JEREMIA 7 - Pathien Lekhabu Inthieng (BSI)

In lampuihai le in thilthawhai siem ṭha ro

¹ Lalpa kuoma inthawka Jeremia kuoma thu hung chu:

² “Lalpa in dai kawtkhâra chun ngîr la, chutaka chun hi thu hi puongdar la, hieng hin hril rawh: Lalpa be dinga hi dai kawtkhârhaia lût, nangni Juda mihai po po, Lalpa thu hi lo hre ta u.

³ Israel Pathien, sipaihai Lalpa chun hieng hin a tih: In lampuihai le in thilthawhai chu sukṭha unla, hi hmuna hin inchêngtir ka ti cheu,

⁴ ‘Lalpa biekin chu, Lalpa biekin chu, Lalpa biekin chu hi hi a nih,’ ti thukhêl dâm hi ring naw ro.

⁵ In lampuihai le in thilthawhai chu in siem ṭha a; mi le a tuolbâwm kara rorêlna tlangtaka in sukthlûkpêk a,

⁶ mikhuolhai chu in nêksâwr naw a, pa nei lohai le hmeithaihai leh; hi hmuna hin mi thiem thisen chu in insuo naw bawk a, nangni le nangni insukpawina dingin pathien danghai chu in zui bawk naw chun,

⁷ in thlatuhai kuoma ram ka i pêk tah, inhmaa inthawka kumkhawtluong elin, hi hmuna hin inchêngtir ka ti cheu.

⁸ Ngai ta u, thukhêlhliphai, ṭhathnemna neilohai chu in ring a.

⁹ Inruin, tuolthatin, uirein, khêla inkhâmin, Baal hmaa chun riminhnik rawin pathien in hriet nawhai chu zuiin,

¹⁰ ‘Sansuokin ei um tah’ tiin, hieng thil pawrchehai po po hi thaw dingin hi in ka hming chawisana hin hungin ka hmaa chun in hung ngîr ding am a nih?

¹¹ Hi in ka hming chawi hi in mithmua chun inruhai pûk a lo ni ta a ni maw? Ngai ta u, keiin, keima ngeiin ka hmu tah, Lalpa chun a tih.

¹² Amiruokchu, tuhin ka hmun Siloa chun fe unla, a tira inthawka ka hming kân umtir zingnaa chun; ka mi Israelhai khawhlona leia thil ka ithawhai chu va hmu ta u.

¹³ Chun, tuhin Lalpa chun, ‘Hieng thilhai po po hi in thaw ta leiin, inhmataka thoa thu hrilin, in kuoma ngei chun thu ka lo hril ta a; nisienlakhawm, in ngai si naw a; ka ko cheu a, in mi dawn naw a;

¹⁴ chuleiin, in thlatuhai le nangni kuoma ka pêk, hmun le in ringna innghatna, ka hming chawia ko, in chunga chun, Siloa chunga ka lo thaw ta ang bawk khan ka thaw ding a nih.

¹⁵ Ephraim chihai po po, in unauhai po po kha ka lo hnawt suok ta ang khan ka mithmua inthawk hnawt suok ka ti cheu.

Milim biekna chunga Pathien lungsenna

¹⁶ Chuleiin, hi hnam ta ding hin ṭawngṭai naw la, an ta dingin ṭawngṭaina amanih, râwl amani khawm insuo naw rawh; chun, ka kuoma khawm hnina khawm hung siem bawk naw rawh; ka lo ngai âwm si naw che a.

¹⁷ Jerusalem kawtthlêrahai le Juda khawpuihaia an thawhai chu i hmu nâwm a nih?

¹⁸ Naupanghai chun thing an inkhâwm a, pahai chun mei an sêm a, nuhmeihai chun bei an hmet a; vân lalnu ta dinga beithlum siem dingin le, lunginsennaa an mi chawktho theina dinga pathien danghai kuoma dâwnmi thilinhlânhai dâm chu bur dingin.

¹⁹ Kei chu an mi suklungsen am a nih? Lalpa chun a tih; an inzakna dingin, anni le anni chu an insuklungsen a ni nâwm a nih?

²⁰ Chuleiin, Lalpa Pathien chun hieng hin a tih: Ngai ta, ka lunginsenna le ka ṭiumna chu hi hmuna hin bunthlâk nîng a ta, mihriem chunga le, ramsahai chunga le, rama thinghai chunga le, hnuoia rahai chunga chun; chun, kâng a ta, ṭhel ni ngai naw ni.

Juda helna leia hremna

²¹ Israel Pathien, sipaihai Lalpa chun hieng hin a tih: In inthâwinahaia chun in pumrawhmang thilinhlânhai chu belsa unla, sa chu fa ro.

²² Inthâwinahai le pumrawhmang thilinhlân chungthua hin Aigupta rama inthawka anni ka hung ṭhuoi suok nia chun, in thlatuhai kuoma chun thu hrilin, thupêk ka lo nei nawh;

²³ nisienlakhawm, hi thua hin thu ka pêk a, “Ka râwl hi ngai unla, in Pathien nîng ka ta, nangni khawm ka mihai nîng in tih; chun, thu ka pêk cheu po po kha hraw unla, in ta dingin ṭhâng a tih,” tiin.

²⁴ Nisienlakhawm, an ngai naw a, an na khawm an sit bawk naw a, amiruokchu, anni remruotnaa le, an lungril rilo kâwmâwna chu hrawin, hmatiengah ni lovin an kîr nâwk ta lem a.

²⁵ In thlatuhai Aigupta rama inthawka an hung suok nia inthawka vawisûn ni chen hin ni tin inhmatakin thoin, ka zâwlneihai ka siehlawhai po po chu an kuomah ka hung tir a;

²⁶ nisienlakhawm, keia thu chu an ngai chuong naw a, an na khawm an sit bawk naw a, an rîng chu an suktlûn a, an thlatuhai nêkin an thaw ṭha naw lem ta a.

²⁷ Chun, hieng thuhai po po hi an kuoma chun i hril ding a nih; amiruokchu, i thu chu ngai naw ni hai; anni chu ko bawk i ta, nisienlakhawm, dawn naw ni hai che.

²⁸ Chun, an kuoma chun, “Lalpa an Pathien râwl khawm ngai lova, inchûktirna khawm pawm bawk lohai chu hi hnam hi an nih; thudik chu a riral a, an baua inthawk chun sât thlâkin a um a,” tîng i tih.

²⁹ Aw Jerusalem, i sam chu tan rawh, peihâwn la, bâwlhmun tlângahai chun sûnna siem rawh; Lalpa chun a lunginsenna thlahai chu a nghatsanin a hnâwl ta si a.

³⁰ Juda thlahai chun ka mithmua thil ṭha naw chu an lo thaw ta si a, Lalpa chun a tih: sukpawrche dingin, in ka hming chawia koa chun an tirdakumnahai chu an sie ta a.

³¹ Hinnom naupa ruoma chun Topheth bâwlhmunhai chu an naupasalhai le an naunuhmeihai meia an rawna dingin an bâwl ta a; chuong chu thu ka pêk ngai naw a, ka lungrila khawm lût khawm a hung lût ngai nawh.

³² Chuleiin, ngai ta, a nihai a hung tlung, Lalpa chun a tih; Topheth amanih, Hinnom naupa ruom amanih ti ni ta ngai naw ni a, Inthatna ruom ti ni lem tâng a tih, hi Topheth hmuna hin inphûmna hmun ding a um naw chen khawma an inphûm ding a ni si a.

³³ Chuongchun, hieng mipui ruonghai hi, chunglêng vatehai ta dinga bu nîng a ta, ramsahai ta ding khawma; tukhawma an hnawt hmang âwm si naw a.

³⁴ Chun, Juda khawpuihaia inthawk le Jerusalem kawtthlêrhaia inthawk chun hlimna râwl dâm, lâwmna râwl dâm, moneitu râwl dâm, mo râwl dâm inrêtir ka tih; ram chu suksiet a ni ding a ni si a.