JEREMIA 33 - Pathien Lekhabu Inthieng (BSI)

Jerusalem tungding nâwkna ding thu

¹ Chu nawa khawm vêngtu kulbînga khârkhum a ni sûng chun a vawi hninaah Jeremia kuoma chun Lalpa thu chu a hung tlung a:

² “Lalpa a thawtu, indin dinga Lalpa a siemtu chun hieng hin a tih: Lalpa ti chu a hming a nih:

³ Kei mi hung ko la, lo dawn ka ti che a, thil ropui le inthup i hriet naw hai chu inentir ka ti che.

⁴ Hi khawpui inhai chungthua le Juda ram lalhai in kâwlhnâm le hnuoi dêng pâwng lama inthawka dangna siemna dinga sukchima umhai chungthua chun Israel Pathien Lalpa chun hieng hin a tih:

⁵ Kaldaihai chu do dingin an hung a, ka lunginthaknaa le ka lunginsennaa ka that ding mi ruonghaia suksip dingin, an suolnahai po po leiin hi khawpuia inthawk ka hmai ka thup ta si a.

⁶ Ngai ta u, hrisêlna le sukdamna intlungtir ka ta, anni chu sukdam ka tih; chun, an kuoma chun thudik le thlamuongna tamtak chu suklang bawk ka tih.

⁷ Juda sal intângna le Israel sal intângna chu inlamlêttir ka ta, a tîra ang khan anni chu rem ka tih.

⁸ An suolna po po, ka chunga an lo suksuolnahaia inthawk khan anni chu sukthieng ka ta, an bawsietnahai po po chu ngaidam ka ta, ka chunga an lo suksuolnahai le, ka chunga an lo bawsietnahai chu.

⁹ Chun, hnuoi chunga hnam po pohai, an chunga thil ṭha ka thaw po po hretuhai le, thil ṭha po po le thlamuongna po po a ta dinga kân neitir hretuhai ṭiin inthin an tih; ka ta dingin hi khawpui hi hlimna hming le, inpâkna ding le ropuina ding hung nîng a tih.

¹⁰ “Lalpa chun hieng hin a tih: ‘Sa le mihriem khawm um lovin a sie a,’ in ti, hi hmuna le, Juda ram khawpuihaia le, hluotu um lova, ran khawm um lova râusan Jerusalem kawtthlêrahai chun hieng hi hriet la nîng a tih:

¹¹ hlimna râwl dâm, lâwmna râwl dâm, moneitu râwl dâm, mo le, ‘Sipaihai Lalpa kuoma chun lâwmthu hril ro, Lalpa chu a ṭha si a; a zainêmna chu kumkhuoin um zing a tih,’ tituhai râwl le, Lalpa ina lâwmthu hrilna inthâwinahai hung chawituhai râwl ri chu. Hi ram sal intângna hi a tîr ang khan ka lamlêt ding a ni si a, Lalpa chun a tih.

¹² Sipaihai Lalpa chun hieng hin a tih: Chu nawa khawm, hi hmuna hin, mihriem le sa khawm um lova se ta le chutaka khawpuihaia po po chun, berâmpuhai an ran ruol chu inbawktirin la um an tih.

¹³ Tlângrama khawpuiahai le, phairuoma khawpuiahai le, Sima khawpuiahai le, Benjamin rama khawpuiahai le, Jerusalem vêl hmunhaia le, Juda khawpuiahai chun berâm ruolhai chu anni tiemtu kut hnuoiah la tla nâwk an tih, Lalpa chun a tih:

¹⁴ “Ngai ta u, nihai chu a hung tlung, Lalpa chun a tih: Juda sûngkuo chungthua le, Israel sûngkuo chungthua thil ṭha ka hril kha ka thaw ding a nih.

¹⁵ Chuong nihaia le, chu huna chun, David kuoma chun felna Kau hung indâwntir ka ta, rama chun rorêlna le felna chu tir suok a tih.

¹⁶ Chuong nihaia chun Juda chu sandam ni tâng a ta, Jerusalem khawm chu himtakin chêng tâng a tih: chun, ‘Lalpa chu ei felna a nih,’ ti hi koa a umna ding hming chu ni ta bawk a tih.

¹⁷ “Lalpa chun hieng hin a ti si a: Israel sûngkuo lalṭhungpha chunga ṭhung ding, David chun mi tlasam ngai naw ni;

¹⁸ thiempu Levi mihai chun ka hmaa pumrawhmang thilinhlânhai, bu thilinhlânhai, ieng huna khawm inthâwina inhlân dingin mi tlasam bawk naw ni hai,” tiin.

¹⁹ Chun, Lalpa thu chu Jeremia kuomah a hung tlung a,

²⁰ “Lalpa chun hieng hin a tih: sûn le zân an huntaka um lo dinga ka sûn thuthlung le ka zân thuthlung hi in suksiet thei a ni chun,

²¹ chuong ang bawk chun a lalṭhungphaa ṭhung ding naupasal nei lo dingin ka siehlaw David le ka thuthlung khawm hi suksiet thei nîng a tih; ka rawngbâwltuhai, thiempuhai le Levi mihai le thuthlunghai khawm chu.

²² Vâna umhai chu tiem sêng an ni naw a, tuisuoriet phaiphin chu inkhi ruol a ni naw ang bawkin; ka siehlaw David chithla chu sukpung ka ta, keia ta dinga rawngbâwltu Levi mihai le chun” tiin.

²³ Chun, Jeremia kuoma chun Lalpa thu chu a hung tlung a,

²⁴ “Hi mi, Hnam pahni Lalpa thlanghai chu, anni chu a pei thlâk tah, tituhai chu ngaituo naw rawh; chuongchun, anni hmaa hnam hrim an ni ta nawna dingin, anni chun ka mihai chu an hmusit a nih.

²⁵ Lalpa chun hieng hin a tih: Zân le sûn dinga ka thuthlung hi a um zing naw a, hnuoi le vâna thil ruota umhai chu ka sukdet naw chun,

²⁶ Abraham hai, Isak hai, Jakob hai thlahai chunga rorêltuhai ding ka lâk nawna dingin, ka siehlaw David le Jakob thla chu peihâwn vêng ka tih; an sal intângna chu kân kîrtir ding a na, an chunga chun zângaina ka nei ding a ni si a”tiin.