JEREMIA 4 - Pathien Lekhabu Inthieng (BSI)

¹ “Aw Israel, i hung kîr chun, Lalpa Pathien chun a tih: ka kuomah i hung kîr ding a nih; i tirdakumnahai chu ka mithmua inthawka i sie hmang chun nang chu sukchângin um naw ti nih;

² chuongchun, nang chun, ‘Lalpa chu a hring zing angin, thudikah, rorêlnaah, felnaah, hnamhai chu amaa chun engthâwl an ta, amaa chun chawimawiin um an tih,’ tiin ṭawng inkhâm i ta.”

³ Jerusalema le Juda rama mihai kuoma chun, Lalpa chun hieng hin a ti si a: In hnuoi inlet lo chu suknawi unla, hling lai chun chi thlâk naw ro.

⁴ Lalpa kuoma chun ser intan unla, in lungril ser chu tan ro, nangni Jerusalema mihai le, Juda rama mihai; chuong naw chun ka lunginsenna chu mei angin fe suok a ta, i thilthawhai rîtlona lei chun; tukhawm iṭhel ruol lovin kâng a tih.

Juda rûn dinga inṭhiin a um

⁵ Juda rama chun hrilfie unla, Jerusalema chun puong ro, “Rama chun tawtawrâwt chu mût unla, khêk inring unla, hieng hin ti ro: Hung inkhâwm tâwl unla, khawpui kulneiahai chun fêng ei tiu,” tiin.

⁶ Zion tienga chun puonzâr chu khai unla, himna dingin tlânhmang unla, muong naw ro; hmar tienga inthawkin thil ṭha naw sietna nasatak chu ka hung intlungtir ding a ni si a.

⁷ Sakeibaknei chu a chîmbuka inthawk chun a hung suok ta a, hnamhai sukbohmangtu ding chu; a lampuia chun a thang mêk a, a hmuna inthawk chun a suok ta a, i ram chu râusana siem ding le, i khawpuihai khawm hluotuhai um lova sukse dingin.

⁸ Hi hi lei hin saiip puon dierkei unla, sûn unla, ṭap inrûm ro; Lalpa lunginsenna ṭium chu einia inthawkin a hnungkîr si naw a.

⁹ Chuong nia chun Lalpa chun a tih: Lal lungril chu bohmang a ta, rorêltuhai le thiempuhai lungril chun maktîng a tih; zâwlneihai khawma maktîng an tih.

¹⁰ Chun, kei chun, “E, Lalpa Pathien! Hi hnam le Jerusalem hi i lo hlêm let dêr a ni hi, ‘Muongna nei in tih,’ tiin i lo hril a, kâwlhnâm hlak chun hringna ngei a sun ta lem si hi,” ka ti a.

¹¹ Chu huna chun chu hnam le Jerusalem kuoma chun, “Thlalêra bâwlhmunhaia inthawkin ka mihai naunuhai tienga chun thli lum tak, mûtdeina ding ni si lo, sukfai ding khawm ni lo;

¹² thli hrâttak hienga inthawk hin ka kuomah hung a tih; tuta an chungthu rêla hriltu khawm hi kei ka nih,” ti nîng a tih.

¹³ Ngai ta, ama chu sûmhai angin a tungin hung a ta, a sakawr tawlailîrhai chu thlivir ang nîng an tih, a sakawrhai khawm chu mupuihai nêkin an hrât lem a nih. Ei chung a va rik de! suksietin ei um si a.

¹⁴ Aw Jerusalem, sandama i um theina dingin i khawhlonaa inthawk chun i lungril chu sâwpfai rawh. I ngaituona rilohai hi ieng chen am i lungrila chun a châm ding a na?

¹⁵ Dana inthawk chun râwl chun a hung hrilfie a, Ephraim muolhaia inthawk chun thil suol a hung puongdar a;

¹⁶ hnamhai kuoma chun hrilna nei rawh; ngai ta, Jerusalem chunga chun phuong la, vêngtuhai chu ram hlataka inthawkin an hung a, Juda khawpuihai chu demin an râwlhai an insuo a nih.

¹⁷ Lo vêngtuhai ang elin, a vêlin an umngha a; keia chungah a lo hel ta leiin, Lalpa chun a tih.

¹⁸ I thilthawhai le i lampui chun hieng thilhai hi ân neitir che a ni hi; hi hi i khawhlona chu a nih: khâk khawm a kha si a; i lung chen a tlung ta si a.

¹⁹ Ka phîng, ka phîng! ka lungah a na; ka lung chu a to ṭawk ṭawk naw tawp a; ka to ṭawk ṭawk thei nawh; indona inṭhi lâwkna tawtawrâwt ri chu, aw ka thla, i lo hriet ta leiin.

²⁰ Bohmangna chungah bohmangna a tlung a; ram pumpui chu suksiet a ni ta si a, chawmkhat kârin ka puon inhai chu suksiet an na, mitkhap kâr lovin ka puonzârhai khawm chu.

²¹ Ieng chen am puonzâr chu ka hmuin, tawtawrâwt ri chu ka hriet zing ding a na?

²² “Ka mihai an invêt a, an mi hriet si naw a; naupang invêttak ang, hrietthiemna hrim khawm an nei naw, thil ṭha naw thaw dingin an var a, thil ṭha thaw ding ruok chun hrietna an nei nawh.”

²³ Leihnuoi chu ka en leh, ngai ta, a ruok le a sie a na; vânhai khawm chun varna an nei naw a.

²⁴ Tlânghai chu ka en leh, ngai ta, an inthin a, muolhai po po khawm chu hnungtieng hmatieng an insâwi a.

²⁵ Ka hei en a, chun, ngai ta, mihriem hrim hrim an um naw a, chunglêng vatehai khawm chu an tlân hmang ta a.

²⁶ Ka hei en a, ngai ta, ram rahlâwktakhai khawm chu thlalêr a lo ni ta a, chutaka khawpuihai po po chu Lalpa hmaihmaa le, a lunginsenna ṭiumtak hmaa chun a lo chim tâwl ta a.

²⁷ Lalpa chun hieng hin a ti si a, “Ram pumpui chu râusan nîng a ta, a tâwp ruok chu intlungtir naw ning.

²⁸ Hi hi lei hin leihnuoi chun sûn a ta, chun, chunga vânhai inthim a tih; ka hril ta leiin, ka tum tlat ta a; kân sîr bawk naw a; chutaka inthawk lamlêt bawk naw ning.”

²⁹ Khawpui sûng po po chu sakawr chung chuong mihai le, thal kâp mihai ria chun an tlânsie a; chîmbukahai chun an fe a, râwlkhohaia chun an lâwn a; khawpui tinhai chu mâksanin a um a, mi hrim an chêng ta naw a.

³⁰ Chun, nang suksieta um, ieng am thâwng i ta? Sen inlârin inthuom la khawm, rângkachak thuomhnawhaiin inchei la khawm, i mithai khawm chu rawnga nâlin suklien la khawm; nang le nang în sukhmêlṭha thlâwn el nîng a tih; i hmangaihai chun an hnâwl che a, i hringna lâk an tum a nih.

³¹ Nuhmei pakhat nauhase nat tuor, a nau lutîr hung suok dinga a na tuor râwl ang chu ka hriet si a, Zion naunu, thuok insama, a kuthai phara, “Tuhin ka chung a rik de! tuolthattuhai hmaa chun ka thla chu a thidang si a,” titu râwl chu a nih.