JOB LEKHABU (THE BOOK OF JOB) 11 - Pathien Lekhabu Inthieng (BSI)

Zopharin Job riloa ân tum

¹ Chun, Zophar Naamath mi chun a dawn a, a hril ta a;

² “Thu tamtakhai hi dawn a ni ngei naw ding am a nih? Mi ṭawng tam chu thiem inchangtir a ni ding am a nih?

³ Chatlakloa i ṭawng hin mihai ân to ṭawktir ding am a nih? Thamlo taka i ṭawng hin tukhawmin an sukzak naw ding che i ring maw?

⁴ ‘Ka thuring chu ân thiengin, I mithmua chun kân thieng a nih,’ i ti si a.

⁵ Nisienlakhawm, aw, Pathien chun hung hrilin, Nanga kalin a hmûrhai chu hung inchângtir ve sienla;

⁶ Varna thurûkhai chu ân entir ding che bah! Varna chu sîr tamtak a ni si a, Pathien chun i khawhlonain a phu nêka nêp lemin a thaw che a nih ti hre rawh.

⁷ A zawnga zawng ngawtin Pathien thil inthûkhai chu i hmu suok thei ding am a nih? Iengkimthawthei chu a famkimin i hmu suok thei ding am a nih?

⁸ Vân ang ela insâng a nih; nangin ieng am thaw thei i ta? Seol nêka inthûk lem a nih; nangin ieng am hre thei i ta?

⁹ Chu chu lienzie chu leihnuoi nêkin a sei lemin; Tuisuoriet nêkin a lien lem a nih.

¹⁰ Ama chu a fêthleng a, a khârkhip a, A ko khâwm chun tuin am dang thei an ta?

¹¹ Mi teplohai chu a hrietin, A ngaituo naw khawma, khawhlonahai chu a hmu si a.

¹² Ram sabengtungtê mihriema a pieng phaleh, Mi teplo chun hrietthiemna nei chau a tih.

¹³ I lungril chu i siem dik a, Ama tiengah i kuthai i phar chun;

¹⁴ I kuta chun khawhlona a um ruok chun, hlatakah sie dai rawh, I puon inahai chun fel nawna inchêngtir naw la;

¹⁵ Chun, matheilvoin i hmai chu kaidum um hlek lovin nghâng i ta, Anih, dettakin um i ta, ṭi naw ti ni.

¹⁶ I rinum tuorhai chu i theinghil ta âwm si a; Tui luong hmang tahai ang chau chun hre zing i tih.

¹⁷ Chun, i hringna chu sûnchang lai nêkin hung fie lem a ta, Inthimna um sien khawm, zîngkâr ang ni tâng a tih.

¹⁸ Chun, beiseina a um leiin, nang chu him tâng i ta, Anih, nangma le nangma inzawng suok i ta, himtakin sâwldam tâng i tih.

¹⁹ Zâl i ta, tukhawma suklâu bawk naw ni hai che; Anih, mi tamtakin nangma le inremna hung siem an tih.

²⁰ Nisienlakhawm, mi rilo mithai chu hung hlawsam a ta, Tlân hmangna ding lampui khawm nei naw ni hai, An beiseina khawm chu thlarau inthla ang chu nîng a tih,” tiin.