JOB LEKHABU (THE BOOK OF JOB) 17 - Pathien Lekhabu Inthieng (BSI)

¹ “Ka thlarau chu a kawidar a, ka nihai chu a hung bo ta a, thlân chu keia ta dingin inzosa a nih.

² Matheilovin, ka kuoma hin nuisantuhai an um a nih, An suklungsennaa chun ka mit chu a châm zing a nih.

³ “Tuhin intiemna siem la, nangma chu ring tlat ngamna che mi siempêk rawh. Chutaka chun tu am kuthai mi benpui ding an um a?

⁴ An lungril chu nangin hrietnaa inthawkin i thuppêk si a, Chuleiin, nangin anni chu chawimawi naw ti nih.

⁵ Hlâwkna dinga ruolhai thlauthlatuhai chu, A nauhai mithai ngei khawm chu la hlawsam a tih.

⁶ Ama chun mihai hrilinsîmah a mi siem a; Mî chil sâk khum ka hung ni ta hi.

⁷ Lungngaina leiin ka mit khawm a hung inthim a; Ka taksaa bunghai po po khawm chu hlim ang an nih.

⁸ Mi tluong chu hitaka hin mak tîng a ta, Mi pawitâwklo chu Pathien ngaisak lo chungah insukthatho a tih.

⁹ Mi fel chun a lampui chu chel zing a ta, Kut faihai neitu chu hung hrât deu deu a tih.

¹⁰ Amiruokchu, in rêngin kîr unla, tuhin hung ro: Nangni lai mi var ka hmu thei si naw a,

¹¹ Ka nihai chu a liem a, ka thiltumhai chu a hung se a, Ka lungril ngaituohai ngei chu.

¹² Zân chu sûnah an inchangtir a: ‘Var chun inthim a hnai tah,’ an ti a.

¹³ Seol chu ka in anga ka en chun, Inthima chun ka ṭhunghmun chu ka rem chun;

¹⁴ Khur kuoma chun, ‘Ka pa i nih’ ka ti a, Nge kuoma chun, ‘Ka nu le ka farnu i nih’ ka ti bawk chun,

¹⁵ Ka beiseina chu khâwlai am ni tâng a ta? Ka beiseina chu tuin am hmu tâng a ta?

¹⁶ Seol kawt bulahai chun fe thlâng a ta, Pilvutah châwl hmunkhat tâng kan tih,” tiin.