JOB LEKHABU (THE BOOK OF JOB) 5 - Pathien Lekhabu Inthieng (BSI)

¹ “Tuhin ko ta; nanga hung dawn che an um hrim am? Mi inthieng a tu tieng am a na i nghakîr ding?

² Lunginsenna chun mi invêt chu a sukhlumin, Îtthîkna chun mi intlâw chu a that hlak si a.

³ Mi invêt zungkei chu ka hmu ta a; Nisienlakhawm, a umna chu ṭawngsie kân phur nghâl hlak.

⁴ A thlahai chu himnaa inthawka hlatakah an um a, Dâi kawtkhâr bula chun râwtdein an um a; Anni sansuok dingin ukhawm an um bawk nawh.

⁵ A lohmasuok chu phîngṭâm chun a fâk zo a, Hlinghai laia mi khawm chu a lâk suok hlak a; A thil neihai dingin châng chu ân kam zing hlak.

⁶ Tuorna hi pilvut laia inthawkin a hung suok ngai si naw a; Buoina khawm hi leihnuoia inthawkin a hung mâwng suok ngai bawk nawh;

⁷ Amiruokchu, mihriem chu buoinaa hung pieng a ni lem, Meisihai chungtienga a vuong ang elin.

⁸ “Ka chungthua chun Pathien tieng zawng ka ta, Pathien kuomah ka chungthu chu inkawltir ka tih.

⁹ Thil ropuitakhai le zawng suok ruol lohai chu thaw a; Thil maktakhai tiem sêng lo thawtu chu.

¹⁰ Ama chun hnuoi chungah ruo a hung pêk a; Loahai chun tuihai chu a hung tir bawk a:

¹¹ Mi inhnuoihai chu a dawm sâng a; Thlainvaihai chu himnaah a sie kai hlak.

¹² Themthiem remruotnahai chu a sukthlâwn a, Chuongchun, an kuthai chun an nuom zâwng chu a puitlin thei nawh.

¹³ Mi varhai chu an var vervêknain a âwk a; Mi vervêkhai inrâwnna chu a letlingin a siem hlak.

¹⁴ Sûn huna chun inthimna leh an intuok a, Sûnchang lai zân ang elin an inmai hlak.

¹⁵ An baua kâwlhnâma inthawk chu fahrahai a sanhim a, Mi tlasamhai chu mi hrât kuta inthawkin a sansuok hlak.

¹⁶ Chuongchun, mi rimsi chun beiseina a hung nei a, Rîtlona chun a bau ân chîp ta a.

¹⁷ “Ngai ta, mi Pathienin a sukdik chu a va hlim de! Chuleiin, Iengkimthawthei thununna chu hmusit naw rawh.

¹⁸ Pânna a siem a, a tuom a, A sukhliem a, a kuthai chun a sukdam si a.

¹⁹ Buoina paruka inthawkin sansuok a ti che a, Anih, pasaria thil ṭha naw hrimin nang nâwk ta naw ni che.

²⁰ Ṭâm lai chun thinaa inthawkin sansuok a ti che a; Indo lai chun kâwlhnâm thilthawtheinaa inthawkin sansuok a ti che.

²¹ Lei hrilsietnaa inthawk chun thuphmang nîng i ta; Sukbohmangna a hung tlung pha khawm ṭi bawk naw ti nih.

²² Sukbohmangnaa le ṭâmnaa chun innui i ta, Hnuoi chunga sahrânghai khawm ṭi bawk naw ti nih.

²³ Rama lunghai le chun inthuruol tâng in ta; Rama sahrânghai khawm chu nang le inremin um tâng an tih.

²⁴ Chun, i puon in chu a râlmuong ti hrieng i ta; I ran in chu va sir i ta, iengkhawm inhmang naw nih.

²⁵ I chithla chu a hung ropui ding a nih ti hre bawk i ta; I thlahai chu hnuoi chunga hlobet ang elin.

²⁶ Kum tling zetin thlâna chun fêng i ta; Buvûi kuong chu a hun taka hrizâwla a hung um angin.

²⁷ En ta hi, ei zawng suok ta hi, a lo ni ngei a nih; Ngai la, i ṭhatna dingin hung hre rawh,” tiin.