JOB LEKHABU (THE BOOK OF JOB) 41 - Pathien Lekhabu Inthieng (BSI)

¹ “Leviathan chu ngakuoiin i hnûk dawk thei ding am a nih? Annawleh, a lei chu hruiin i keihnuoi zo ding am a nih?

² A hnâr chu hruihruolin i khit thei ding am a nih? Annawleh, a khâk chu thalin i suntlang thei ding am a nih?

³ I kuoma chun hninahai tamtak siemin, I kuoma chun thu innêmhai chu a hril ding am a nih?

⁴ Ama chu siehlawa kumkhuoa i nei zingna dingin, I kuoma chun thutiem a siem ding am a nih?

⁵ Vate inhnelpui angin ama chu în hnelpui ding am a nih? Annawleh, i rawngbâwltunu ta dingin ama chu i khit ding am a nih?

⁶ Ngamantuhai chun innêpnain an hmang ding am a nih? Sumdâwng mihai lai chun ama chu an sem dar dîm a nih?

⁷ A vun chu thîr kibar neiin i suksip thei ding am a nih? Annawleh, a lu chu ngakhâwfeihaiin?

⁸ Ama chunga chun i kut hei inlet hrim la. In inthaw dân chu hre zing i ta, Thaw nâwk ta ngai naw ti nih.

⁹ Ngai ta, ama hne în zuomna chu a thlâwn el a na, Ama hei hmu ngawt khawmin mi chu a beidawng nghâl el a nih.

¹⁰ Ama suktho ding khawpa huoisen tukhawm an um naw a, Chuong a ni chun tu am keia hmaa ngir thei ding?

¹¹ Ama ka pêk kîr nâwk dingin tuin am ka kuomah an pêk hmasa hlak a? Iengkim vânkhuphnuoia thil taphawt chu ka ta a nih.

¹² A kehai hrâtzie chu hril thei bâk a nih, A tha hrâtzie a taksa muk ṭhat dân khawm chu.

¹³ A silfên chunghnung chu tuin am hâwk ngam a ta? Tuin am thîrse thuo hni hung insêdetir thei a ta?

¹⁴ Tu am a khâk chela a bau keika thei ding? A ha intlar kuol ṭhut chu ṭi a um si a.

¹⁵ A vun char inuoi chu a suong tak a na, Chârde ang ela khawng rût chu,

¹⁶ Pakhat chun a dang a hnai hle a, A kâra chun boruok hrim a lût dêr nawh.

¹⁷ An inṭingmat tuo tlat a, Kei ṭhe thei ruol a ni nawh.

¹⁸ Ân simhai chun var a suksuok a, A mithai chu vârṭien var ang el a nih.

¹⁹ A baua inthawk chun meiser chawklaihai a suok a, Meisihai chu a vuong suok bawk a.

²⁰ A hnârkuoa inthawkin meikhu a suok a, Thil suongna bêl le hlobuk kâng ang elin.

²¹ A thuok chun meilinghai chu a mûtchawk a, A baua inthawk chun meichawk a suok a.

²² A rînga chun hrâtna a um a, A hmaa chun ṭiumna chu a lâm a.

²³ A tisa hlawmhai chu ân zawm khâwm tlat a, A chunga chun ân nghat tlat a, sukchâng ruol an ni nawh.

²⁴ A lung chu lung anga ngar a na, Anih, bu râwtna lung hnuoihnung ang elin.

²⁵ Ama chu a hung tho pha chun, mi hrâthai chu an ṭi a: Ṭitna leiin anni chu an inhâwrkhâwm a.

²⁶ Miin kâwlhnâmin sât sien khawm sât pawp naw nih, Annawleh, fei khawmin, thal khawmin, hmawlzum khawmin sun pawp naw nih.

²⁷ Thîr chu bupâwl angin a ngai a, Dârsen chu thing hmawn angin.

²⁸ Thalhai chun ama chu a suktlân thei naw a, Saihlumhai khawm chu ama kuoma chun pâwlbul ang a nih.

²⁹ Hmawlzumhai khawm chu pâwlbul ang chaua ngai a na, Fei inlap zawk zawkhai khawm chu a nuisan a.

³⁰ A hnuoihrût tieng chu bekawihâr ngei ang an na, Dûm chirdiek chu buchilna hrizâwl angin a hrût cham duoi a;

³¹ Li inthûk chu bêl angin ân phultir a, Tuipui chu thilhnâk angin a siem hlak.

³² A hnunga chun a fêna lampui chu a sukhuom vâr a, Li inthûk chu mi chun hmul vâr amani a sâwn rau khawpin.

³³ Hnuoi chunga hin ama ang an um naw a, Ṭitna nei loa siem chu.

³⁴ Thil insâng tinrêng chu a hmu a, Chapona naupahai po po chunga lal a nih,” tiin.