JOB LEKHABU (THE BOOK OF JOB) 31 - Pathien Lekhabu Inthieng (BSI)

Jobin a thiemna thu a hril

¹ “Ka mit leh thuthlung ka siem a, Iengtin am nunghâk chu en tâng ka ta?

² Chungtienga Pathiena inthawka ka chan chu ieng am a na? Chungtienga Iengkimthawtheia inthawka ka rochan chu ieng am a ni leh?

³ Mi fello ta dingin vângduoina, Rîtlona thawtuhai ta dingin sietna a ni naw am a nih?

⁴ Ka lampuihai chu a hmuin, Ka kalchawihai chu a tiem vawng a ni naw am a nih?

⁵ “Chapotaka kal ka chawi a, Ka ke chun hlêmna tieng a pên inhmaw chun;

⁶ (Bûkna indiktaka bûkin mîn umtir sienla, Pathien chun ka ringumna chu a hriet theina dingin)

⁷ Ka kalchawi chun lampui a pêtsan a, Ka lungrilin ka mithai chu a zui bawk chun, Ka kuthaiah kaidum hrim a um phawt chun;

⁸ Mîn tûtir la, mi dangin fa raw hai se; Anih, ka lo rasuok chu a zunga kar hmangin um raw se.

⁹ Ka lungril hin nuhmei tieng a ngaisak chun, Ka tuolbâwm kawtkhâr bula kân chân bawk chun;

¹⁰ Ka nuhmei hin mi dang kuomah bu râwt sienla, Mi dang chu a chungah bawk raw se.

¹¹ Chu chu thuse theidaumtak a ni si a, Anih, rorêltuin a hrem ding khawpa rîtlona a nih.

¹² Bohmangna dinga kâng hmangtu mei chu a ni si a; Chu chun ka hlâwkna po po chu karphawi vawng a tih.

¹³ Ka siehlawpa amanih, ka siehlawnu amani chungthu ka ngaitha chun, Kei le kan insukbuoi laiin,

¹⁴ Pathien chu hung tho ta sienla ieng am lâwng ka ta? A hung indawn fel pha chun iengin am ama dawn ka ta?

¹⁵ Sula kei mi siemtu chun ama khawm chu a siem a ni naw am a nih? Sula chun ama chun a mi siemvêl ve ve ni lo am a nih?

¹⁶ “Mi rimsi chu an dit zâwng kân ropêk chun, Annawleh, hmeithai mithai chu hlawsam dinga ka siem chun;

¹⁷ Annawleh, ka fâk ding chu ka khâta ka fâk a, Fahra chun chutaka mi chu a fâk ve naw chun;

¹⁸ (Ni lo, ka tleirâwla inthawk tah pa kuoma angin ka kuoma inṭhanglien a na, Ka nu sula inthawka kei chu amanu ṭhuoitu chu ka lo ni ta si chun);

¹⁹ Silfên tlasama mi bohmang hrim hrim ka hmu chun, Annawleh, chu tlasam chun silfên a nei hlek naw chun;

²⁰ A kâwng chun mal a mi lo sâwm ta naw a, Ka berâmhai hmula ama chu suklum a lo ni ngai naw chun;

²¹ Dâikawtkhâra chun ka ṭhangpuina chu ka hmu leia, Fahrahai chu kalin an chungah kut ka lo inlet ta chun;

²² Ka liengko hi darphêka inthawkin tla hlawl sienla, Ka bân hi a ruchânga inthawkin tliek raw se.

²³ Pathiena inthawka sietna chu ka ṭi lei le, A ropuina ṭina leiin chuong thilhai chu ka thaw thei naw a nih.

²⁴ Ka beiseina chu rângkachaka ka siem chun, Rângkachak inthieng kuoma chun, ‘Nang hi ka ringsan tak chu i nih,’ ka ti chun;

²⁵ Ka hausakna hi a hung nasat lei a ka hlim a, Ka kut chun tamtak a hung hmu leia ka lâwm a ni chun,

²⁶ Nisa chu vartaka a var lei le, Thla chu vartaka a fê lai ka thlîr a;

²⁷ Ka lungril chu arûka hîpa a um a, Ka bau chun ka kut chu a fâwp chun;

²⁸ Hi khawm hi rîtlona rorêltuin a hrem ding chu a nih: Chunga um Pathien chu ka hlêm a ni ding an si a.

²⁹ “Keia mi theidatu sietnaa chun ka hlim a, Annawleh, ama chu thil ṭha nawin a hmu suok phaa kân sie chung chun;

³⁰ (A hringna ta dinga ṭawngsie inphura, Suksuol dingin ka bau chu ka phal nawh)

³¹ Ka puon ina mihai chun, ‘A bu le bâla insukkhawp lo tûm an um a ?’ an ti naw chun,

³² (Mikhuol chu kawtthlêra chun a riek naw a; Amiruokchu, mikhuol ta ding chun ka kawtkhâr chu ka hawng lem hlak).

³³ Mihai anga ka bawsietnahai chu ka ip a, Ka ângsûnga ka rîtlona chu thupa kân khum chun;

³⁴ Mipui nasatakhai chu ka ṭi a, Sûngkaw inpâwina chun a mi suklâu bawk a; Ka to ṭawk a, kawtkhâr khawm ka suok ngam naw a ni chun,

³⁵ Aw ka thu mi ngaipêk ding hi chu um hai sien! (En ta u, hitaka hin ka hming ziek a um a, Iengkimthawthei chun mi dawn raw se;) Ka hmêlmain a ziek, hêkna lekhabu chu nei lang chu aw!

³⁶ Matheilovin ka liengkoah put ka ta, Lukhum angin keimaa chun khitde ngei ngei ka tih;

³⁷ Ka kalchawi ni zât chu ama kuomah hrilfieng ka ta; Lal nau angin ama hnaiah fêng ka tih.

³⁸ Ka ram chu ka chungah a khêk a, A changkuonghai chu an ṭap a;

³⁹ Chutaka rahai chu tangka boa ka fâk chun: Annawleh, a neituhai chu chutaka chun an hringna inhmang khawpa a siem chun;

⁴⁰ Bu nêkin hlingbuk ṭo lem sienla, buṭei nêkin buor ṭo lem raw se,” tiin. Job thuhrilhai chu a tâwp tah.