JOB LEKHABU (THE BOOK OF JOB) 36 - Pathien Lekhabu Inthieng (BSI)

Elihuin Pathien ropuina a chawisâng

¹ Elihu chun a zawm pei a, a hril a:

² “Mi lo daw hrâm la, inentir ka ti che; Pathien hmingin hril ding ṭhenkhat ka nei si a.

³ Hlataka inthawkin ka hrietna hung lâng ka ta, Felna chu keia mi Siemtu kuomah inentir ka tih.

⁴ Indiktakin, ka thuhai hi ân khêl si naw a; Mi hrietna famkim nei chu i kuomah a um a nih.

⁵ Ngai ta, Pathien chu thilthawthei a na, tukhawm a hmusit ngai naw a, Hrietna hrâtnaa thilthawthei a nih.

⁶ Mi rilo hringna chu a hla naw a; Amiruokchu, sukrimsia umhai kuoma chun an thuneina chu a pêk a nih.

⁷ Mi fela inthawk chun a mithai a lâk kîr ngai naw a, Amiruokchu, lalṭhungphaah lalhai leh an um a; Kumkhuoin anni chu a tungding a, chawimawi an ni hlak.

⁸ Kawlhai inbuntira an um a, Sukrinumna hruihaia kei an ni chun;

⁹ An sinthaw le an bawsietnahai le, Chapotakin an lo khawsak tâkzie ân entir hlak.

¹⁰ Inchûktirna tieng chun an na chu a sukvarpêk a, Suolnaa inthawka kîr dingin thu a pêk hlak.

¹¹ Chu chu an ngai a, ama rawng an bâwl chun, an nihai chu hausaknain hmang zo an ta, An kumhai chu nuomsipnain.

¹² Amiruokchu, an ngâi naw chun, kâwlhnâmin bohmang an ta, Hrietna bovin thîng an tih.

¹³ Nisienlakhawm, chuong lungrila Pathien ngaisak nawhai chun lunginsenna an khâwlkhâwm a, Anni a khuop pha khawm ṭhangpuina ngênin an khêk nawh.

¹⁴ Vânglaiin an thi a, An hringna chu mi dukdaklohai lai a bohmang ta a.

¹⁵ Sukrimsia umhai chu a sukrimsiknain a sanhim a, Nêksâwrnain an nahai chu a sukvar ta a.

¹⁶ Anih, rimsiknaa inthawk chun nang chu ṭhuoi hmang a ti che a, Inchêpna umlo, hmun lientaka chun; Chun, i dawkâna siea um chu thâunain sip tâng a tih.

¹⁷ Amiruokchu, nang chu mi rilo rorêla sip i ni ta a, Rorêlna le indikna chu nangmaa chun ân phun tah a nih.

¹⁸ Lunginsenna a um leiin, indittâwkna chun ṭhuoi hmang hlau a che, fîmkhur rawh; Intlanna nasatak chun nang chu hnâwlhmang bâwk naw raw se che.

¹⁹ Rimsia i um nawna dingin i hausaknahai chu a huntâwk am a nih? Annawleh, i thahrui hrâtnahai po po chu a hun am a nih?

²⁰ Zân chu dit naw la, Chu huna chun mihai chu an hmuna sât thlâk an ni hlak.

²¹ Fîmkhur la, suolna chu ngaisak naw, Sukrimsia umna nêkin hi hi i thlang ta si a.

²² Ngai ta, Pathien chun a thilthawtheinain insângtakin a thaw a, Ama ang inchûktirtu tu am an um a?

²³ Tuin am a lampui a ruotpêk thei a? Annawleh, ‘Thil fel lo i thaw a nih,’ tuin am ti thei a ta?

²⁴ “A sinthaw chawimawi hlak ding chu hre zing la, Mihai khawma hlaa an inpâk hlak chu.

²⁵ Mihai po po chun chu chu an en a, Mi chun hlataka inthawkin a hmu a.

²⁶ Ngai ta, Pathien chu a ropui a, ama chu ei hriet naw a nih; A kum tamzie khawm chu zawng suok ruollo a nih.

²⁷ Tui farhai chu chungtieng a lâk kâng a; Chuong chu, a tuihua inthawk chun ruoah an far thla si a.

²⁸ Chuongchun, vânhai chun a hung bunthlâk a; Mi chunga chun tamtakin ân sûrtir a.

²⁹ Anih, mi tu bêkin amanih sûmhai inzar ziehai hi hre thei a ti, A biekbûk vâninrûmhai chu?

³⁰ Ngai ta, ama vêla chun a var chu a phar a; Tuisuoriet limawng chu ân khum ta a.

³¹ Hieng thilhai hin mipuihai ro chu a rêl si a, Ama chun fâk ding tamtakin a pêk a.

³² A kuthai chu kâwlinlepin ân khum a, A tumna tak fu dingin thu a pêk a.

³³ A vâninrûm ri chun a chungchâng a puong a, Ran ruol chen khawmin thlipui hung hrânga chun an puong.