JOB LEKHABU (THE BOOK OF JOB) 8 - Pathien Lekhabu Inthieng (BSI)

Bildadin Pathien indikzie a hril

¹ Bildad Suhi mi chun a dawn a, a hril ta a:

² “Ieng chen am hieng thuhai hi i hril ding a na? Ieng chen am i baua thuhai chu thli hrâttak ang a ni ding a na?

³ Pathien chun a ngaidân chu a sukdanglam hlak am a nih? Annawleh, Iengkimthawthei chun indikna chu a sukdanglam hlak am a nih?

⁴ I nauhaiin a chungah thil an suksuol chun, An bawsietna kuta chun anni chu a pêk hlak a.

⁵ Pathien chu nguntaka i zawng suok a, Iengkimthawthei kuoma i hnina chu i siem a;

⁶ Inthieng le tluong taka i um chun, Matheilovin, i ta dingin tho a ta, I felna umnahai chu hlawtlingtakin siem ngei a tih.

⁷ I ṭanna chu chitê ni sienla khawm, A hnunga i tâwpna chu nasatakin hung pung a tih.

⁸ Kum hluihai chu ngaituo ta, ka ngên che hi; An thlatuhaiin an zawng suok anga chun nang khawm inbel ve rawh.

⁹ (Zânita mi el, iengkhawm hre lo ei ni si a, Hnuoi chunga hin ei nihai chu hlim ang el a ni leiin.)

¹⁰ Nang chu inchûktir chein, hril chein, An lungrila an hrietna ṭhahai chu hril suok lo ding am an nih?

¹¹ Dûm hnâwnga naw thielkuong a mâwng thei am a nih? Tui um lovin phaiphêng a mâwng thei am a ni?

¹² A la hring sûng le sât thlâk a ni naw khawmin, Hlohna dang hrim hrim hmain a vuoi hlak.

¹³ Pathien theinghiltu po pohai lampuihai chu chuong ang chu an na; Pathien ngaisak nawhai beiseina chu bohmang a tih.

¹⁴ Chuonghai ringsan tak chu kawidar vawng a ta, Chuonghai ringsan chu aiumrîl ang a nih.

¹⁵ A in chu innghai a ta, nisienlakhawm, ngîr si naw ni, Dettakin chel a ta, nisienlakhawm, um zing naw ni.

¹⁶ Nisa suok hma chun a hring dup a, A tuoihai chu a huon chunga chun ân dâwn suok a.

¹⁷ A zunghai chu hnuoi thuo kârahai chun an inrawl a, Lung hmunhai chu a hmu a.

¹⁸ A hmuna inthawka suksiet a ni chun, ‘Nang ka hmu naw che a,’ tiin ama chu inphat a tih.

¹⁹ Ngai ta, hi hi a lampui hlimna chu a nih; Chu pila inthawk chun mi danghai hung mâwng an tih.

²⁰ Ngai ta, Pathien chun mi fel chu pei thla naw ni a, Thil suol thawtu chu tungding bawk naw ni.

²¹ I bau chu innuinain la suksip a ta, I hmûrhai chu khêkriin suksip a tih.

²² Nangma theidatuhai chu inzaknain inkhum nîng an ta, Mi khawhlo puon in chu um ta dêr bawk naw nih,” tiin.