JOB LEKHABU (THE BOOK OF JOB) 40 - Pathien Lekhabu Inthieng (BSI)

¹ Chu naw khawm chu Lalpa chun Job chu a dawn a, a hril ta a:

² “Iengkimthawthei kaltu chun ama ân chûktir ding am a nih? Pathien sêlkaltu chun dawn raw se,” tiin.

³ Chun, Job chun Lalpa chu a dawn a, a hril ta a,

⁴ “Ngai ta, kei iengkhawplo hin ieng tin am dawn ka ti che a? Ka kutin ka bau hup el ka tih.

⁵ Vawi khat thu ka hril ta a, dawn chu dawn naw ning; Anih, vawi hni, amiruokchu, hril pei naw ning,” tiin.

Pathien thilthawtheina suklangin a um

⁶ Chun, Lalpa chun Job chu thlivira chun a hung dawn a, a hril ta a,

⁷ “Pasal angin tuhin i dier kei la, Nang chu indawn ka ti che a, mi hril rawh;

⁸ Nang ngei khawma ka rorêl hi i ngaitha ding am a nih? Thiem i chang theina dingin, kei chu thiemnaw i mîn changtir ding maw?

⁹ Annawleh, Pathien angin bân i nei am a nih? Ama ang chun râwlriin i sukrûm thei am a nih?

¹⁰ Tuhin ṭha famkimna le insângnain inbel la, Ropuina le inzâumnain inthuom bawk rawh.

¹¹ I lunginsen sip liemhai chu bunthla la, Mi a chapo taphawt chu en la, ngaihnuoi la,

¹² Mi a chapo taphawt chu en la, siehnuoi rawh; Chun, mi rilo chu an ngîrnaa chun sir thlu rawh.

¹³ Pilvuta chun anni chu thup tâwl la, An hmaihai chu hmun inthupa chun inkhum rawh.

¹⁴ Chun, kei khawma i kut changtieng chun Nangma a sandam thei che a nih ti hrieng ka tih.

¹⁵ “Ngai ta, tuhin tuisamak nanga anga ka siem chun, Sebâwngchal angin hlobet a fâk a nih.

¹⁶ Ngai ta, tuhin a hrâtna chu a tâia chun a um a, A thilthawtheina chu a phing taihrawla chun a um a nih.

¹⁷ Sidar thing angin a mei chu a hêm a, A êlpui thahruihai chu ân têl khâwm a nih.

¹⁸ A ruhai chu dârsen theikhuonghai ang a na, A kut le kehai chu thîr tluonhai ang an nih.

¹⁹ Pathien siemhaia lal chu a na, Ama siemtu chau chun a thal chu ama kuomah a pêk thei a.

²⁰ Matheiloin, tlânghai chun bu an hung insuopêk a, Ramsahai po po inhnelna hmun ngeihai chun.

²¹ Tuihna buk hnuoiahai chun a zâl a, Phairuong buk hnuoi dûma chun.

²² Tuihna kûnghai chun an hlimin an inkhum a, Vadungte phahrâmhai chun ama a tuom bawk a.

²³ Ngai ta, vadung chu hung lien sien khawm, ân thin ngai naw a. Jordan chu a bau chenin hung lien sien khawm ân ringzo a nih.

²⁴ Ân vêng zing lai chun miin an lâk ding am a nih? Annawleh, a hnâr dâwn chu chângin an âwk ding am a nih?