JEREMIA 39 - Pathien Lekhabu Inthieng (BSI)

Jerusalem tlûkna

¹ Juda ram lal Zedekia inlal kum kuona, thla sâwmnaa chun Babulon lal Nebukadnezzar chu a sipaihai po po leh Jerusalemah a hung a, a hung rûn ta a;

² chun, Zedekia inlal kum sâwmpakhatna, thla lina, chu thla ni kuo ni chun chu khawpuia chun suksietna chu a um ta a.

³ Jerusalem lâk a ni ni chun, Babulon lal rorêltuhai po po chu an hung lût a, dai kawtkhâr lailung, Nergalsarezera dâm, Samgarneboa dâm, Sarsekima dâm, Rabsarisa dâm, Rabmaga dâm, Babulon lal rorêltu dang po pohai le chun an ṭhung tâwl a.

⁴ Chun, Juda ram lal Zedekia le indo mihai po po chun chu chu an hmu chun an tlânsie a, kul pahni inkâra dai kawtkhârah, lal huon lampuia chun a zân a zân chun an tlânsuok ta a; chuongchun, ama chu Araba lampuia khan a fe a.

⁵ Nisienlakhawm, Kaldai sipaihai chun anni chu an hnawt a, Zedekia chu Jeriko phairuoma chun an hnawt phâk a, chun, ama chu an man chun, Hamath rama Riblaa Babulon lal Nebukadnezzar kuomah an hung ṭhuoi a, ama chun a chungah ro a rêlthlûk a.

⁶ Riblaa chun a mithmu ngeiah Nebukadnezzar chun Zedekia naupasalhai chu a that a; chun, Babulon lal chun Juda mi ṭhahai po po khawm chu a that bawk a.

⁷ Chu nawa khawm chun, Zedekia mithai chu a kheldawk a, thîrkawl ân buntir a, Babulona ṭhuoi dingin.

⁸ Chun, Kaldaihai chun lal in le mihai inhai chu meiin an raw a, Jerusalem kulbanghai chu an sukchim ta a.

⁹ Chun, Nebuzaradan, vêngtu pâwl hotu chun khawpuia mi la um sunhai le, tlân hmangtuhai le, ama kuoma hung lûthai le, mipui a la mahla la um sunhai po chu Babulon tieng chun salah a ṭhuoi ta a.

¹⁰ Nisienlakhawm, Nebuzaradan, vêngtu pâwl hotu chun mi rimsihai iengkhawm nei lohai chu Juda rama chun a mâksan a, grêp huonhai le lohai anni chu a pêk nghâl tâwl bawk a.

Nebukadnezzarin Jeremia a ngaisakzie

¹¹ Babulon lal Nebukadnezzar chun Jeremia chu Nebuzaradan, vêngtu pâwl hotu, kuoma chun enkawl dingin a pêk a,

¹² “Ṭhuoi la, ama hi ṭhatakin enkawl la, sukpawi naw rawh; amiruokchu, i kuoma a hril ang ang chun thawpêk lem rawh,” a ta.

¹³ Chuongchun, Nebuzaradan, vêngtu pâwl hotu le Nebusazban, Rabsaris, Nergalsarezer, Rabmag le Babulon lal rorêltuhai po po chun,

¹⁴ mi an tir a, Jeremia chu vêngtuhai kulbînga inthawk chun an ṭhuoi suok a, Saphan naupa Ahikam, chu naupa Gedalia kuoma chun an pêk a, in tienga ṭhuoi dingin; chuongchun, mipuihai laia chun a um ve ta a.

Ebed-melek sansuoka a um ding thu hril a nih

¹⁵ Chun, Lalpa thu chu Jeremia kuomah a hung tlung a, vêngtuhai kulbînga khum a ni lai khan,

¹⁶ “Fe la, Ethiopia mi Ebedmelek kuoma khan hieng hin va hril rawh, Sipaihai Lalpa, Israel Pathien chun hieng hin a tih: Ngai ta, thil ṭha tiengah ni lovin, thil ṭha naw tiengah hi khawpui chunga hin ka thuhai chu ka hung intlungtir ding a nih; chun, chu nia chun nanga hmaa chun sukkim nîng an tih.

¹⁷ Nisienlakhawm, nang chu, chu ni chun sansuok ka ti che a, mi iṭihai kuta chun pêk ni naw ti ni, Lalpa chun a tih.

¹⁸ Sandam ngei ngei ka ti che a, kâwlhnâmah i tlu naw ding a ni si a; amiruokchu, i hringna chu nangma ta dinga sanhim nîng a tih; i ringna chu keimaa hin i sie leiin, Lalpa chun a tih,” tiin.