JOB LEKHABU (THE BOOK OF JOB) 26 - Pathien Lekhabu Inthieng (BSI)

Jobin Pathien chunghnungzie a puong

¹ Chun, Job chun a dawn a, a hril ta a:

² “Thilthawtheina nei naw mi chu i va ṭhangpui hlak de! Kut hrâtna nei naw chu i va sanhim hlak de!

³ Varna nei naw chu i hril var a; Hrietna indiktak chu huntâwk zetin i hrilfie a!

⁴ Chuong thuhai chu tuin am ân hriltir che a na? Nangmaa inthawka suok chu tu thlarau am a na?

⁵ A thi tahai chu an inthin a, Tuihai le chutaka umhai hnuoia chun.

⁶ Ama hmaa chun Seol chu saruok a nih, Sietna khawm chun silfên a nei nawh.

⁷ Hmun ruok chunga chun hmârtieng chu a keiphar a, Leihnuoi chu iengkhawm nilo chungah a khai bawk a,

⁸ Tuihai chu a sûm sâtakhai chun a fûn khâwm a, An hnuoia chun sûm chu ân ek si naw a.

⁹ A lalṭhungpha hmai chu ân khum a, A chunga chun a sûm chu ân zâmtir a.

¹⁰ Tuihai chunga chun ramri a riruong a, Sûn le zân tâwp chinhaia le chun.

¹¹ Vân banhai chu an inthinin, A kâwknaa chun mak an ti a.

¹² A thilthawtheinain tuipui chu a sukre a, A hrietthiemna chun Rahab chu a sukthlûk bawk a;

¹³ A thuok chun vânhai chu cheimawiin a um a; A kut chun rûlpui intawl lai chu a sunthleng ta a.

¹⁴ En ta u, hi hi hman hi a lampuihai a ṭhen chau chu a na, A chanchin chu ei va hriet tlâwm lâwm lâwm ngei de! Nisienlakhawm, a thilthawtheina rihâu chu tuin am hrethiem thei a ta?” tiin.