JEREMIA 35 - Pathien Lekhabu Inthieng (BSI)

Rekab mihai thuawina

¹ Juda ram lal Josia naupa Jehoiakim hun laia Lalpa kuoma inthawka Jeremia kuoma thu hung tlung chun hieng hin a tih:

² “Rekab mihai ina chun va fe la, an kuomah thu va hril la, Lalpa ina pindan pakhata hin anni chu hung ṭhuoi la, an kuomah uoin dâwn ding pe rawh,” tiin.

³ Chun, Habazzinia naupa, Jeremia naupa Jaazania le a unauhai le a naupasalhai po po le, Rekab sûngkuohai po po chu ka ṭhuoi a;

⁴ Pathien mi Igdalia naupa Hanan naupasalhai pindan, kawtkhâr vêngtu Sallum naupa Maaseia pindan chunga um, rorêltuhai pindan sîra um Lalpa ina chun anni chu ka hung ṭhuoi a;

⁵ chun, Rekab sûngkaw naupasalhai hmaa chun maihûn uoina sip le nohai ka sie a, an kuoma chun, “Uoin hi dâwn ro,” ka ti a.

⁶ Nisienlakhawm, anni chun an dawn a, “Uoin chu dâwn naw ning ungah; kan thlatu Rekab unaupa Jonadab chun hieng hin thu a mi pêk si a: ‘Kumkhuoin nangniin amanih, in naupasalhai khawmin amanih uoin hi dâwn ngai naw ti niu a;

⁷ in khawm bâwl ngai naw ti niu a, thlai chi khawm thlâk nâwng in ta, grêp huon khawm chîngin amanih, nei khawm nei bawk naw ti niu; nisienlakhawm, in nihai po po chu puon inah chêng in ta, in inpêmna rama chun ni tamtak in um theina dingin,’ tiin.

⁸ Chuongchun, kan thlatu Rekab naupa Jonadab râwl chu, kan dam sûng po poa, keini le kan nuhmeihai le kan naupasalhai le, kan naunuhmeihai le, uoin dâwn lo dinga a mi tiem chu kan awi a;

⁹ kan chêngna dinga inhai bâwl lo bawk ding dâmin, thlai chi dâm, lohai dâm, grêp huonhai dâm khawm kan nei bawk naw a;

¹⁰ puon inahai chun kan chêng a, kan thlatu Jonadabin thu a mi pêk ang taphawt chun kan zâwm a nih.

¹¹ Amiruokchu, Babulon lal Nebukadnezzar chu hi rama hin a hung lai khan, ‘Thaw ro, Kaldai sipaihai ṭi lei le, Suria sipaihai ṭi leiin, Jerusalemah hang fêng ei tiu,’ kan ti a; chuongchun, Jerusalema chun kan hang chêng ta a,” tiin.

¹² Chun, Lalpa thu chu Jeremia kuoma chun a hung tlung ta a:

¹³ “Sipaihai Lalpa Israel Pathien chun hieng hin a tih: Fe la, Juda ram mihai le Jerusalem hluotuhai kuoma chun hi hi va hril rawh: ‘Ka thuhai chu ngai dingin, inchûktirna chu in pawm naw ding am a nih?’ Lalpa chun a tih.

¹⁴ Uoin dâwn lo dinga thu a naupasalhai a ipêk, Rekab naupa Jonadab thupêkhai chu sukpuitlingin a um a, vawisûn ni chen hin an dâwn naw a, an thlatu thupêk chu an pawm leiin: amiruokchu, zîngkâra thoa thuhrilin, in kuoma chun thu ka hrila chu in ngai si naw a.

¹⁵ Chun, zîngkâra thoa anni hung tirin, ‘Mi tin chu mâni lampui suola inthawk chun hung kîr unla, in thilthawhai chu siemṭha unla, pathien danghai chu an rawng bâwl dingin zui bawk naw ro, chuongchun, nangni le in thlatuhai kuoma ram ka ipêk cheua hin chêng in tih,’ tiin, ka siehlaw zâwlneihai po po chu in kuomah ka hung tir a; nisienlakhawm, in nâ khawm in sit naw a, ngai khawm in mi ngai naw kha.

¹⁶ Rekab naupa Jonadab naupasalhaiin an pain thu a pêk an thaw vei leh, hi mihai hlak hin an mi ngai si naw a;

¹⁷ chuleiin, Lalpa, Sipaihai Pathien, Israel Pathien chun hieng hin a tih: Ngai ta u, Juda ram chunga le Jerusalem hluotuhai po po chunga chun, an chunga thil ṭha naw tlung ding ka hril ta kha ka hung intlungtir ding a nih; an kuomah thu ka hril a, an ngai naw leiin, anni chu ka ko a, an mi dawn naw leiin,” tiin.

¹⁸ Chun, Jeremia chun Rekab sûngkuohai kuoma chun a hril a, “Sipaihai Lalpa, Israel Pathien chun hieng hin a tih: In thlatu Jonadab thupêk chu in awi a, a dânhai po po chu in pawm a, a thupêk ang tak cheua in thaw leiin;

¹⁹ sipaihai Lalpa, Israel Pathien chun hieng hin a tih: Rekab naupa Jonadab hin kumkhuoin ka hmaa ngîr ding mi tlasam ngai naw ni,” tiin.