JOB LEKHABU (THE BOOK OF JOB) 4 - Pathien Lekhabu Inthieng (BSI)

Eliphazin Job a zil

¹ Chun, Eliphaz Teman mi chun a dawn a, a hril ta a:

² “Miin inbiekpui tum ta sienla che, pawi tîng i ti? Amiruokchu, tu am thuhrilnaa inthawkin ama insûm thei a ta?

³ Ngai ta, mi tamtak chu i lo inchûktir a, Kut hrât nawhai chu i lo sukhrât hlak a.

⁴ I thuhai chun mi tlu ding khawm chu a lo chelngir a; Khûp zawihai khawm chu i lo sukdet hlak kha.

⁵ Amiruokchu, tuhin i chungah a hung tlung ve a, i châu ta a; Nang a hung tâwk che a, sukbuoiin i um ta a.

⁶ Pathien i ṭina chu i ringpui niin, I lampuia ringumna chu i beiseina ni lo am a nih?

⁷ Tuhin ngaituo la, pawi tâwk hlek lovin tu am an bohmang hlak a? Annawleh, mi tluonghai chu khâwlai am sât thlâk an ni hlak a?

⁸ Ka lo hmu ta hlak ang chun, rîtlona tûtuhai le, Buoina thêtuhai chun, chu ma chu an sîk hlak.

⁹ Pathien thuokin an bohmang a; A lunginsenna imûtin an kânghmang hlak.

¹⁰ Sakeibaknei inrûm ri le sakeibaknei hrâng râwl ri le, Sakeibaknei vânglai hahai chu sukthliekin a um a.

¹¹ Sakeibaknei puitling khawm chu fâkding tlasamin a bohmang a, Sakeibakneipui têhai khawm chu an invâk dar ta a.

¹² “Tuhin ka kuomah inrûktein thu a hung a; Ka na chun chutaka biekrûkna chu a hriet a nih.

¹³ Îmu inhniktaka mi in re ṭhiep lai, Zâna thilhmulâwkna ka ngai tuo laiin,

¹⁴ Ṭitna ka chungah a hung tlung a, inthinna leh; Chu chun ka ruhai po po chu a sukhnîng hlak.

¹⁵ Ka hmai zâwna hin thlâ a fe thleng a; Ka hmulthi chu ân ding hlak.

¹⁶ A ngîr zing a, nisienlakhawm, a hmêlput dân chu ka hrietthiem naw a; Chu thlâ chu ka mitthlahaia hin a um zing a: A hung rê ṭhiep a, chuongchun, râwl chu ka hriet ta a.

¹⁷ ‘Mihriem thithei hi Pathien hmaah mi indik a ni ding am a nih? Mihriem chu a Siemtu hmaa chun mi inthieng a ni ding am a nih?

¹⁸ Ngai ta, a siehlawhai khawm chu a ring zo naw a, A vântirkohai khawm chu invêt a ti a nih.

¹⁹ Pil inhaia umhai lem lem chu; a va ring naw zuol âwm ngei, A lungphûm chu pilvuta innghat a ni a, Hângthim hmaa suksiet ni el hlakhai chu.

²⁰ Zîngtieng le zântieng inkâra suksiet an ni hlak a; Hriet zingna hrim um lovin an bohmang hlak.

²¹ An puon in hrui an sûnga chu a ṭilthla chun, Varna hrim um lovin an thi el an naw am a nih?’