JEREMIA 22 - Pathien Lekhabu Inthieng (BSI)

¹ Lalpa chun hieng hin a tih: Juda lal ina chun fe thla la, chutaka chun hi thu hi zu hril rawh:

² Aw nang Juda lal, David lalṭhungphaa ṭhung, nang le i siehlawhai le i mihai, hieng dai kawtkhârhaia lûthai hin Lalpa thu chu lo ngai ta u.

³ Lalpa chun hieng hin a tih: Felna le rorêlna chu tirsuok unla, nêksâwrtu kuta inthawk suksieta um chu sansuok ro; thil dik naw chu thaw naw unla, thawluina chu thaw naw unla, hmeithaihai le, mikhuolhai le pa neilohai chunga chun; hi hmuna hin mi thiem thisen chu insuo bawk naw ro.

⁴ Hieng thilhai hi in thaw ngei ngei chun, hi hi dai kawtkhârahai hin, David lalṭhungphaa ṭhung lalhai, sakawr tawlailîra le sakawr chunghaia chuong, ama le a siehlawhai le a mihai, lût um an tih.

⁵ Nisienlakhawm, hieng thuhai hi in ngai naw chun, Lalpa chun a tih: keima ngei insâlin kân khâm a, hi in hi rausan ni ngei a tih.

⁶ Juda lal in chungthua chun Lalpa chun hieng hin a ti si a: Ka ta ding chun Gilead i na, Lebanon lu leh; nisienlakhawm, matheilovin thlalêra le khawpui hluo lovah ka siem ding che a nih.

⁷ I chunga chun suksetuhai, mi tin el chu mâni hriemhrei seng leh, ka buotsai ding a nih; anni chun i ditthlang sidar dâm chu sât thlâng an ta, meiah tîng an tih.

⁸ Hnam tamtakhai chun hi khawpui hi fekhêl an ta, mi tin chun mâni tuolbâwm kuoma chun, “Iengtiziea hi khawpui ropuitak hi Lalpain hienga a thaw el am a na?” tîng an tih.

⁹ Chun, anni chun, “Lalpa an Pathien thuthlung chu an nghatsan a, pathien danghai an biek a, an rawng an bâwl leiin a nih,” tiin dawn an tih.

¹⁰ Mithi ta dingin ṭap naw unla, ama chu sûn bawk naw ro; amiruokchu, mi a fe hmang ta ding chun nasatakin ṭap unla; ama chu a hung kîr ta naw ding lei le, a piengna ram chu a hmu ta naw ding leiin.

¹¹ Juda lal Josia naupa Sallum a pa aia rorêla, hi hmun mâksantu chungthua chun Lalpa chun hienghin a ti si a:

¹² “Hitaka hin ama chu hung kîr nâwk ta naw ni; amiruokchu, ama chu sala an ṭhuoina hmuna chun, chutaka chun thîng a ta, hi ram hi hmu nâwk ta naw ni,” tiin.

¹³ A in fel nawnaa bâwltu le, a pindanhai indik lonaa bâwltu chu a chung a rik; ama chun a tuolbâwm sinthawna chu man boin a hmang a, a hlaw khawm a pêk naw a;

¹⁴ ama chun, “In lientak ka ta dingin bâwl ka ta, pindan chunghnung lien tâwktak hai leh” a ta. Chuongchun, tukverhai a siem a, sidar thingin a sûng ân thuo a, rawng sen a nâl a.

¹⁵ Sidara în huon khum leiin lalah în ngai am a nih? I pa chun a fâkin a dâwn a, indikna le rorêlna chu a thaw a ni nâwm a nih? Chuongchun, ama ta ding chun a hung ṭha a.

¹⁶ Mi tlasamhai le mi rimsihai chungthu chu a rêl a, chuongchun, a ṭha a. Hi hi keima mi hre dingin a ni nâwm a nih? Lalpa chun a tih.

¹⁷ Amiruokchu, nanga mithai le i lungril chu inhnarna le, mi thiem thisen insuona ding le, nêksâwrna ding le, thawluina ding le, chu chu thawnaa ding chau naw chu thil dang ding a ni naw a.

¹⁸ Chuleiin, Juda lal Josia naupa Jehoiakim chungthua chun Lalpain hieng hin a tih: Ama chu “Aw ka unaupa,” tiin amanih, “Aw farnu,” tiin amanih, sûn naw ni hai a; “Aw lalpa,” tiin amanih, “Aw a ropuina chu,” tiin amanih, sûn bawk naw ni hai.

¹⁹ Sabengtung phûm angin phûm an ta, Jerusalem dai kawtkhârhai khêla hnûka kei dawkin.

²⁰ Lebanona chun hang fe la, hang khêk rawh: Basana inthawk chun i râwl insuo la, Abarima inthawk chun khêk rawh: i hmangaihai po po chu an bohmang vawng ta si a.

²¹ I vângneinaa chun i kuomah thu ka hril a; amiruokchu, nang chun, “Ngai naw ning,” i ti a. I naupang laia inthawk tah hi hi i khawsak dân a ni hrim a; ka râwl hi i ngai ngai nawh.

²² I berâmpuhai po po chu thliin châwm a ta, i hmangaihai chu salah intâng an tih: chu pha chun matheilovin, i khawhlonahai po po lei chun inzak i ta, buoi ngei ngei i tih.

²³ Aw Lebanon hluotu, sidar thinghaia bu septu, nuhmei nauhase nat anga natna, i chunga tuornahai a hung tlung pha chun lungsiet i va um âwm de!

²⁴ Lalpa chun, ka hring zing angin, Jehoiakim naupa Konia chu ka kut changtienga kutsebi sûngphûm ni sienla khawm, chutaka inthawk chun hmalthlâng ka ti che;

²⁵ chun, nangma hringna zawngtuhai kuta le, i ṭi Babulon lal Nebukadnezzar le Kaldaihai kuta chun pêng ka ti che.

²⁶ I piengna ni lo ram dangah nang le i nu a neitu che hi peisuok ka ti cheu a, chutaka chun thîng in tih.

²⁷ An lungrila kîr an châk êm êmna rama chun kîr nâwk ta naw ni hai.

²⁸ Hi Konia hi bêl kawidar, hmusitum am a ni naw am ni? Ama hi bêl a sûnga duzâwng um nawna chu a ni naw am a ni? Iengdinga pei suoka, ama le a chihai, an ihriet naw rama chu pei suoka um am an na?

²⁹ Aw leihnuoi, leihnuoi, leihnuoi, Lalpa thu chu ngai ta.

³⁰ Lalpa chun hieng hin a tih: Hi pa hi nau boah, a dam sûnga mi hlawtling ngai lo dingin ziek rawh, ama chia mi hrim hrim hi tukhawm hlawtling ngai naw ni hai; David lalṭhungphaa ṭhung thua le, Juda rama ro la rêl pei ding thuah.