁰ Chun, ruoiṭhenaa Pathien chibai bûk dinga hang fehai lai Grik tuhai amanih an um a.

²¹ Chuonghai chu Galili rama Bethsaida khuoa mi Philip kuoma chun an hung a, a kuomah, “Pu, Isu hmu kan nuom,” an ta, an ngên a.

²² Philip chun Andri a hung hril a; Andri le Philip chun Isu an hung hril a.

²³ Chun, Isûn a dawn a, an kuomah, “Mihriem Naupa chawimawia a um hun chu a tlung tah.

²⁴ Titakzetin, titakzetin ka hril cheu hi, bu mal hnuoiah a tla a, a thi naw chun, a mal chauin a um zing hlak; a thi ruok chun tamtakin a ra hlak.

²⁵ Tûkhawm a hringna thlâkhla chun ân hmang hlak, tûkhawm hi khawvêla hin a hringna ngainêp chun chatuona hringna vawng zing a tih.

²⁶ Tûkhawmin ka rawng a bâwl chun mi zui raw se; ka umnaah ka rawng bâwltu khawm um a tih. Tûkhawmin ka rawng a bâwl chun ama chu Pain chawimawi a tih.

Mihriem Naupa khaikânga a um ding

²⁷ “Tuhin ka lungril a lunginzîng, ieng am hril ka ta aw? ‘Pa, hi huna inthawk hin mi sanhim rawh,’ ka ti ding am a nih? Ti lo e, hi ding lei taka hi, hi huna hi hung ka nih,

²⁸ Pa, i hming inchawimawi rawh,” a ta. Chuongchun, vâna inthawkin râwl a hung suok a, “Ka chawimawi tah, chawimawi nâwk bawk ka tih,” a ta.

²⁹ Chun, mipui a kâwla ngîrhai chun chu chu an hriet a, “Vân ân rûm a nih,” an ta, mi danghaiin, “Vantirkoin ama a biek a nih,” an ta.

³⁰ Isûn a dawn a, “Chu râwl chu ka ta dinga hung suok a ni nawh, nangni ta dingin a ni lem.

³¹ Tuhin hi khawvêl hi ngaituo lai a nih; tuhin hi khawvêl lal hi pei suok nîng a tih.

³² Chun, kei hnuoia inthawka khaikânga ka um chun, mi po po keia tieng hîp ka tih,” a ta.

³³ Chu thu chu ieng angin am a thi ding ti inhriettirna dingin a hril a nih.

³⁴ Chun, mipui chun a kuomah, “Krista chu chatuonin a um zing ding a nih ti Dân Lekhabuah kan hriet ie, nangin, ‘Mihriem Naupa khaikângin a um ding a nih,’ ieng ti tia ti am i na? Chu Mihriem Naupa chu tu am a na?” an ta, an dawn a.

³⁵ Chun, Isûn an kuomah, “Var hi nangni lai sâwt nawte a la um hri hi, var in nei sûng hin lêng ro, inthimin a nang nawna ding cheuin; tûkhawm inthima lêng chun a fena chin a hriet ngai nawh.

³⁶ Var in nei sûng hin var hi ring ro, var nauhai in hung ni theina dingin,” a ta. Chuong thu chu Isûn a hril a, chun, a fe a, an hmu naw dingin ân bihmang a.

Judahai ring naw zie

³⁷ An hmaah chuong ang thilmak tamtak thaw sienla khawm ama an ring si nawh:

³⁸ “Lalpa, kan thu hril tuin am a ring a? Lalpa kut khawm tu kuom âm ân lang a?” ti, Zâwlnei Isaiin a hril kha a tlungna dingin.

³⁹ Hi lei hin a nih an ring thei naw, Isaiin,

⁴⁰ “Amain an mit a sukdel a, An lungril a sukngar a; Chuong naw chun, an mitin hmu rawi an ta, An lungrilin hrethiem rawi an ta, Ngha kîr nâwk rawi an ta; Keiin anni sukdam rawi ka tih,” ti a hril nâwk lei hin.

⁴¹ Isaiin a ropuizie a hmu le a chanchin a hril lei hin chuong thu chu a hril a nih.

⁴² Nisienlakhawm, thuneituhai ṭhangsin mi tamtakin Isu an ring ta a; amiruokchu, Pharisaihai leiin an inpuong nawh; chuong naw chun, inkhâwmna in a hnawngin um an tih.

⁴³ Pathien kuoma ropuina nêkin mihriem kuoma ropuina an dit lem si a.

Isu ṭawngbau rorêltu a nizie

⁴⁴ Chun, Isu a khêk a, “Tûkhawm keia mi ring chu keia mi ring a ni naw a, a mi tirtu ring a ni lem.

⁴⁵ Tûkhawm a mi hmu chu a mi tirtu hmu a nih.

⁴⁶ êntu dinga khawvêla hung ka nih, a mi ring taphawt chu inthima an um zing nawna dingin.

⁴⁷ Tûkhawm ka thu hril hrein awi naw sienla khawm, keiin thiemnaw kân chang tir nawh; khawvêl thiemnaw inchangtir dinga hung ka ni naw a; khawvêl sanhim dinga hung ka ni lem.

⁴⁸ Tûkhawm mi dit lova, ka thu hrilhai vawn lo chun, thiemnaw inchangtirtu pakhat a nei a nih; ka thu hril kha, kha thu ngei khan ni kin nia chun ama thiemnaw inchangtir a tih.

⁴⁹ Keia phuokfâwmin ka hril si nawh; Pa a mi tirtu chun, ka hril ding le ka ṭawngna ding chu thu a mi pêk a ni lem.

⁵⁰ Ama thupêk chu chatuona hringna a nih ti ka hriet, chuleichun, thu ka hrilhai hi Pa mi hril ang peiin ka hril a nih,” a ta.