JOB LEKHABU (THE BOOK OF JOB) 38 - Pathien Lekhabu Inthieng (BSI)

Lalpain Job ân vêtzie ân hriettir

¹ Chun, thlivira inthawkin Lalpa chun Job chu a hung dawn a, a hril ta a:

² “Hrietna bo thuhaia, Thurâwn sukthimtu hi tu am a ni leh?

³ Pasal angin tuhin i dier kei la, Thu indawn ka ti che a, i mi hrilfie ding a nih.

⁴ Hnuoi lungphûmhai ka phûm laiin nang chu khaw lai am i um a? Hriethiemna i nei chun mi hril rawh.

⁵ Tuin am chu chu lienziehai chu a riruong a, I hriet ngei maw! Annawleh, a chunga chun tuin am a thlûr chu a siem a?

⁶ A lungphûmhai chu khâwlai am an innghat a na? Annawleh, a kia lung chu tuin am a phûm a?

⁷ Zîng arasihai chun hla an sak tâwlin, Pathien naupahai chu iengtik khan am hlimin an khêk a?

⁸ Annawleh, sula inthawka a hung ṭe thla laiin, Tuipui kawtkhârhai chu tuin am a khârpêk a;

⁹ Sûm chu a silfênah ka siem a, Inthim sâmupa ka tuom lai khan;

¹⁰ A ramrihai ka ruotpêk a, Kawtkhârhai le palhai ka sie a;

¹¹ ‘Hi chen hi nang hung la, khêl naw la, I tuifâwn chapotakhai chu hi chen hin châwl an tih’ ka ti lai khan?

¹² “I nihai inṭana inthawk ta hrimin, zîngkâr dâm hi thu i pêk ta hlakin, Vârṭien chu a hun hre dingin în umtir ta hlak am,

¹³ Hnuoi inkhumna chu hlîm ding le, A sûnga mi rilo chu sêpdawka a um theina dingin?

¹⁴ Namna hnuoia pilpawk angin sukdanglamin a um a, Silfên angin piengzie a hung nei a.

¹⁵ Mi riloa inthawkin an var chu cheltângin a um a, Kut insâng khawm chu sukthliekin a um bawk a.

¹⁶ Tuipui hnârahai chun i lût ta hlak am? Annawleh, li inthûk rila chun i fe ta hlak am?

¹⁷ Thina kawtkhârhai chu i kuomah suklang a ni ta hlak am? Annawleh, thina hlim kawtkhârhai chu i hmu hlak am?

¹⁸ Hnuoi khang lienzie chu i hriet ta hlak am? Hril rawh khai, a rênga i hriet vawng chun.

¹⁹ Var umna hmun lampui chu khâwlai am a na? Inthimna hi teh, a umna hmun khâwlai am a na?

²⁰ Chutaka chun i va fe ding ni ta sienla, Chutaka in chu i va thlierhran ding ni ta sienla?

²¹ I hriet ngei maw, nang chu i pieng dai ta a, I nihai khawm a hung tam ta êm a!

²² Vûr intling khâwmnahaia chun i lût ta hlak am? Annawleh, riel intling khâwmnahai chu i hmu ta hlak am?

²³ Chuong buoina huna dinga ka khêkhai le, Indona le intukna nia dinga ka khêkhai chu?

²⁴ Ieng lampui âm var hi a fein, Annawleh, hnuoi chunga hin ieng lampui âm sak thli hi a hrâng hlak a?

²⁵ “Tuin am tuilien ta dinga ruom le, Ṭêk ta ding a lampui a siem a?

²⁶ Mi um nawna ram le, Mi um nawna thlalêra ruo insûrtir ding le.

²⁷ Leihnuoi râusan ta le, se ta chu sukkhawp ding le, Hlohna innêm chu hung inmâwngtir dingin?

²⁸ Ruo hin pa a nei am? Annawleh, daidaw malhai hi tuin am a hung thlâk a na?

²⁹ Tu phîng sûnga inthawkin am vûr chu a hung pieng a na? Vâna inthawka vûrsûr inphi sung sung chu tuin am ân pieng tir leh?

³⁰ Tuihai chu lung angin a ngar a, Li inthûk chungzâwl chu sukkhalin a um ta a.

³¹ Siruk inbâwr chu nangin khuop thei i ti? Sizucho khuopnahai chu i sût thei ding am a nih?

³² Mazzaroth chu an hun sengah i hung ṭhuoi suok thei ding maw? Annawleh, Zângkhuo* le bâwmtuhai i ṭhuoi thei ding maw? * Arasibâwr

³³ Vânhaia thuruothai chu i hriet vawng am? Hnuoi chunga hin thu în neitir thei ding am a nih?

³⁴ “Sûmhai chu i râwlin ko thei i ti, Ruopui vânâwnin a sûrkhumna ding chein?

³⁵ Kâwlinlephai chu an fe a, ‘Hitaka hin kan um,’ i kuoma ti dingin, I tir suok thei ding am a nih?

³⁶ Sûngril bung hranhaia chun tuin am varna a sie a? Annawleh, lungvara hrietna chu tuin am a pêk a?

³⁷ Varna ngawtin tuin am sûmhai chu a tiem sêng a? Vâna penghai chu tuin am bunthla thei a ta?

³⁸ Iengtik âm pilvut chu an hung inhlawmin, A hlawmhai chu an hung inchâr tlat a?

³⁹ Sakeibakneipui chu a safâk ding i zawngpêk ding am a nih? Annawleh, sakeibaknei vânglai phîngṭâm chu i sukkhawp thei am a nih?

⁴⁰ An pûk sûnga chun an bawk a, An kuoahai chun an inchân hlak laiin?

⁴¹ A têhai chu Pathien kuomah an khêk a, Fâk ding tlasama an umin Vaâk chu tuin am fâk ding a pêk a?