JOB LEKHABU (THE BOOK OF JOB) 30 - Pathien Lekhabu Inthieng (BSI)

Jobin a rimsikna thu ân zâwt

¹ “Nisienlakhawm, tuhin ka nêka naupang lemhai khawm chun nuizabûrah an mi nei a; An pahai ka ran ruol uihai vêng dinga ka nuiêuhai khan,

² Anih, an kut thahrâthai chun a ieng chun am mi sukhlâwk a ta? Mi an vânglai hun fe liem ta hi.

³ Tlâksamna le ṭâmna leiin an inrieng a, Râusanna le sietna hmun thim thlalêr ram chu an tlân a.

⁴ Hna rimtui hnabuk le, Luong zunghai chu an bu dingin an lâk a.

⁵ Mihriem laia inthawka hnawt hmangin an um a, Inru rau ang elin an hnunga chun an rau a.

⁶ Ruom chadan kârahai le, Hnuoi kuoahai le lungpui pûkahai um dingin.

⁷ Hlobuk lai chun an khêk a, Zakthlai buk hnuoia chun an um khâwm a.

⁸ Invêt nauhai an nih, anih, mi hmangnabohai nauhai an na; Rama inthawk hnawt suok an nih.

⁹ “Tuhin annihai hla chu ka lo ni ta hi; Anih, anni ta dingin ṭawngnaa hmang ka lo ni tah.

¹⁰ An mi pâwlser a, keimaa inthawka hlatakah an ngîr a, Ka hmaia chil mi sâk khum khawm an ma nawh.

¹¹ Ka thalhrui chu a sût a, a mi sukrinum ta leiin, Ka hmaa chun thîrse chu an pei thlâk a.

¹² Ka changtieng panga chun mi dukdaklo chu a tho a. Ka kehai chu ân tâwlhmang a; Ka chunga chun an bohmangna lampuihai chu an inchuon ta a.

¹³ Ka lampui chu nasatakin an suksiet a, Ka lungngaina chu hma an insâwntir a, Anni chu tukhawmin an khap nawh.

¹⁴ Tui inṭhe huk ang elin an hung a, Suksietna laia chun keia chungah an intêl a.

¹⁵ Ṭitnahai chu ka chungah a hung tlung a, Ka miṭhatna chu thli ang elin an hnawt a, Ka vângneina hlak chu sûm angin a fe liem ta a.

¹⁶ Tuhin ka lungril chu keia sûnga hin bunthlâkin a um a; Rimsikna nihai chu ka chungah a tlung chie tah a ni hi.

¹⁷ Zân huna chun ka ruhai hin an mi chip an mi chip a, Chuong natna mi chip mi chiphai chu an ma ngai nawh.

¹⁸ Ka natna hrâtna nasatak ei chun ka silfên chu a hmêlhem zo a, Ka zakaw rîng angin a mi khuop ta lem a.

¹⁹ Dûmchirhaka chun a mi the lût a, Vut le pilvut ang el ka ni tah a ni hi.

²⁰ I kuomah ka hung khêk a, nang hlaka i mi dawn naw a, Ka ngîr a, nangin i mi en naw a.

²¹ Ka chunga nunse dingin în chang ta a, I kut hrâtna chun i mi hrem a ni ta hi.

²² Nang chun thlia chun i mi dawmkâng a, a chunga chun i mîn chuongtir a, Thlipuia chun i mi suktui ta a.

²³ Nang chun thina le, Mi hring po po ta dinga in ruota chun mi ṭhuoi i tih ti ka hriet si a.

²⁴ “Sietna nasatak tuortu chun a kut phar suokin, A sietna chunga chun ṭhangpuina ngaiin a khêk naw ding am a nih?

²⁵ Mi buoina tuoktu ta dingin ka ṭap hlak a ni naw am a nih? Mi tlasam ta ding khawm chun ka lungril ân rim hlak a ni naw am a nih?

²⁶ Thil ṭha ka zawng laiin, thil ṭha naw a hung tlung a; Var ka nghâk zing laiin, inthimna a hung tlung bawk a.

²⁷ Ka lung ân phu dut dut a, a châwl naw a; Rimsikna nihai chu ka chungah a hung tlung a ni ta hi.

²⁸ Nisa ni si loa em dukin ka um a; Inkhâwmna lai chun ka ngîr dawk a, ṭhangpuina ngaiin ka khêk a.

²⁹ Sihalhai ta dinga unaupa ka lo na, Ostrikhai ta dinga ruolpa leh.

³⁰ Ka vun chu a hung dum a, ka panga inthawkin ân hlip thla a; Ka ruhai chu lumin a kâng bawk a.

³¹ Chuleiin, ka ṭingṭang chu sûnnaah ân chang a, Ka theihle chu mi ṭaphai râwlah ân chang bawk a.