JEREMIA 34 - Pathien Lekhabu Inthieng (BSI)

Jeremiain Zedekia a zillâwkna

¹ Babulon lal Nebukadnezzar le a sipaihai po po le, a ram sûnga hnuoi chunga lalram po pohai le mi po poin Jerusalem le a khawpuihai po po an do laia Lalpa kuoma inthawka Jeremia kuoma thu hung tlung chu:

² Lalpa Israel Pathien chun hieng hin a tih: Fe la, Juda lal Zedekia kuoma chun thu hril la, ama chu hieng hin hril rawh: Lalpa chun hieng hin a tih: Ngai ta, hi khawpui hi Babulon lal kutah ka pêk ding a na, ama chun meiin râwng a ta;

³ nang khawm a kuta inthawk chun suok naw ti ni a, ṭhuoi ni ngei ngei i ta, a kuta pêk i ni ding a nih: Babulon lal mithai chu nanga mithai ngei chun hmûng a ta, ama chun bau inphâkin i kuomah thu hril a tih; chun, nang chu Babulonah fe bawk i tih.

⁴ Amiruokchu, Juda lal Aw Zedekia, Lalpa thu chu lo ngai ta; i chungthua chun Lalpa chun hieng hin a tih: Kâwlhnâm chun thi naw ti ni a;

⁵ thlamuongtakin thîng i tih; thlatuhai, i hmaa lal hmasa lo um tahai riminhnik an rawpêk ang khan, nangma ta ding khawma riminhnik râwng an ta, “Aw lalpa!” tiin ṭâng an ti che; hi thu hi ka lo hril ta si a, Lalpa chun a tih.

⁶ Chun, Jeremia chun Juda ram lal Zedekia kuoma chun hieng thuhai hi Jerusalema chun a hril a;

⁷ chuong lai chun Babulon lal sipaihai chun Jerusalem dâm, Juda rama khawpui mâksana la umhai po po dâm, Lakis le Azeka dâm chu an hung rûn mêk a; hieng khawpuihai chau hi Juda rama chun khawpui kul neia um sun chu an ta si a.

Hebrai suokhai chungthua thuthlung bawsieta a um thu

⁸ Lal Zedekiain Jerusalema mipuihai po po kuoma, an kuoma zalênna thu phuong dinga thuthlung a siem hnunga Jeremia kuoma Lalpa thu hung tlung chu:

⁹ “Mi tin chun a siehlawpa amanih, a siehlawnu amanih, Hebraipa amanih, Hebrainu amanih a ni chun, zalênin insuoktir a ta; a unau Juda chanpui rawngbâwlpêkin tukhawm a um ding a ni nawh”, tiin;

¹⁰ chun, mipui po po le rorêltuhai po po chun an remti a; thuthlung chu an awi ta a, chuongchun, mi tin chun mâni siehlawpa amanih, mi tin chun mâni siehlawnu amani chu zalênin insuoktir a ta, tukhawma ama rawng chu bâwlpêk ni ta naw ni; chu chu an awi a, an infetir tâwl ta a:

¹¹ nisienlakhawm, chu hnunga chun an lamlêt a, siehlawpahai le siehlawnuhai chu zalêna an lo insuoktir tahai chu kîr dingin an ti nâwk a, siehlawpahai ding le siehlawnuhai ni dingin thununna hnuoiah an lâk lût nâwk ta a;

¹² chuleiin, Lalpa thu chu Lalpa kuoma inthawk chun Jeremia kuoma chun a hung tlung a;

¹³ “Lalpa Israel Pathien chun hieng hin a tih: Intângna ina inthawk, Aigupta rama inthawka anni ka ṭhuoi suok lai chun in thlatuhai kuoma chun hienga hril hin thuthlung ka lo siem ta a:

¹⁴ ‘Mi tinin a unaupa Hebrai mi nia, ama kuoma zawra lo um amanih, ama chu kum ruk sûng rawng lo bâwlpêk ta chu, kum sari tâwpa chun infetir in ta, nangmaa inthawk chun a thlâwnin în fetir ding a nih,’ tiin, nisienlakhawm, in thlatuhai chun an mi ngai naw a, an na khawm an sit nawh.

¹⁵ Chun, tu el khawm in hung lamlêt a, mi tinin mâni tuolbâwm ta dinga zalênna puongin, ka mithmuah thilindik chu in thaw ta a; chun, ka hming chawia ko ina chun ka hmaah thuthlung khawm chu in lo siem ta bawk a.

¹⁶ Amiruokchu, in inher a, ka hming chu in sukpawrche ta a; mi tin chun a siehlawpa le a siehlawnu, an nuom anga zalêna in infetir tahai chu in inkîrtir nâwk ta a; thununna hnuoia chun in lâklût nâwk a, in ta dinga siehlawpahai le siehlawnuhai ni dingin.

¹⁷ Chuleiin, Lalpa chun hieng hin a tih: Mi tinin mâni unaupa chunga le, mi tinin mâni tuolbâwm chunga zalênna puong dingin ka thu in ngai naw a nih; ngai ta u, kâwlhnâm kuoma le, ṭâm kuoma le hripui kuoma chun in ta dingin zalênna chu ka puong a nih, Lalpa chun a tih: chuongchun, leihnuoia lalram po pohai laia hnungtieng hmatienga hnawt lêng dingin ka siem ding cheu a nih.

¹⁸ Chun, ka thuthlung bawsetu mihai, bâwngtê chu tum hnia chana a kâra fethleng ka hmaa an thuthlung thuhai thaw si lohai chu pêng ka ta;

¹⁹ Juda ram lalhai, Jerusalema rorêltuhai, mi tillâkhai, thiempuhai le, rama mi po po chu bâwngtê tum hni inkâra lût thleng tahai chu;

²⁰ anni khawm chu an hringna zawngtuhai le, an hmêlmahai kuta chun pêng ka tih; chuongchun, an taksa thihai khawm chu hnuoia ramsahai le chunglêng vatehai ta dinga bu nîng a tih.

²¹ Chun, Juda ram lal Zedekia le a rorêltuhai khawm chu an hmêlmahai kuta le, an hringna zawngtuhai kuta le, nangnia inthawka hang fe, Babulon lal sipaihai kuta chun pêng ka tih.

²² Ngai ta u, thu pêng ka ta, hi khawpuia hin hung inkîrtir ka tih; Lalpa chun a tih: chun, do an ta, lâng an ta, meiin râwng an tih; chuongchun, Juda khawpuihai chu hluotu um lova râusanah siem ka tih,” tiin.