JEREMIA 38 - Pathien Lekhabu Inthieng (BSI)

Khur thima inthawkin Jeremia insuoin a um

¹ Chun, Mattan naupa Sephatia le, Pashur naupa Gedalia le, Selemia naupa Jukal le, Malkija naupa Pashur chun mipuihai po po kuoma Jeremiain hienga a hril hi an lo hriet a,

² “Lalpa chun hieng hin a tih: Khawpui sûnga umhai chu kâwlhnâm le ṭâm le, hripuiin thîng an ta; Kaldaihai kuoma va fe chu hring an tih; a hringna chu insanhim a ta, hring a tih,

³ Lalpa chun hieng hin a tih: Hi khawpui hi Babulon lal sipaihai kuta pêk ngei ding a na, ama chun lâng a tih,” tiin.

⁴ Chun, rorêltuhai chun lal kuoma chun, “Kan hni che hi, hi mipa hi sukhlum ni ngei raw se; chuong thuhai chu an kuoma hrilin, mipui po pohai kuthai, hi khawpuia indomi umhai kuthai chu a sukzuoi a nih; hi mipa hin hi hnam ṭhatna ding hi a zawng naw a, sietna ding a zawng lem a nih”, an ta.

⁵ Chun, lal Zedekia chun, “Ngai ta u, in kuta um a nih annâwm; lal chu nangni kal zâwnga thil thaw thei mi ding a ni si naw a,” a ta.

⁶ Chuongchun, Jeremia chu an man a, lal naupa Malkija khurthim, vêngtuhai kul sûnga uma chun an sie lût ta a; chuongchun, Jeremia chu khuopnahai le chun an infe thlâktir ta a. Chun, chu khurthim sûnga chun chirhak ti chau naw chu tui khawm a um naw a, chuongchun, Jeremia chu chirhaka chun ân chie ta a.

⁷ Chun, Ethiopia mi, Ebed-melek, mi tillâk, lal ina um chun Jeremia chu khurthim sûnga chun an sie ti a hriet chun chu lai chun lal chu Benjamin dai kawtkhâra khan a ṭhung a.

⁸ Ebed-melek chu lal ina inthawk chun a suok a, lal kuoma chun thu a hang hril ta a:

⁹ “Ka lalpa, lal, hieng mihai hin zâwlnei Jeremia chunga an thilthawhai po poa hin thil ṭhanaw an thaw a nih, ama chu khurthima chun an peilût a; chutaka chun ama chu phîngṭâma thi el âwm a nih; khawpui sûnga hin bei dang hrim a um ta naw leiin,” a ta.

¹⁰ Chun, lal chun Ethiopia mi Ebed-melek chu thu a pêk a, “Hitaka inthawkin mi pathum ṭhuoi la, zâwlnei Jeremia chu a thi hmain khurthima inthawk chu va la suok ro,” a ta.

¹¹ Chuongchun, Ebed-melek chun mihai chu a ṭhuoi a, lal ina ro ina chun a va fe a, chutaka inthawk chun sahmul puon ṭawphai le, savun puon hluihai chu a lâk a, hruiin Jeremia kuomah khurthim a chun ân khaithlâktir ta a.

¹² Chun, Ethiopia mi Ebed-melek chun Jeremia kuoma chun, “Tuhin hieng sahmul puon ṭawphai le, savun puon hluihai hi i zakhnuoiah hruihruolhai hnuoia khan sil rawh,” a ta. Jeremia chun chuong ang tak chun a thaw a.

¹³ Chuongchun, Jeremia chu hruihruol chun ân khai a, khurthima inthawk chun an lâk suok ta a; chun, Jeremia chu vêngtuhai kulbînga chun a um zing a.

Zedekiain Jeremia a râwn

¹⁴ Chun, lal Zedekia chun mi a tir a, Lalpa ina um lûtna pathumnaa khan a kuomah zâwlnei Jeremia chu a ṭhuoi ta a; chun, lal chun Jeremia kuoma chun, “Thil pakhat indawn ka ti che a, ka kuomah iengkhawm ip naw rawh,” a ta.

¹⁵ Jeremia chun Zedekia kuoma chun, “Ka hrilfie chun i mi that ngei naw ding am a nih? thurâwn pe lang che khawm nang chun mi ngai bawk naw ti ni,” a ta.

¹⁶ Chuongchun, lal Zedekia chun inrûkin Jeremia kuoma chun ân tiemkam ta a, “Lalpa ei hringnahai siemtu chu a hring zing angin, sukhlum naw ning che a, hieng i hringna zawngtuhai kuoma hin pe bawk naw ning che,” a ta.

¹⁷ Chun, Jeremia chun Zedekia kuoma chun, “Sipaihai Pathien, Israel Pathien Lalpa chun hieng hin a tih; Babulon lal rorêltuhai kuomah în pêk chun, i hringna chu hlain um a ta, hi khawpui khawm hi meiin kâng naw ni; nang chu hring i ta, i sûnghai leh;

¹⁸ amiruokchu, Babulon lal rorêltuhai kuomah în pêk naw chun hi khawpui hi Kaldaihai kuta chun pêk nîng a ta, meiin râwng an ta, an kuta inthawk chun nang khawm suokthleng naw ti ni,” a ta.

¹⁹ Chun, lal Zedekia chun, Jeremia kuoma chun “Juda mihai Kaldaihai tienga va kawp tahai kha ka ṭi a nih; an kuta khan mi pe hlau an ta, mi nuisan rawi an tih,” a ta.

²⁰ Nisienlakhawm, Jeremia chun, “Nang chu pe suok naw ni hai che. Lalpa râwl i kuoma thu ka hrilna hi awi el rawh, ka ngên che hi, chuongchun, i ta dingin ṭhâng a ta, i hringna khawm hlain um a tih.

²¹ Amiruokchu, vân pêk chu i nuom naw chun, hi hi a nih Lalpain thu a mîn entir chu.

²² Ngai ta, Juda ram lal ina nuhmei mâksana umhai po po kha Babulon lal rorêltuhai kuoma hung ṭhuoi suok nîng an ta; chuong nuhmeihai chun, ‘I ruol hmêlhriettakhai chun an hlêm che a, an hne ta che a ni hi; tuhin i kehai chu chirhaka chun a tluma, an hnungkîr nâwk a ni ta hi,’ tîng an ta.

²³ Chun, i nauhai le i nuhmeihai po po chu Kaldaihai kuoma chun hung la suok an ta, nang khawm an kuta inthawk chun suokthleng naw ti ni: amiruokchu, Babulona lal kuta man nîng i ta; hi khawpui hi meia raw dingin siem i tih,” a ta.

²⁴ Chun, Zedekia chun Jeremia kuomah, “Hieng thuhai hi tukhawm inhriettir naw la, thi naw ti ni.

²⁵ Nisienlakhawm, rorêltuhai chun kân biekpui che ti an hrieta, i kuomah an hunga, i kuomah, ‘Lal kuoma i thu hril kha mi hrilfie rawh, kan kuomah ip naw la, sukhlum naw ning ung che; chun, ieng am lal chun i kuomah a hril a an ti chun,’

²⁶ an kuoma chun, ‘Jonathan ina thi el dinga min kîrtir nâwk lo dingin, lal chu ka hnina ka pêk a nih’, tîng i ta,” tiin.

²⁷ Chuongchun, rorêltuhai po po chu Jeremia kuoma chun an hung a, an indwn ta ngei a, ama chun lalin thu a pêk ang tak pei chun a hril ta a. Chuongchun, ama le inbiek chu an ma a, a thu tak chu hril a ni si naw a.

²⁸ Chuongchun, Jeremia chu vêngtuhai kulbînga chun Jerusalem chu lâka a um ni chen chun a um ta a.