JOHAN 10 - Pathien Lekhabu Inthieng (BSI)

Berâm ruol tekhithu

¹ “Titakzetin, titakzetin ka hril cheu hi, tûkhawm berâm huona kawtkhâra lût lova, a dang tienga lâwn lût chu ama chu iengkhat inruhmang le suomhmang a nih.

² Tûkhawm kawtkhâra lût ruok chu, berâm vêngtu a nih.

³ Kawtkhâr vêngtuin ama chu a lo hawng pêk hlak a; berâmhaiin a râwl an hriet hlak a; ama berâmhai chu an hmingin a ko seng a, a ṭhuoi suok hlak a.

⁴ A ta po po ân suoktir phingleh, an hma a ṭhuoi a, berâmhaiin ama an zu i hlak a, a râwl an hriet si a.

⁵ Mi dang chu zui naw ni hai a, tlân hmang san lem an tih; mi danghai râwl chu an hriet naw leiin,” a ta.

⁶ Chu tekhithu chu Isûn an kuomah a hril a; nisienlakhawm, ieng thu am a na an kuomah a hril an hriet si naw a.

Isu, Berâmpu ṭha chu

⁷ Chuongchun, Isûn an kuomah a hril nâwk a, “Titakzetin, titakzetin ka hril cheu hi, kei hi berâm kawtkhâr chu ka nih,

⁸ ka hmaa hunghai po po kha inruhmanghai, suomhmanghai an ni vawng a; nisienlakhawm, berâmhai chun an thu an awi nawh.

⁹ Kei kawtkhâr chu ka nih; tûkhawm keimaah a lût chun, humhimin um a ta, lûtin suok a ta, fâk ding hmu bawk a tih.

¹⁰ Inruhmang chu, inru ding le, sukhlum ding le sukse ding naw chun a hung nawh; kei chu hringna an neina dingin, tamtaka an neina dinga hung ka nih.

¹¹ Kei bêram vêngtu ṭha chu ka nih; berâm vêngtu ṭha chun berâmhai ta dingin a hringna a pêk hlak.

¹² Inhlawfa, berâm vêngtu tak ni lova, berâmhai a ta ni lo chun satene hung a hmu chun berâmhai a tlânsan hlak; chun, satene chun berâmhai a se a, a sukdar hlak;

¹³ inhlawfa a na, berâmhai a ngai- sak naw leiin a tlânsan hlak a nih.

¹⁴ Kei chu berâm vêngtu ṭha ka nih; ka ta chu ka hriet a, ka ta khawmin an mi hriet a nih,

¹⁵ Pain a mi hriet a, kei khawmin Pa ka hriet ang hin; chun, berâmhai ta ding chun ka hringna ka pêk.

¹⁶ Chun, hi berâm huona mi naw khawm hi, berâm dang ka nei; anni khawm ka la hung ṭhuoi ding a nih, ka râwl khawm hrieng an tih, chuongchun, pâwl khatin um an ta, a vêngtu pakhat leh.

¹⁷ “Hi lei hin Pain a mi hmangai a nih, lâk nâwk dinga ka hringna ka pêk ding leiin.

¹⁸ Tûkhawmin mi lâkpêk naw ni hai, keima thu thuin ka pêk lem ding a nih; pe thei ka nih, la nâwk thei khawm ka nih. Hi thupêk hi ka Pa kuoma inthawka ka hmu a nih,” a ta.

¹⁹ Chuong thu lei chun Judahai an inṭhe a, an inkhing nâwk a.

²⁰ Mi tamtakin, “Khawhri a zâwl a, ân vêt a ni hi; iengdinga a thu in ngai am a na?” an ta.

²¹ A ṭhenin, “Hieng thu hi khawhri zâwl thuhril a ni naw ie. Khawhri chun mitdel mit a sukvar thei am a nih?” an ta.

Judahaiin Isu an tai

²² Chun, Jerusalema Inpumpêk Ruoiṭhe lai a na; chu chu thlasik lai a nih.

²³ Chun, Isu Pathien biekinah, Solomon tuolpûka chun ân lawn ân lawn a.

²⁴ Chun, Judahai a kâwlah an hung a, a kuomah,“Ieng chen am lungâwpinkaiin i mi sie ding a na? Krista i ni chun feltakin mi hril rawh,” an ta.

²⁵ Isûn an kuomah, “Ka hril ta cheu kha in awi si nawh; ka Pa hminga thil ka thaw hi, hieng hin ka chanchin ân hriettir a ni hi.

²⁶ Nisienlakhawm, in awi si nawh, ka berâm laia mi in ni naw leiin.

²⁷ Ka berâmhaiin ka râwl an hriet hlak, kei khawmin anni chu ka hriet, anni chun an mi zui hlak.

²⁸ An kuomah chatuona hringna ka pêk hlak; kumkhuoin bohmang naw ni hai a, tukhawmin ka kuta inthawkin mi lâkpêk bawk naw ni hai.

²⁹ Anni mi petu ka Pa chu mi po po nêka ropui a nih, tukhawmin Pa kuta inthawk chu lâkpêk thei naw ni hai.

³⁰ Kei le Pa chu pumkhat kan nih,” tiin a dawn a.

³¹ Chun, Judahai chun a dêngna dingin lung an rût nâwk a.

³² Chun, Isûn anni chu a biek a, “Pa kuoma inthawka suok sinthaw ṭha tamtak kân entir cheu a, khâng sinthawhai laia ieng sinthaw lei khan am a ni lunga in mi dêng ding hi?” a ta.

³³ Judahai chun a kuomah, “Sin ṭha chunga lunga dêng ding che kan ni naw a; Pathien i hrilsietna chunga le, nang mihriem ni si a, Pathiena în siem lei hin a ni lem a nih,” tiin an dawn a.

³⁴ Isûn an kuomah, “In Dân lekhabuah, ‘Pathienhai in nih ka tih,’ ti ziek a ni naw am a nih?

³⁵ Pathien thu tlungnahai hman pathienhai an ti chun, (Pathien Lekha thu bân thei a ni si naw a)

³⁶ Pain a iruot, khawvêla a itir chunga hin, ‘Pathien Naupa ka nih,’ ka ti leiin, ‘Pathien i hrilsiet,’ in ti a ni maw?

³⁷ Ka pa sinthaw ka ni naw chun mi ring naw ro.

³⁸ Amiruokchu, thaw ka ni chun, kei mi ring naw unla khawm, sinthawhai bêk hi ring ro; Pa keimaah a um ti le, kei Paah ka um ti in hriet a, in ringna dingin,” a ta, a dawn a.

³⁹ Chuongchun, ama chu man an tum nâwk a, nisienlakhawm, an kuta inthawkin a suok a.

⁴⁰ Jordan vadung râlah, Johanin a tîra mi a baptisna hmun tieng khan a fe hmang nâwk ta a, chutaka chun a um ta zing a.

⁴¹ Chun, mi tamtak a kuomah an hung a, “Johanin thilmak iengkhawm chu a thaw naw a; nisienlakhawm, Johanin hi mipa chungchâng thu a hril taphawt kha chu ân dik hle hi,” an ta.

⁴² Chun, chutaka chun mi tamtak- in ama an ring ta a.