JEREMIA 10 - Pathien Lekhabu Inthieng (BSI)

Pathien indik le pathien indiknaw

¹ Aw Israel sûngkuo, Lalpain i kuoma thu a hril chu lo ngai ta,

² Lalpa chun hieng hin a tih: Hnamhai lampuihai chu inchûk naw la, chungtienga inchiknahaia chun lunginzîng el bawk naw rawh, hnamhai chu chuonghaia chun an lunginzîng hlak si a.

³ Hnamhai dânhai chu teplo mei mei an na; rama inthawkin thing an hang phûr thlûk a, themthiem mi chun a hreipuiin a chei a.

⁴ Chu chu tangkaruo le rângkachakin an chei a; thîrkilnahaiin an sukdet a, tubauhai leh, chuongchun, ân hnîng thei naw a;

⁵ Leipuia vate ṭi milim ang an na, nisienlakhawm, an ṭawng naw a; an fe thei naw leiin zâwn an ngai a. Anni chu ṭi naw la, thil suol khawm an thaw thei naw a, annia chun thil ṭha thawna ding khawm a um bawk nawh.

⁶ Aw Lalpa, nanga ang hi tukhawm an um nawh, i ropuia, i hming chu thilthawtheinain a ropui bawk a.

⁷ Aw hnamhai Laltak, tuin am ṭi nâwng an ti che a? Nang chun i phu hrim si a, hnamhai laia mi var po po lai le, an lalram sûngahai chun, nanga ang hrim tukhawm an um nawh.

⁸ Anni chu ngawng tak le invêt an na, milim inchûktirna chu thing bul el chu a nih.

⁹ Tangkaruo thlênghaia sut, Tarsisa inthawka hung lâkhai le, Uphaza inthawka rângkachak, themthiem le rângkachak thîrsu kuthai sinthaw chu: a dum pâwl le a dum êm chu an thuom dingin, mi themthiemhai kutsuok vawng an nih.

¹⁰ Amiruokchu, Lalpa chau Pathien diktak chu a na, Pathien hring chu a na, chatuon lal a nih; a lunginsenna chun hnuoi chu ân thin a, a lungawi nawna chu hnamhai chun an tuor thei nawh.

¹¹ Hieng hin an kuoma chun hril i tih: hnuoi le vânhai siemtu ni lo pathienhai chu, chuonghai chu vânkhuphnuoia inthawk le leihnuoia inthawk chun bohmang an tih.

¹² A thilthawtheina chun hnuoi chu a siem a, a varna chun khawvêl chu a lo tungding ta a, a hrietthiemnahai chun vânhai khawm chu a lo keiphar ta a;

¹³ a râwl a hung insuo pha chun vânhaia tuihai chu a hung phul a, leihnuoi tâwpnaa inthawk dâm chun tuihu chu ân kaitir a, ruo ta ding chun kâwlinlephai a siem a, a robâwmhaia inthawk chun thli chu a hung lâk suok a.

¹⁴ Mi tin el chu ngawngtak, hrietna nei lo an na; rângkachak suttu tinhai khawm chu a milim kera siem lei chun sukzakin a um a; a milim sunghai chu khêlthu ngawt a na, annia chun inthuokna a um si naw a.

¹⁵ Thil teplo, sinthaw nuizatum an nih; hrem an ni pha chun bohmang an tih.

¹⁶ Jakob chanvo chu hieng ang hi a ni ve naw a; thil po pohai siemtu chu a na; Israel chu a rochan hnam a na; sipaihai Lalpa chu a hming a nih.

Juda râusana a umna

¹⁷ Aw nang inhuola um, rama inthawk chun i thuomhnawhai chu la khâwm rawh.

¹⁸ Lalpa chun hieng hin a ti si a: Hieng ang huna hin ram hluotuhai chu the suok ka ta, an tuorna dingin anni chu sukrinum ka tih.

¹⁹ Ka natna lei chun ka chung a va rik de! ka hliemna chu a nasa hle a; nisienlakhawm, “Indiktakin hi hi ka natna chu a na, ka tuor ding hrim a nih,” ka ti a.

²⁰ Ka puon in chu suksiet a ni ta a; ka hruihai po po khawm suktan an ni ta a; ka nauhai khawm chu keimaa inthawkin an fe hmang a, an um ta naw a; ka puon in keiphar nâwk ding tukhawm an um ta naw a, ka puonzârhai zâr ding leh.

²¹ Berâmpuhai hlak chu an ngawng êm a, Lalpa chu an râwn si naw a; chuleiin, an hlawtling naw a, an berâm ruolhai po po chu an indar zo a.

²² Thuthang râwl chu, ngai ta, a hung mêk a nih, Juda ram chu râusan le sihalhai chêngna hmuna siem dingin hmâr ram tienga inthawk buoina nasatak a hung mêk a nih.

²³ Aw Lalpa, mihriem lampui chu amaa chun a um nawh ti ka hriet a; a kepênhai sukdik dingin mihriema chun infetirtu chu a um nawh.

²⁴ Aw Lalpa, mi sukdik la, amiruokchu, rorêlnain, i lunginsennain ni lovin, chuong naw chun iengkhawm ni lovin mi siem rawi i tih.

²⁵ Khawhri be mi, nang hre lohai chunga le, hnam nangma hming lam ngailohai chunga chun i ṭiumna chu bunthla la, Jakob chu an fâk zo si a; anih, ama chu an fâk zo a, an kânghmang dêr a, a umna khawm chu an suksiet a.