JOB LEKHABU (THE BOOK OF JOB) 35 - Pathien Lekhabu Inthieng (BSI)

¹ Chun, Elihu chun a hril a,

² “Hi hi indikin i ngaituo am a nih? Annawleh, ‘Ka felna chu Pathien felna nêkin a nasa lem,’ i ti am a nih?

³ ‘I ta dingin ieng am a ṭhatna a um a? Ka suksuol naw hi ieng am ka hlâwkna a um a?’ i ti a nih.

⁴ Nanga kuoma i ruolhai le, Nang ka hung dawn ding che a nih.

⁵ Vânhai tieng khi ngha la, en ta; Sûmhai khi en ta, nanga nêkin an insâng lem a nih.

⁶ Thil suol i lo thaw ta chun, ama chungah ieng am i thaw a? I bawsietnahai chu a hung pung chun, ieng am i thawpêk a?

⁷ I fel a ni chun, ama chu ieng am i pêk a? Annawleh, i kuta inthawkin ama chun ieng am a hmu a?

⁸ I rîtlona chun nangma ang bawkin mi a sukna thei a, Chun, i felna chun mihriem naupa chu a sukhlâwk thei a nih.

⁹ “Nêksâwrna tamtakhai lei chun an khêk a, Mi hrât bân leiin ṭhangpuina ngênin an khêk bawk a.

¹⁰ Nisienlakhawm, tukhawma, ‘Kei a mi Siemtu Pathien chu khâwlai am a um a, Zâna khawm hlahai pe hlaktu chu?

¹¹ Ama hnuoia ramsahai nêka mîn chûktir nasa lem a, Chunglêng vatehai nêka var lema mi siemtu chu?’ an ti nawh.

¹² Chutaka chun an khêk a, nisienlakhawm, tukhawmin dawnna an pêk nawh, Mi suolhai chapona lei chun.

¹³ Matheilovin, Pathien chun teplo mei mei chu ngai naw ni a, Iengkimthawthei chun ngaisak bawk naw ni.

¹⁴ Nangin ama chu ka hmu nawh i ti lem hin chu a ni naw âwm nasa de! Rorêlna chu ama hmaa um a ni si a, ama chu ring el rawh.

¹⁵ Amiruokchu, tuhin, a lunginsennain a hung hrem naw a, Chapona chu a ngaisak bawk naw a;

¹⁶ Chuleiin, Job hin teplo mei meiin a bau chu a ka a, Hrietna nei lovin thuhai chu a sukpung a ni hi,” tiin.