JEREMIA 18 - Pathien Lekhabu Inthieng (BSI)

Bêl hemtuin pil a hem dâna inthawka inchûktirna

¹ Lalpa kuoma inthawka Jeremia kuoma thu hung tlung chun,

² “Tho la, bêl hemtu ina chun fe thla la, chutaka chun ka thu inngaitir ka ti che,” a ta.

³ Chuongchun, bêlhemtu ina chun ka fe thla a, bêlhemna khâwlah a sin chu a lo thaw a.

⁴ Chun, pilpawka bêl a siem chu a him naw pha chun, bêlhemtu chun ṭha a ti ang peiin bel dangah a siem nâwk a.

⁵ Chun, Lalpa thu chu ka kuomah a hung tlung a,

⁶ “Aw Israel sûngkuo, hi bêl hemtu ang hin i chunga hin ka thaw thei ni lo am a nih? Lalpa chun a tih. Ngai ta, pilpawk chu bêl hemtu kuta a um angin, nang chu ka kuta um i nih, aw Israel sûngkuo.

⁷ Ieng huna khawm hnam amanih, lalram chungthuah hmalthla ding le sukchim ding le sukse dinga ka hril a,

⁸ chu hnam, a chungthu ka hril chu an thil ṭha nawa inthawka an hung kîr chun, thil ṭha naw an chunga thaw dinga ka ngaituo chu la kir ka tih.

⁹ Chun, ieng huna khawm hnam amanih, lalram chungthuah siem ding le inngîr dinga ka hril a,

¹⁰ ka mithmua chun thil ṭha naw a thawa, ka râwl a ngai naw chun, anni sukṭhatna dinga ka ti thil ṭha chu la kîr ka tih.

¹¹ Chuleiin, tuhin fe la, Jerusalem hluotuhai le Juda rama mihai kuoma chun thu hril la, ‘Lalpa chun hieng hin a tih: Ngai ta u, in chungah thil ṭha naw ka riruong a, in chungah phierrûkna ka phierrûk a, tuhin mi tin mâni lampui rilo senga inthawk chun hung kîr raw se; chuongchun, in thilthawhai le in lampuihai chu siem ṭha ro,’ tiin.

¹² “Nisienlakhawm, ‘Beiseina hrim a um nawh, mi tin mâni ngairuotna ang seng ei hraw ding a na, eini mi tin chun mâni lungril rilo ngarzie ang peiin ei thaw el ding a nih,’ an ta.

¹³ “Chuleiin, Lalpa chun hieng hin a tih; Hnamhai laia chun indawn unla, hieng ang thilhai hi hre hlak an um am; Israel nunghâk inthieng chun thil râpthlâktak el chu a lo thaw ta a.

¹⁴ Lebanon vûr chun ramhnuoi lungpui chu a mâksan ding am a nih? Annawleh, tui dei ram hlataka inthawka hung luong thlahai chu a kang el ding am a nih?

¹⁵ Ka mihai chun an mi theinghil a, teplo kuoma chun riminhnik chu an lo raw ta si a; chun, anni chun an lampuihaia chun an insui thlûktir a, tienlaia lampuihai, lampui rûka fe dingin, lam tluongpui nilovah chun;

¹⁶ an ram chu makti dinga siem ding le, hahîpa siem dingin; mi tin chu fe khêl taphawt chun maktîng an ta, an lu thin an tih.

¹⁷ Sak thli ang elin anni chu an hmêlmahai kuomah sukdar vawng ka ta, an lungngai nia chun ka hmai ni lovin ka hnungtieng inentir ka tih,” tiin.

Mipuihai thuphier le Jeremia ṭawngṭâina

¹⁸ Chun, anni chun, “Hung ro khai, Jeremia chunga hin thuphierrûk phier ei tih; thiempua inthawkin dânin bo ni nei naw ni a, mi vara inthawkin thurâwn le, zâwlneia inthawka thu bo naw nih. Hung ta u, hril se bawr bawr ei ta, a thuhai chu a ieng ieng khawm chu awipêk nâwng ei tiu,” an ta.

¹⁹ Aw Lalpa, mi hung ngaisak la, keia mi kaltuhai râwl chu lo ngai ta.

²⁰ Thil ṭha naw chu thil ṭhaa thung a ni ding am a nih? Ka thlarau ta dingin khur an cho ta si a. An ta dinga thil ṭha hril dinga i hmaa, i lunginsenna annia inthawka sukkieng dinga ka ngîr kha hre zing la.

²¹ Chuleiin, an thlahai chu ṭâm kuoma chun pe la, anni chu kâwlhnâm thilthawtheina kuoma chun pe rawh; chuongchun, an nuhmeihai chu nau bo le, hmeithaihai innitir la, an pasalhai chu thinaa sukhlum ni hai sienla, chun, an tlangvâlhai chu indonaa kâwlhnâma that ni raw hai se.

²² An chunga sipai ruol i hung ṭhuoi thut pha chun, an inhaia inthawk chun ṭap hriet ni raw se, kei mi manna dingin khur an cho a, ka kehai ta ding chun châng an kam si a.

²³ Amiruokchu, Lalpa, mi thatna dinga ka chunga an thu inrâwnna po po kha i hriet a, an suolna chu ngaidam naw la, i mithmua inthawk chun an suol chu sukhmangpêk bawk naw rawh, amiruokchu, nangma hmaa chun pei thlûkin um hai sienla, anni chu i lunginsen lai chun sawisa rawh.