JEREMIA 19 - Pathien Lekhabu Inthieng (BSI)

Bêl kawia inthawka inchûktirna

¹ Lalpa chun hieng hin a tih, “Fe la, bêl hemtu pil bêl inchaw la, chun, mipuihai laia upahai le, thiempuhai laia upahai ṭhuoi la.

² Hinnom naupa phairuom, Harsith dâi kawtkhâr lûtna bula uma chun fe unla, chutaka chun thu ka hril che chu hril suok rawh.

³ Hieng hin ti la. Nangni Juda ram lalhai le, Jerusalem hluotuhai, Lalpa thu chu lo ngai ta u; sipaihai Lalpa Israel Pathien chun hieng hin a tih: Ngai ta u, hi hmuna hin thil ṭha naw kân tlungtir ding a nih; a hre taphawt chu an nahai chu khel a tih.

⁴ Kei an mi lo nghatsan ta a, hi hmun khawm hi an lo sukhran ta a, an hriet lo pathienhai kuoma chun a sûnga hin riminhnik chu, anni le an thlatuhai le Juda ram lalhai ngei khawma an lo raw tâk leiin; hi hi hmun hi mi thiem thisen chun an lo suksip ta a;

⁵ Baal bâwlhmunhai chu an bâwl a, Baal kuoma pumrawhmang thilinhlân dinga an naupasalhai râwna dingin; chu chu thu ka pêk hlek naw a, hril khawm ka hril naw a, ka lungrila khawm a hung lût ngai nawh;

⁶ chuleiin, ngai ta u, a nihai chu a hung tlung, Lalpa chun hieng hin a tih: Hi hi phairuom hi Topheth amanih, Hinnom naupa Phairuom amanih ti ni ta naw ni a. Inthatna Ruom ti ni lem tâng a tih.

⁷ Chun, hi hmuna hin Juda ram le Jerusalem thurawt chu inthlâwntir ka ta; an hringna zawngtuhai le, an hmêlmahai hmaa chun kâwlhnâmah intlûktir ka tih; chun, an ruonghai chu chunglêng vatehai le, hnuoia ramsahai ta dingin bu dingin pêng ka tih.

⁸ Hi khawpui hi maktia le thuokdawngumah siem ka ta; mi tin a fe khêltuhai taphawt chun mak tîng an ta, an thuok dawng a tih, chu chu hmun po po a se ta lei chun.

⁹ Chun, an naupasalhai le an naunuhmeihai sahai chu infâktir ka ta; mi tin chun, inhuolnaa le chârchilnaah, an hmêlmahai le an hringna zawngtuhaiin an chârchilnaa chun, mâni ruolhai sa chu fa tâwl an tih.

¹⁰ Chun, nangma hung zuitu mihai mithmua chun bêl chu sukkawi i ta,

¹¹ an kuoma chun, Sipaihai Lalpa chun hieng hin a ti a nih: Hieng ang bawk hin, bêl hemtu bûr chu miin siem ṭhat nâwk thei ni ta lova a suksiet ang hin hi khawpui le hi hnam hi ka suksiet ding a nih; chuongchun, inphûmna ding um naw khawp rauin Tophetha chun inphûm an tih.

¹² Hi hmun hi Topheth ang ela siemin, hi hmun hluotuhai chunga le hi hmun chunga hin ka thaw ding a nih, Lalpa chun a tih.

¹³ Jerusalem inhai le Juda lalhai inhai sukpawrchea lo um tahai chu Topheth hmun ang lo ni tâng a ta, in a chunga vâna umhai po po kuoma riminhnik an lo râwna, pathienhai kuoma dâwnmi thilinhlânhai an lo bunthlâkna po pohai chu,” tiin.

¹⁴ Chun, Lalpain thuhril dinga a tirna Tophetha inthawk chun Jeremia chu a hung a; Lalpa in inhuonna tuollaia chun a ngîr a, mipuihai po po kuoma chun,

¹⁵ “Sipaihai Lalpa Israel Pathien chun hieng hin a tih. Ngai ta u, a chunga tlung dinga ka lo hril ta po po, thil ṭha naw po po chu hi khawpui le a khawperhai po po chunga chun ka hung intlungtir ding a nih, anni chun an lungril an sukngar a; ka thuhai chu an ngai nawna dingin,” a ta.