JEREMIA 32 - Pathien Lekhabu Inthieng (BSI)

Jeremiain Anathotha lo ân châwk

¹ Juda ram lal Zedekia inlal kum sâwmnaa Lalpa kuoma inthawka Jeremia kuoma thu hung tlung chu; chu kum chu Nebukadnezzar inlal kum sâwmpariet kum a nih.

² Chuongchun, chu huna chun Babulon lal sipaihai chun Jerusalem chu an inhuol a; chun, zâwlnei Jeremia khawm chu Juda ram lal ina vêngtu kulbînga chun khârkhumin a um a.

³ Juda ram lal Zedekia chun ama chu a khum a, “Ieng dinga hienga thu hi i hril am a na?, ‘Lalpa chun hieng hin a tih: Ngai ta u, hi khawpui hi Babulon lal kuta chun pêng ka ta, ama chun lâng a tih.

⁴ Juda ram lal Zedekia khawm chu Kaldaihai kuta inthawk chun suokthleng naw ni a; amiruokchu, Babulon lal kuta chun matheilovin pêk ni lem a tih, ama chu bau le bau inphâkin bieng a ta, a mithai chun ama mithai chu hmu bawk a tih;

⁵ chun, Zedekia chu Babulona chun ṭhuoi a ta, ka va sir hmakhat chun chutaka chun um zing a ta, Lalpa chun a tih: Kaldaihai chu do unla khawm, hlawtling naw ti niu,’ i ti a,” a ta.

⁶ Jeremia chun a hril a, “Lalpa thu chu ka kuomah a hung tlung a, hieng hin a hril,

⁷ Ngai ta, i pami Sallum naupa Hanamel chu i kuomah hung a ta, ‘Anathotha um ka lo inchaw rawh, inchaw dinga intlansuokna thuneina chu nangma ta a ni si a,’ tîng a ta.

⁸ Chuongchun, ka pami naupa Hanamel chu vêngtu kulbînga chun Lalpa thu ang pei chun ka kuomah a hung a, ka kuoma chun, ‘Ka ngên che, ka lo Anathotha um, Benjamin rama um chu inchaw rawh; rohluona thuneina chu nangma ta a ni si a, intlansuokna khawm chu nangma ta bawk a na, i ta dingin inchaw el rawh,’ a hung ti a.

⁹ Chun, kei chun chu chu Lalpa thu a nih ti ka hriet a. Chun, ka pami naupa Hanamel lo Anathotha um chu kân châwk ta a; tangka shekel sâwmpasari chu ama ka bûkpêk ta a.

¹⁰ Chun, thuziek chu suoi ka thaw a, ka nam ta a, chun, hrietpuitu ka ko a, ama chu bûkna chun tangka chu ka bûkpêk ta a.

¹¹ Chun, dân ang le hmangchâng ang peiin, inchâwkna thuziek chu ka lâk a, chu chu hawng a na;

¹² vêngtu kulbînga Juda ṭhanghai po po hmaa chun, inchâwkna thuzieka hrietpuitu mithmua chun, ka pami naupa Hanamel hmaihmaah, inchâwkna thuziek chu Maaseia naupa, Neria naupa Baruk kuoma chun ka pêk ta a.

¹³ An hmaa chun Baruk chu thu ka pêk ta a,

¹⁴ ‘Sipaihai Lalpa Israel Pathien chun hieng hin a tih: Hieng thuziekhai, inchâwkna thuziek, châra um le hawngsaa um hi la la, pil bêlah va sie rawh; ni sâwttak el an um theina dingin.

¹⁵ Sipaihai Lalpa, Israel Pathien chun hieng hin a ti si a: Inhai, lohai, grêp huonhai chu hi rama hin inchâwk la ni nâwk an ti a ti si a,’ ” tiin.

¹⁶ “Chun, Neria naupa Baruk kuoma inchâwkna thuziek chu ka pêk hnung chun Lalpa kuoma chun ka ṭawngṭai ta a.

¹⁷ ‘Aw Lalpa Pathien; i bân phar le i thilthawtheina ropuitak chun vân le hnuoi chu i siem a; nanga ta ding chun iengkhawm intak taluo a um naw a;

¹⁸ nang chun sâng kuoma zângaina inentira, pahai suolna chu an nauhai ângsûnga thungna petu, Pathien thilthawthei, ropui le, sipaihai Lalpa chu a hming a nih;

¹⁹ rorêlnaa ropui le, sinthawa thilthawthei tak, mihriem nauhai umdân po po hmu zing hlak; mi tin chu ama um dân le a thilthawhai ang peia pe dingin;

²⁰ ama chun vawisûn ni chen hin Aigupta rama chun inchiknahai le thilmakhai chu a thaw a, Israel rama le mi danghai kuoma khawm; vawisûn nia ang hin ama chun hming a siempêk che a.

²¹ Aigupta rama inthawkin i mi Israelhai chu inchiknahai dâm, thilmakhai dâm, kut hrât dâm le, bân phar dâm le ṭium nasatak leh i hung ṭhuoi suok a;

²² hi ram nênetui le khuoizua luong ram, an thlatuhai kuoma pêk dinga i lo tiem ta ram hi an kuoma chun i pêk ta a;

²³ chuongchun, an hung lût a, an nei a, nisienlakhawm, i râwl chu an awi naw a, i dân khawm chu an zâwm bawk naw a; anni chun thaw dinga thu i pêkhai a iengkhawm chu an thaw naw a; chuleiin, thil ṭha naw tinrêng chu an chunga chun în tlungtir a,

²⁴ en ta u, khawpui lâkna dingin hnuoi dêng pâwnghai an hung um ta hi, nangin hung tlung dinga i hril angin, hripui le, ṭâm le kâwlhnâm leiin, a hung dotu Kaldaihai kuta chun khawpui chu pêk a ni ta a; en ta, i hmu zing hi.

²⁵ Ka kuoma chun Aw Lalpa Pathien, “Lo chu tangkain inchaw la, hrepuituhai ko la, ” i ta, nisienlakhawm, khawpui chu Kaldaihai kuta pêk a ni ta si a,’ ” tiin.

²⁶ Chun, Lalpa thu chu Jeremia kuomah a hung tlung a,

²⁷ “Ngai ta, mi tinrêng Pathien, Lalpa chu ka nih, keia ta dingin thil intak taluo a um am a nih?

²⁸ Chuleiin, Lalpa chun hieng hin a tih: Ngai ta u, hi khawpui hi Kaldaihai kuta le Babulon lal Nebukadnezzar kuta chun pêng ka ta, ama chun lâng a tih;

²⁹ chun, hi khaw hung dotu Kaldaihai chu hung an ta, hi khuo hi meiin hung râwng an ta, a inhai a chunga Baal kuoma riminhnik an râwna le, kei mi suklungsenna dinga pathien danghai kuoma dâwn mi thilinhlânhai an lo bunthlâkna inhai le chun kâng a tih.

³⁰ An naupang laia inthawk tah Juda mihai le Israel mihai hin ka mithmuah thil suol chu an lo thaw hlak si a; Israel mihai chun an kut sinthawhai chun an mi lo suklungsen si a, Lalpa chun a tih.

³¹ Hi khawpui hi an bâwl ṭan nia inthawk vawisûn ni chen hin, keia ta ding chun ka ṭiumna le ka lunginsenna chawkthona chau a nih; chuongchun, ka hmaihmaa inthawkin ka sawn hmang ding a nih;

³² Juda mihai le Israel mihai suolna po po, mi suklungsenna ding ela, anni le an lalhai le an rorêltuhai le, an thiempuhai le, an zâwlneihai le, Juda rama mihai le Jerusalem hluotuhaiin an lo thaw tahai lei chun.

³³ Chun, kei chu hmatieng ni lovin, hnungtieng an mînnghat a, inhmataka thoa anni inchûktirin, anni chu ka lo inchûktira chu, inchûktirna chu hre dingin an ngai si naw a.

³⁴ Amiruokchu, an tirdakumna chu ka hming chawia sak in chu sukpawrche dingin an sieh a.

³⁵ Hinnom phairuoma um Baal bâwlhmunhai chu Molek kuoma an naupasalhai le an naunuhmeihai meia infethlengtirna dingin an bâwl a, Juda chu suol inthawtir dingin, hi tirdakumna dâm hi thâwng an tih ti ka lungrila khawm a lût ngainawh.

³⁶ “Chuleiin, tuhin, hi khawpui, ‘Hripui le, ṭâm le, kâwlhnâmah Babulon lal kuta pêk a ni tah,’ i ti chungthua hin Israel Pathien Lalpa chun hieng hin a tih:

³⁷ Ngai ta u, ka lunginsenna le ka ṭiumna le, ka lunginthaka anni ka hnawt hmangna ram po poa inthawk chun anni chu kei khâwm ka ta; hi hmuna hin hung ṭhuoi nâwk ka ta, himtakin inchêngtir ka tih;

³⁸ anni chu ka mihai nîng an ta, kei khawm an Pathien nîng ka tih;

³⁹ kumkhuoa an mi ṭi theina dingin anni chu lungril pakhat le lampui pakhat chau pêng ka tih; anni le an hnunga an thlahai ṭhatna dingin.

⁴⁰ Anni chu sukṭha dingin, annia inthawka kân her hmang nawna dingin, anni le chun kumkhaw thuthlung siem ka ta; chun, an lungrila chun keia ṭina sieng ka ta, keimaa inthawk chun fe hmang ta naw ni hai.

⁴¹ Anih, anni chu sukṭha dingin an chungah hlim tâng ka ta, hi rama hin ka lungril po po le, ka lungvar po poin thudikah anni chu phun ka tih.

⁴² Lalpa chun hieng hin a ti si a: Hi hnam chunga hieng thil ṭha naw nasatakhai po po kân tlungtir ang bawk hin, an chunga hin thil ṭha an kuoma ka tiem tahai po po chu hung intlungtir vêng ka tih.

⁴³ Chun, ‘Ramsahai le mihriem boin, râusan a ni ta a; Kaldaihai kuta pêk a ni tah,’ in ti, hi rama hin lohai chu inchâwk nîng a ta.

⁴⁴ Mihaiin lohai chu tangka sumin inchâwng an ta, thuziek chu ziek det an ta, châr an tih, hrietpuituhai ko an ta, Benjamin rama dâm, Jerusalem vêla hmunahai dâm, tlângram khawpuiahai dâm, phairuoma khawpuihaia dâm, Sima khawpuiahai dâm chun: an sal intângnaa inthawkin kân kîrtir ding a ni si a, Lalpa chun a tih” tiin.