JEREMIA 14 - Pathien Lekhabu Inthieng (BSI)

Khaw inṭhâl chungthua thucha

¹ Khawinṭhâl chungthua Jere- mia kuoma Lalpa thu hung tlung chu:

² Juda chun a sûn a; chutaka a dai kawtkhârhai khawm chu an ṭâwp zo a, hnuoi chunga chun a duma inbelin ân ṭhung a; Jerusalem khêk ri chu chungtieng a fe a. a.

³ A miṭhahai chun an nauhai chu tui chawi dingin an tir a, khurahai chun an hung a, tui hlak an hmu naw a; an tuitheihai chu a ruokin an kîr a, an inzakin an buoi a, an luhai chu an inkhum a.

⁴ Rama chun ruotui a um si naw a, leihnuoi beidawngumtak lei chun hnuoi inlettuhai chu an inzak a, an luhai an khum a.

⁵ Anih, sazukpui khawm rama chun ân te a, hlohna a um naw leiin a tê chu a mâksan a.

⁶ Ram sabengtunghai khawm chu tlâng sâng chungahai chun an ngîr a, sihalhai angin thli an dawng a, hlo pet ding a um naw leiin an mit ân thim a.

⁷ Kan suolnahai chun keini a mi hêk khawma, Aw Lalpa, i hming leiin nangin sin thaw la, kan hnungtawlnahai chu a tam hle ta si a; i chunga chun thil kan lo suksuol ta a nih.

⁸ Aw nang Israel beisei, buoina hun laia sandamtu, hi rama hin ieng dingin am mikhuol ang chau, zân khat riek dinga inzin mi puon in zartu ang el chu nîng i ta?

⁹ Ieng dingin am mi maktia um, mi thilthawtheitak sandam thei silo ang chu nîng i ta? Nang chu, Aw Lalpa, keini lai hin i um a, i hming chawia ko kan na; keini mi mâksan naw rawh.

¹⁰ Lalpa chun hi mihai chungthua chun hieng hin a tih: Invâk invâk hi an nuom zâwngtak a lo ni ta a: an kehai khawm an thunun naw a; chuleiin, Lalpa chun anni chu a pawm naw a; tuhin an suolnahai chu hre zing a ta, an suolhai lei chun anni chu hrem a tih.

¹¹ Chun, Lalpa chun ka kuoma chun, “Hi hnam ta ding hin an ṭhatna dingin ṭawngṭaipêk naw rawh.

¹² Bu an nghei pha khawm, an khêkri chu ngai naw ning a; inthâwina le pumrawhmang thilinhlân an inhlân pha khawm pawmpêk naw ningah; amiruokchu, anni chu kâwlhnâm le, ṭâm le hripuiin sukbohmang lem ka tih” a ta.

¹³ Chun, kei chun, “Aw Lalpa Pathien, ngai ta, zâwlneihai chun an kuoma chun, ‘Kâwlhnâmhai chu hmu ngai naw ti niu a, ṭâm khawm nei ngai naw ti niu a, amiruokchu, hi hmuna hin thlamuongna diktak chu pêng ka ti cheu,’ an lo tipêk hlak a,” ka ti a;

¹⁴ chun, Lalpa chun ka kuomah a hril a, “Zâwlneihai chun ka hmingin thukhêlhai an hril a; anni chu ka tir naw a, thu khawm ka pêk naw a, an kuoma khawm thu ka hril bawk nawh; in kuoma chun thil hmulâwk indik nawhai, khawhri zâwl thuhai, thil iengkhawm ni lo, an lungrila thukhêl chu an hril lem hlak a.

¹⁵ Chuleiin, ka hminga zâwlnei thuhriltuhai chungthua chun, LALPA chun hieng hin a tih: anni chu ka tir naw a; amiruokchu, hi rama hin kâwlhnâm le ṭâm tla naw ni, tituhai, chuong zâwlneihai chu kâwlhnâm le ṭâmin sukbohmang nîng an tih.

¹⁶ Chun, chuong mipuihai an thuhrilnahai chu ṭâmna le kâwlhnâm leiin Jerusalem kawtthlêrahai chun pei suokin um an ta; anni phûmtu ding tukhawm nei naw ni hai, anni leh, an nuhmeihai le an naupasalhai, an naunuhmeihai leh; anni chunga chun an rîtlona chu ka bunthlâk ding a ni si a.

¹⁷ Chun, an kuoma chun hieng thu hi hril rawh: Sûn le zâna khawm ka mithai chu mitthliin luong thla raw se; ma lo tawpin; ka chipui naunu inthieng chu hliemna nasatakin, pawpna nasataka suknawiin a um a.

¹⁸ Ramhnuoiah ka va fe leh, kâwlhnâma thihai hmu a ni a! khawpui sûng ka lût leh, ṭâmnaa na tuorhai hmu a ni a! zâwlneihai le thiempuhai chu ram sûnga chun an invâk vêl a, hrietna nei si lovin,” tiin.

¹⁹ Juda chu i hnâwl pumhlûm dêr am a nih? I thla chun Zion chu a tirdak am a nih? Iengdinga nangin i mi hrema, kan ta dinga sukdamna um lo am a na? Inremna kan enkai a, nisienlakhawm, thil ṭha hrim a hung tlung naw a; sukdamna ding huna khawm chun lunginzîngna hmu a nih!

²⁰ Aw Lalpa, kan suolnahai ka hung inhriettir a, kan thlatuhai suolna leh; nangma chunga chun thil kan lo suksuol ta si a.

²¹ Nangma hming leiin keini chu mi hmusit naw la, i ropuina lalṭhungpha chu sukhmaimâwk naw rawh; keini le i thuthlung kha hre zing la, sukse naw rawh.

²² Khawhri be mihai teplohai lai chun ruo insûrtir thei hrim an um am? Annawleh, vânhai chun ruohai chu a pêk thei am a nih? Aw Lalpa kan Pathien, nang chu ama chu i ni a ni naw maw? Chuleiin, nangma chu nghâk zing kan ti che, hieng thilhai po po hi i siem si a.