JOB LEKHABU (THE BOOK OF JOB) 6 - Pathien Lekhabu Inthieng (BSI)

Jobin a ruolhai a kal

¹ Chun, Job chun a dawn a, a hril ta a:

² “Aw ka lungzîngnahai hi bûk vawng thei ni sien, Ka vângduoinahai hi bûknahaia bûk vawng ni sien chu aw!

³ Tuisuoriet phâiphin nêkin a rik âwm si a; Chuleiin, ka thuhai hi a rawp ta a ni hi.

⁴ Iengkimthawthei thalhai chu keimaa hin a um a, Chutaka a tûr chu ka thlarau hin a dâwn si a; Pathien ṭiumnahai chu kei mi epin an intlar a.

⁵ Ram sabengtung chu hlobet a hmu sûng chun ân hrâm hlak am a nih? Annawleh, bâwngchal chu a hlo pet ding chungah ân bu hlak am a nih?

⁶ Thil alna nei lo chu chi bovin fâk thei a ni hlak am a nih? Annawleh, ârtui puovâra hin inhnikna hrim a um am a nih?

⁷ Ka lungrilin anni a tâwk nuom naw a, Ka ta dingin bu tirdakumtak ang an nih.

⁸ “Aw ka ihni hi nei thei lang, Pathienin ka thil châk hi mi phalpêk sien chu aw!

⁹ Kei mi nuoihâwp dingin Pathien suklungâwi ni sien chu; A kut hung inletin mi sât thla el sienla!

¹⁰ Chuongchun, lungmuongna la nei ka ta; Anih, natna a chuong a liem um ta lova khawm hin insukpasal ka tih; Mi inthieng thuhai chu kân phat ngai si naw a.

¹¹ Ka hrâtna chu ieng am a na, ka la nghâk phawt ding chu? Ka tâwpna khawm chu ieng am a na, ka tuor ṭâl ṭâlna ding chu?

¹² Ka hrâtna hi lunghai hrâtna am a nih? Annawleh, ka taksa hi dârsen am a nih?

¹³ Hrâtna ti ding êm ka nei naw a, Ṭhangpuina hmuna ding hrim khawm ka nei nawh,

¹⁴ “Châu dêra um ṭêp chunga chun a ruol chun lunginsietna a nei ding a nih; Iengkimthawthei ṭîna nghatsantu ngei kuoma chun.

¹⁵ Ka unauhai chun vadungtê angin khawhlotakin an thaw a, Vadung tui inrelhmang hlakhai ang el chun.

¹⁶ Chuong chu tuikhal leiin an dum a; Chutaka chun vûr chu ân thup a nih.

¹⁷ A hung lum pha chun an bohmang a; A lum pha chun, an hmuna inthawkin an bohmang hlak.

¹⁸ An fêna lampuiahai sanghâwngsei ruol inzinhai chu an fe pêt a; Iengkhawm ni loah an fe a, an bohmang a.

¹⁹ Tema sanghâwngsei pâwlruol chun an en a; Seba pâwlhai chun an lo nghâk zing a.

²⁰ Beiseina an nei leiin an inzak a; Chutaka chun an hung a, an beidawng ta a.

²¹ Ka chungah chuong ang chau chu in nih; Ka siet tuok in hmu a, in ṭi a.

²² ‘Ka kuomah mi pe unla,’ Annawleh, in thilneihaia hin thilpêk mi pe ro, ka ti cheu am a nih?

²³ Annawleh, ‘hmêlma kuta inthawkin mi sansuok unla,’ Annawleh, ‘nêksâwrtuhaia inthawkin mîn tlan ro,’ ka ti am a nih?

²⁴ Nangnîn mîn chûktir unla, chuongchun, to ṭawk el ka tih; Ka sukdik nawnahaia chun hre dingin mi siem bawk unla.

²⁵ Felna thuhai chu a va hrât ngei de! Amiruokchu, in sêlkalnahai chun ieng am a sukfie a?

²⁶ Thu ringawt chu zil thei in inring am a nih? Mi beidawng thuhrilhai chu thli ang chau ni si chu.

²⁷ Anih, fahra chunga chun ṭhumhai an vâwr a; In ruolhai chu sumhlâwknain in nei a.

²⁸ Tuhin mi en hman unla, In hmaisana hin inkhêl tawp si naw ning a.

²⁹ Hung ngha ta u, ka ngên cheu hi, indik nawna hrim um naw raw se; Anih, hung ngha kîr ro, ka chungthu hi ân dik si a.

³⁰ Ka leia hin indik nawna hrim a um am a nih? Ka bau intemna hin thil khawhlohai chu a thlier thei naw am a nih?”