JEREMIA 12 - Pathien Lekhabu Inthieng (BSI)

Jeremia thil ngên le Pathien dawnna

¹ Aw Lalpa, nang chu ka hung ngên lai che chun, i fel a, nangma le chun a san chu ei ngaituo tlâng a, mi rilo lampui chu ieng dinga a hlawtling hlak a, khawhlotaka thawtuhai po po chu nuomsaa um am an na?

² Nang chun anni chu i phun ta a, anih, zung khawm an kei a; an hung inṭhang a, ra khawm an hung ra ta a; an baua chun nang chu i hla naw hle a, an sûnga ruok chu i hla a nih.

³ Nisienlakhawm, aw Lalpa, nang chun i mi hriet a, i mi hmu a, nanga tienga chun ka lungril chu i fie a, sathattu ta dinga berâmhai ang chun kei suok la, thatna ding nia ang chun anni chu buotsai rawh.

⁴ Ieng chen am ram chun sûnin, ram pumpui hlohnahai chu a vuoi ding a na? chutaka an rîtlona um zing lei chun, ramsahai le vatehai khawm chu an bohmang a, “Ei ni hnungtieng tâwpna chu hmu naw ni,” an ti leiin.

⁵ Kea lâwn mihai leh in tlân a, an suksâwl hle che chun, sakawrhai le chun iengtin am inel thei i ta? Muongna rama hman i tlu chun, Jordan ramngawa chun iengtin am thâwng i ta?

⁶ I unauhai le i pa sûngkuo ngei chun, i chungah khawhlotakin an lo thaw ta a; i hnunga chun an hung khêk rak rak a; anni chu ring naw rawh, i kuoma chun thu ṭhatakhai hril hai sien khawm.

⁷ Ka in chu ka mâksan ta a, ka rohluona khawm chu ka pei thlâk a, ka thlain a hmangai dittak chu a hmêlmahai kuomah ka pêk ta a.

⁸ Ka rochan khawm chu ka ta ding chun ramhnuoia sakeibaknei ang a lo ni ta a; ka chunga chun a râwl chu a mîn suo khum a; chuleiin, ama chu ka theida a nih.

⁹ Ka rochan chu ka ta ding chun vate ṭiel sa fa mi ang a ni a ni ta maw? A sîr vêl tina chun vate sa fa mihai chu an um a ni maw? Nang va fe la, ramhnuoia ramsahai po po chu kei khâwm la, fa zo dingin hung ṭhuoi rawh.

¹⁰ Berâmpu tamtakhai chun ka grêp huon chu an suksiet a, ka chan chu an ke hnuoiah an sirde a, ka chan inhawitak chu thlalêr ram râusanah an siem ta a.

¹¹ Râusanah an siem ta a; râusana umin ka kuoma chun a ṭap a; mi tukhawma lungril a an sie naw leiin ram pumpui chu râusana siem a ni ta a.

¹² Thlalêra bâwlhmun tlângahai po po chun suksetuhai chu an hung a, ram pakhat tâwpa inthawka ram dang tâwp chen chun Lalpa kâwlhnâm chun a fâk zo a, tisa hrimin muongna an nei nawh.

¹³ Bu an chîng a, hling an sîk a; anni chu an insukna a, nisienlakhawm, iengkhawm a hlawk nawh, Lalpa lunginsenna ṭiumtak lei chun i rahai chu inzapui i tih.

¹⁴ Ka tuolbâwm rilohai po po, ka mi Israelhai hluo dinga ka ti lo tâwksetu chunga chun Lalpa chun hieng hin a tih: Ngai ta u, an rama inthawk chun anni chu hmalthlâng ka ta, anni laia inthawk chun Juda sûngkuo chu hmalthlâng ka tih.

¹⁵ Anni ka hmalthlâk hnunga chun hung kîr nâwk ka ta, an chungah lunginsietna nei ka tih; chun, mi tin chu mâni rochan senga chun hung ṭhuoi nâwk ka ta, mi tin chu mâni ram senga chun.

¹⁶ Chun, Baal kuoma ṭawng inkhâm dinga ka mihai an inchûktir anga, “Lalpa chu a hring zing angin,” tia, ka hminga ṭawng inkhâm dinga, ka mihai lampuihai chu taimataka an inchûk chun, ka mihai laia chun anni khawm chu siempuitling nîng an tih.

¹⁷ Amiruokchu, an ngai naw chun, chu hnam chu hmalthlâng ka ta, hmalthlain suksieng ka tih, Lalpa chun a tih.