JEREMIA 42 - Pathien Lekhabu Inthieng (BSI)

Johanan kuoma Jeremia thucha

¹ Chun, sipai hotuhai po po, Karea naupa Johanan hai, Hosaia naupa Jezania hai, mipui po po a chîn taka inthawka a lien tak chenin an hung hnai a,

² zâwlnei Jeremia kuoma chun hieng hin an hril a, “Kan ngên che hi, kan hninahai hi i hmaa chun pawm ni raw se; hieng tuta la mahlahai po po ta ding hin, Lalpa i Pathien kuoma chun kan ta dingin ṭawngṭai rawh; i mitin a hmu chie ang hin, tamtak kha tlâwmte chau hi hlain kan um a nih;

³ Lalpa i Pathien chun thil kan thaw ding le, lampui kan hraw ding chu a mîn hriettir theina dingin,” tiin.

⁴ Chun, zâwlnei Jeremia chun an kuomah, “In thu chu ka hriet ta a; ngai ta u, Lalpa in Pathien kuoma chun in thuhai ang peiin ṭawngṭai ka tih; chun, thil iengkhawma Lalpain a hung dawnna cheu chu in kuomah hrilfieng ka tih, iengkhawm in kuomah ip naw ning,” a ta.

⁵ Anni chun Jeremia kuoma chu, “Lalpa i Pathienin kan kuoma a hung tirna ang thu po pohai anga kan thaw naw chun, Lalpa chu eini laia hrietpuitu ringum le indik ni raw se.

⁶ A ṭha amanih, a sie amanih khawm ni sienla, Lalpa kan Pathien kan itirna che chu a râwl chu ngai kan tih; Lalpa kan Pathien râwl chu kan awi pha chun, keini ta dinga a ṭhatna dingin, ” an ta.

⁷ Chun, ni sâwm hnunga chun, Lalpa thu chu Jeremia kuoma chun a hung tlung ta a.

⁸ Ama chun Karea naupa Johanan le, an kuoma um sipai hotuhai po po le, mi po po a chîn taka inthawka a lien tak chenin a ko a.

⁹ an kuomah a hril a, “A hmaa in hninahai chu intlun dinga in mi tirna, Lalpa Israel Pathien chun hieng hin a tih:

¹⁰ Hi rama hin in chêng zing chun, ṭhiek lovin tungding ka ti cheu a, phâwi lovin phun ka ti cheu; in chunga sietna kan tlungtir hi pawi ka ti si a.

¹¹ In iṭitak Babulon lal chu ṭi naw unla, ama chu ṭi naw ro, Lalpa chun a tih: a kuta inthawka sanhima sandam ding cheuin kei in kuomah ka um zing si a.

¹² Chun, zângaina phalpêk ka ti cheu a, in chungah zângaina a neia, in ram ngeiah ân kîrtir nâwkna ding cheuin.

¹³ Amiruokchu, ‘Hi rama hin um zing nâwng ei tiu,’ in ti a, in Pathien Lalpa râwl chu in awi naw a,

¹⁴ ‘Ni lo, Aigupta ramah fe lem ei ta, chutaka chun indona hlak hmu nâwng ei ta, tawtawrâwt ri hlak hre nâwng ei ta, bei tlâksam hlak hre bawk nâwng ei ta, chutaka chun chêng ei tiu,’ ti in ni chun;

¹⁵ Aw Juda la um sunhai, tuhin Lalpa thu chu lo ngai ta u; sipaihai Lalpa, Israel Pathien chun hieng hin a tih: Aigupta rama lût dinga in hmaihai in innghat chie a, chutaka va mikhuol dinga in fe chun;

¹⁶ hieng hi hung nîng a tih: chu Aigupta rama chun kâwlhnâm in ṭi hlak khan hung hnawt phâk a ti cheu a, ṭâm in iṭi khan chu Aigupta rama chun a hung hnawt rak rak ding cheu a nih; chuongchun, chutaka chun thîng in tih.

¹⁷ Va mikhuol dinga Aiguptaa fe dinga an hmaihai innghat chie chuong mihai po po chu chuong ang chu nîng an tih; kâwlhnâmah thîng an ta; ṭâm le hripuia leh; an chunga thil ṭha naw ka hung intlungtir dinga inthawk chun tukhawm suokthlengin amanih, tukhawm um zing naw ni hai.

¹⁸ Sipaihai Lalpa Israel Pathien chun hieng hin a ti si a: Jerusalem hluotuhai chunga ka lunginsenna le ka ṭiumna bunthlâka a um ang khan; Aigupta rama in lût pha chun ka ṭiumna chu in chunga chun bunthlâk ni vêng a tih; chuongchun, hnâwmhnawk le, makti ding le, ṭawngsephur le, thusekawk nîng in ta, hi hmun hi hmu nâwk ta ngai naw ti niu.

¹⁹ Aw Juda la um sunhai, nangni chungthuah Lalpa chun thu a hril a nih: Aiguptaa chu fe dêr naw ro: vawisûn hin in kuomah ka hrilfie ta a nih ti hi hre ngei ngei ro.

²⁰ In thlarauhai chunga chun hmusitumtakin in lo thaw ta a; ‘Lalpa kan Pathien kuoma chun mi ṭawngṭaipêk la, Lalpa kan Pathienin a hril ang ang che chu kan kuomah hrilfie la, thâwng kan tih,’ tiin Lalpa in Pathien kuoma chun in mi tir ta si a,

²¹ vawisûn hin in kuomah ka hrilfie ta a, nisienlakhawm, in kuoma a mi hung tirna ang thil ienga khawm chun Lalpa in Pathien râwl chu in awi si naw a.

²² Chuleiin, tuhin, chutaka va mikhuol in nuomna hmuna chun, kâwlhnâm le, ṭâm le hripuiin thîng in tih ti hi hre ngei ngei ro,” tiin.