JOB LEKHABU (THE BOOK OF JOB) 34 - Pathien Lekhabu Inthieng (BSI)

Elihuin Pathien ân thiem thu

¹ Chun, Elihu chun a hril a:

² “Nangni mi varhai, ka thuhai hi lo ngai ta u; Nangni hrietna neituhai, keia tieng in na lo sit ta u.

³ Dangin fâk ding ân tem ang bawkin, Na chun thuhai chu a fie hlak si a.

⁴ Ân dik taphawt chu eini ta dingin thlang ei ta. A ṭha chu eini lai hre bawk ei tiu khai.

⁵ Job chun, ‘Kei chu ka fel a nih, Pathien chun ka thiemna chu a lâk hmang ta a.

⁶ Ka thiemna chunga chun kân khêl ding am a nih? Bawsietna bo ni lang khawm, ka hliemna chu sukdam thei lo a nih,’ a ti si a.

⁷ Job ang hi mi tu am an um a, Hmusitna tui ang ela dâwn a,

⁸ Rîtlona thawtuhai le hmunkhata fe a, Mi rilohai le intlawn hlak chu?

⁹ Ama chun, ‘Mihriem ta dingin ieng khawm a ṭhahnem nawh,’ ti siin, Pathiena chun ama chu a lâwm chu.

¹⁰ Chuleiin, nangni hrietthiemna neihai, mi lo ngai ta u, Rîtlona thâwng a tih ti hi Pathiena inthawka hlatak a ni ding a na, Suolna thâwng a tih ti hi, Iengkimthawtheia inthawka hlatak a ni ding a nih.

¹¹ Mi chu a sinthaw ang peiin ama kuomah a pêk ding a na, A lampuihai ang peiin mi tin chu ân hmutir ding a ni hi.

¹² Anih, matheiloin, Pathien chun rilotakin thaw naw tawp a ta, Iengkimthawthei chun rorêlna chu sukdanglam bawk naw ni.

¹³ Hnuoi chunga enkawl dingin tuin am thu a pêk a? Annawleh, khawvêl pumpui hi tuin am a chungah ân nghat leh?

¹⁴ Ama le ama chunga chun a lung inkîr lêt sienla, Ân thuokna le a thlarau chu ama kuoma chun la khâwm sienla chu;

¹⁵ Tisa po po chu bohmang vawng an ta, Mihriem chu pilvuta bawk kîr nâwk el a tih.

¹⁶ “Tuhin, hrietthiemna i nei chun chu, hi hi lo ngai la, Ka thuhai ri chu lo ngai raw khai.

¹⁷ Indikna theidatu chun ro a rêl ding am a nih? Mi indik le mi hrât chu i dem ding am a ni,

¹⁸ Lal kuomah, ‘I suol a nih’ ti a, Mi ṭhahai kuomah, ‘In rilo a nih’ titu;

¹⁹ Lalnauhai khawm inza biklo, Hausahai khawm mi rimsi nêka ngaisâng chuong lotu chu? An rêngin a kutsuokhai an ni si a.

²⁰ Mitkhapkâr lovin an thi a, zânrila ngei khawm; Mihai chu sukhnîngin an um a, an fe hmang ta a; Mi thilthawtheihai khawm chu kut ṭhangloa lâkin an um bawk a.

²¹ A mithai chu mihriem lampuihai chunga chun a fu a, A fe vêl po po khawm chu a hmu zing a.

²² Thina hlim amanih, inthimna amanih khawm a um nawh, Thil khawhlo thawtuhai an inbîkna ding hmun chu.

²³ Mihriem chunga chun chantâwk bâk nêka nasa chu innghat naw ni a, Pathien hmaa chun rorêlnaah a fe ding a nih.

²⁴ Mi hrâthai chu a nawi tiem sênglovin suknawi a ta, An aiah mi danghai sie thung a tih.

²⁵ Chuleiin, an sinthawhai chu a hriet a, Zâna chun ân letling a, chuongchun, suksiet an ni ta a.

²⁶ Mi rilohai angin anni a vuok a, Mi danghai mithmua chun;

²⁷ Ama chu zui dinga an pêthmangsan lei le A lampuihai chu pakhat khawm an ngaisak naw leiin.

²⁸ Chuongchun, mi rimsi khêk ri chu ama kuom an intlungtir a, Chun, ama chun sukrimsia um khêk ri chu a lo hriet a.

²⁹ To ṭawk ṭawka a um laiin, tuin am dem thei an ta? Chun, a hmai a thup lai chun tuin am ama chu hmu thei an ta? Hnam pumpui chunga thaw amanih mi pakhat chunga t haw amani khawm ni sien, angkhat a nih.

³⁰ Pathien ngaisak naw mi chun ro rêl naw sien chu, Mihai chu a âwk ding tukhawm um naw ni hai.

³¹ Mi tukhawma Pathien kuomah an ti ta hlak am, ‘Thununna chu ka tuor ta a, suklungsen nâwk ta ngai dêr naw ning;

³² Ka hmu nawhai chu nangin mîn chûktir la, Suolna lo thaw tah ka ni chun, thaw ta ngai naw ning,’ tiin.

³³ A thungna chu i nuom angtak chu a ni ding maw, nang chun i kal vei a? Nang chun i thlang ding a nih, kei ni lovin; Chuleiin, i hriet chu hril rawh.

³⁴ Mi, hrietthiemna nei mihai chun ka kuoma hieng hin tîng an ta, Anih, mi var tinhai kei mi lo ngai hlakhai chun;

³⁵ ‘Job chun hrietna nei lovin thu a hril a. A thuhai chu varna bo a nih,’ tiin.

³⁶ Job chu a tâwp chena fie ni sienla aw, Mi rilohai anga a dawnna leiin.

³⁷ A suolnaa chun helna chu a belsaa, Eini lai hin a kuthai a ben a, A thuhai chu Pathien chunga chun a sukpung ta a,” tiin.