JOB LEKHABU (THE BOOK OF JOB) 21 - Pathien Lekhabu Inthieng (BSI)

Jobin mi rilohai hlawtlingna thu a hril

¹ Chun, Job chun a dawn a, a hril ta a:

² “Ka ṭawng hi nguntakin lo ngai unla, Hi hi in inhnêmna chu ni raw se.

³ Mi phal unla, kei khawma thu hril vêng ka tih, Ka hril zoah mi nuisan de ti niu.

⁴ Ka chungthua chun, ka chierna hi mihriem chung am a nih? Iengdingin am lunginrawm lovin um ka ta?

⁵ Mi en unla, makti unla, in kutin in bau chu hup el ro.

⁶ Ka ngaituoin ka lung a zîng a, Ṭitnain ka taksaah a mi man hlak.

⁷ Iengtiziea mi rilo chu hringin, an hung tarin, thilthawtheinaa an hung nasa hlak am a na?

⁸ An thlahai chu anni mithmu ngeia anni le tungding an na, An chithlahai an mithmu ngeiah, tungding an nih.

⁹ An inhai chu ṭitnaa inthawkin a him a, Pathien hmawl khawm chu an chungah a um bawk nawh.

¹⁰ An bâwngchalhai chun chi an thla a, an ching ngai naw a, An bâwngpuihai chun tê an nei a, tê an insiet ngai nawh.

¹¹ An nauhai chu berâm ruol angin an tir suok a, An nauhai chu an lâm a.

¹² Ṭingṭang le khuongtê leh hla an sak a, Theihle ria chun an hlim bawk a.

¹³ An nihai chu neinungtakin an hmang zo a, Thlamuongtakin Seola chun an fe thla ta a.

¹⁴ Pathien kuoma chun, ‘keinia inthawkin fe hmang rawh, I lampuihai hrietna chu kan châk naw a nih,’ an la ti ta rawp a.

¹⁵ ‘Iengkimthawthei chu tu am a ni leh, a rawng ei bâwl ding chu? A kuoma ei ṭawngṭaiin ieng am ṭhathnemna hmûng ei ta?’ tiin.

¹⁶ En ta u, an hausakna chu an kutah a um naw a; Mi rilo thurâwn chu keimaa inthawka hlataka chun a um a nih.

¹⁷ Mi rilohai khâwnvar chu ieng anga herhlum rawpin am a um a? An sietna khawm chu ieng angin am a hung rawp ding? Pathien khawm chun a lunginsenin lungngainahai a pêk tâwl chu?

¹⁸ Thli hmaa pâwl kûng ang el an na, Busi thliin a lên hmang hlak ang chu an nih.

¹⁹ ‘Pathien chun a thlahai ta dingin a khawhlona chu a khâwlkhâwm,’ in ta, An hriet theina dingin an chunga ngei chun thung ni raw se.

²⁰ An mithai chun an sietna ngei chu hmu sienla, Iengkimthawthei lunginsenna ngei chu indâwntirin um raw hai se,

²¹ An thi hnung chun an insûng chu ieng dim ni tâng an ta, An ta dinga thla tiem zât a bo hnung chun?

²² Mi tukhawmin Pathien chu hrietthiemna ân chûktir ding am a nih, Mi insânghai chunga chun ro a rêl ti hmu siin?

²³ Mi chu a hrât lai takin a thi a, To ṭawk ṭawk le sâwldam rawng rawnga umin.

²⁴ A taksa chu thâuin a sip a, A ruhai thlin chu a tlawr bawk a.

²⁵ Chun mi dang lungngaitakin a thi a, Thil ṭha hrim hrim ân tem ngai nawh.

²⁶ Pilvuta chun angkhat charin an zâl vê ve a, Anni chu ngehai chun ân khum a nih.

²⁷ Ngai ta u, in ngaituohai ka hriet deh Keima chunga indik nawtaka inngaituona remruotnahai le chun.

²⁸ ‘Lalnau in chu khâwlai am a na? Mi rilo umna puon in chu khâwlai am a na?’ in ti si a.

²⁹ Lampuia mi inlawnhai chu in indawn naw am a nih? An thuhrilhai chu in pawm naw am a nih?

³⁰ Mi suol chu suksietna nia dinga khêk a na, Ṭhuoihmangin an um a, lunginsenna nia dingin.

³¹ Tuin am a lampui chu a hmaisana chun hrilfieng a ta? A thil lo thaw ta chu tuin am thungpêk a ti leh?

³² Thlâna chun ama chu phur hmang la nîng a ta, Thlân in chunga chun la nghâk an tih.

³³ Varuom piltlanghai chu ama ta dingin inhnik a ta, Chun, mi po po chun ama hnung chu zui an tih, A hmaa mi tiem sêng lo lo um tahai ang khan.

³⁴ Anleh, iengtin am teplo chun mi thlamuon in ta, In dawnnahaia chun khêl ngawt naw chu iengkhawm a um nawh,” tiin.