JEREMIA 16 - Pathien Lekhabu Inthieng (BSI)

Mipuihai chunga Lalpa rorêlna

¹ Lalpa thu chu ka kuomah a hung tlung a;

² “Nuhmei nei naw ti ni a, hi hmuna hin naupasalhai, naunuhmeihai khawm nei bawk naw ti nih.

³ Hi hmuna pieng naupasalhai chungthu dâm, naunuhmeihai chungthu dâm, hi ram anni chawitu an nu chungthu dâm, anni neitu an pa chungthu dâm chu Lalpa chun hieng hin a lo hril ta si a;

⁴ Thina lungngaiumtakin thîng an ta, ṭa khawm ṭa ni naw ni hai a, phûm khawm phûm ni naw ni hai; leihnuoi chunga êkdûr ang chau nîng an ta, ṭâmna le kâwlhnâm chun anni chu fâkzoin um an tih; chun, an ruonghai chu chunglêng vatehai le hnuoi chunga ramsahai ta dinga bu nîng a tih.

⁵ Lalpa chun hieng hin a ti si a: Lusûn ina chun lût naw unla, ṭa dingin fe bawk naw unla, anni chu sûn bawk naw ro; hi hnama inthawk hin ka thlamuongna chu ka lâk hmang ta si a, Lalpa chun a tih, lunginsietna le zângaina innêmtak el chu.

⁶ Hi rama hin a lien le a chîn khawm thîng an ta; phûmin um naw ni hai a, mihai khawma anni chu ṭa naw ni hai, anni le anni khawm in ât naw ni hai, an ta dingin an lu sukkâwk bawk naw ni hai;

⁷ mithihai leia anni thlamuon dingin, mihai chun sûnna dingin bei khawi naw ni hai a; an nuhai amanih, an pahai amanih dâwn dingin sûnpuina nohai chu pe bawk naw ni hai.

⁸ Anni le ṭhunga, faa, dâwn dingin ruoiṭhena inah i fe ding a ni nawh.

⁹ Israel Pathien sipaihai Lalpa chun hieng hin a ti si a: Ngai ta u, i nihaia hin, in mithmua inthawkin hlimna râwl ri dâm, lâwmna râwl ri dâm, mo neitu râwl ri dâm le monu râwl ri dâm chu hi hmuna inthawk hin ka suktâwp ding a nih.

¹⁰ “Chun, hieng thuhai po po hi hieng mihai kuoma hin în entir pha chun i kuoma chun ‘Iengleiin am hieng thil ṭha naw nasatakhai hi kan chungah Lalpa chun a hung sâksuok am a na? Annawleh, ieng am a na kan khawhlona chu? Lalpa kan Pathien chunga kan lo thaw tah, kan suolna chu ieng am a na?’ tîng an ta;

¹¹ nang chun an kuomah, ‘In thlatuhai chun an mi lo nghatsan ta a, Lalpa chun a tih: Pathien danghai chu an zui a, a rawng an bâwl a, anni chu chibai an bûk a, kei chu an mi lo mâksan a, ka dân khawm an lo zâwm ta naw lei khan a nih,

¹² in thlatuhai nêk hman chun thil suol in thaw lem a, ngai ta u, mi tin el chu mâni lungril ngarna ang peia fein, keia thu chu in ngai ta naw a;

¹³ Chuleiin, hi rama inthawk hin nangni le in thlatuhai khawma an hriet ngailo rama chun ka hnawt suok ding cheu a nih; chutaka chun a sûn a zânin pathien danghai rawng bâwl in tih; ditsakna kân hmutir âwm si naw cheu a,’ a tih,” tiin.

¹⁴ Chuleiin, ngai ta, nihai a hung tlung, Lalpa chun a tih, “Lalpa Aigupta rama inthawka Israel mipuihai hung ṭhuoi suoktu chu a hring zing angin,” ti ni ta naw ni a,

¹⁵ amiruokchu, “Lalpa hmâr tieng rama inthawk le, anni a hnawt hmangna ram po poa inthawka Israel mipuihai hung ṭhuoi suoktu kha a hring zing leiin,” ti ni lem tâng a tih; an thlatuhai kuoma ka lo pêk tah, an rama ngei khan anni chu ka hung ṭhuoi nâwk ding a ni si a.

¹⁶ Lalpa chun hieng hin a tih: Ngai ta u, nga man mi tamtak ko suok ka ta, anni chu nga manin man an ta; chu hnunga chun ramsuoktuhai tamtak ko suok ka ta, tlâng tinhaia le, muol tinhaia le, lungpui kuo kârhaia chun anni chu pêl an tih.

¹⁷ An lampuihai po po chu ka mit chun a en zing a, ka hmaia inthawka thup an ni naw a, ka mithmua inthawkin an suolnahai khawm chu thup a ni bawk nawh.

¹⁸ Chun, a hmasatakin, an khawhlona le suolna chu a let hniin thung ka ta, ka ram chu an thil thienglo ruokhai chun an lo sukpawrche ta a, ka rochan khawm an tirdakumna chun an lo suksip ta leiin.

¹⁹ Aw Lalpa, ka hrâtna le ka kulpui nghet le rinum nia ka himna; leihnuoi tâwphaia inthawk chun hnamhai chu i kuomah hung an ta, “Kan thlatuhai chun khêlhlip chau, teplo le, thil a hlâwkna um dêr lohai chau naw chu iengkhawm an lo rochung naw a,” hung tîng an tih.

²⁰ Mihriem chun ama ta dingin pathienhai ni si lo, pathienhai chu ân siempêk ding am a nih?

²¹ Chuleiin, ngai ta, hieng hi inhriettir ka ta, vawi khat chu ka thilthawtheina le ka kut chu inhriettir ka tih; chun, ka hming chu Jehova a nih ti hre tâng an tih.