JAKOB 2 - Pathien Lekhabu Inthieng (BSI)

Thlierbîk nei lo dinga hrilna

¹ Ka unauhai, ei Lalpa Isu Krista, Ropuina Lalpa, ring si chun mi thlier bîk nei naw ro.

² In inkhâwmna inah mi rângkachak kutsebi bun, puon mawitak sil hung lût sienla, chun, pasie puon setak sil hung lût bawk sienla,

³ puon mawitak sil chu in ngaisak a, a kuoma chun, “Nang hi hmun ṭhaa hin ṭhung rawh,” in ti a; chun, pasie kuoma chun, “Nang chu sawtaka sawn ngîr la, annawleh ka ke sirsan hrûla hin ṭhung rawh,” in ti chun,

⁴ in lungrilin thlier bîk neia ngaituona suol puta sawisêltu chu in ni naw ding am a nih?

⁵ Ka unau dittakhai, ngai ta u, Pathienin hi khawvêl thila pasiehai hi, ringnaa hausa ding le, ama hmangaituhai kuoma a tiem ram chu hluotu dingahai a ruot naw am a nih?

⁶ Nangni ruok chun pasie chu in sukmuolpho ta lem a nih. Mi hausahai chu a suknawmnatu cheu le, rorêlna ina kei lût hlaktu cheu chu an ni naw am a nih?

⁷ Hming inzaumtak in put hi hrilsetuhai an ni naw am a nih?

⁸ Nisienlakhawm, Pathien Lekha thu, “Nang în hmangai angin i vênghai i hmangai ding a nih,” ti lal dân hi in zâwm chun, in thaw ṭha;

⁹ amiruokchu, mi thlier bîk in nei chun, in suksuol a nih, Dânin bâwsetuah ân changtir si cheu a.

¹⁰ Tûkhawmin Dân zâwm kim sienla khawm, kawng khatah a suksuol si chun, a rênga chun thiemnaw changin a um ta a nih.

¹¹ “Uire naw,” titu chun, “Tuol that naw,” a ti bawk si a. Chuongchun, uire naw la khawm tuol i that si chun, Dân bawsetu i ni hrim hrim ta a nih.

¹² Chuleiin, zalênna dâna mi ro rêl pêka um dinghai angin thu hril unla, thil thaw bawk ro.

¹³ Mi chunga lunginsietna nei naw chu, lunginsietna ṭhang lova rorêl pêkin um a tih, lunginsietna chu rorêlna chunga chun ân suong hlak a nih.

Ringna le thilthaw

¹⁴ Ka unauhai, miin, “Ringna ka nei,” ti sienla, thilthaw a ṭhang si naw chun ieng am ṭhahnem a ta? chuong ang ringna chun ama a sandam thei ding am a nih?

¹⁵ Unaupa amanih, unaunu amanih, saruoka umin, an ni tin bu tlasam sienla;

¹⁶ chun, nangni laia tûin amanih an kuomah, “Thlamuongtakin fe unla, lumtak le khawptakin um ro,” ti unla, taksa ta dinga thil ṭûl chu in pêk si naw chun ieng am ṭhahnem a ta?

¹⁷ Chuong ang bawkin ringna chu, thilthaw nei lova ama chaua a um chun thi a nih.

¹⁸ Anih, mi tûin amanih, “Nangin ringna i nei a, keiin thilthaw ka nei a nih; i ringna chu thilthaw ṭhang lovin mîn entir rawh, chun, keiin ka thilthawin ka ringna inentir ka ti che.

¹⁹ Pathien chu pakhat a ni ti i ring a ni maw? I ti ṭha, khawhrihai khawmin an ring a, an inthin hlak a nih,” tîng a tih.

²⁰ Aw, mi teplopa, thilthaw ṭhang lova ringna ngawt chu iengkhawm a ni nawh ti i hriet nuom am?

²¹ Ei thlatu Abraham chun a naupa Isak maichâm chunga ân hlân lai khan thilthaw leiin thiem a chang a ni naw am a nih?

²² Ringna chun a thilthaw leh a thaw hmunkhat a, chun, thilthaw leiin a ringna chu a famkim tah ti i hriet.

²³ Pathien Lekha Thu, “Abraham chun Pathien a ring a, chu ringna chu a felnaa ruot a nih,” ti thu kha a hung hlawtling a, chuongchun, Pathien Ruola inbûkin a um ta a.

²⁴ Ringna lei ngawt ni lovin, thilthaw lei lemin, miin thiem a chang hlak ti in hriet tah.

²⁵ Chuong ang bawkin, Rahab nawchizawr khawm khan tirkohai kha a lo lâwm a, lampui danga ân fetir lai khan, thilthaw leiin thiem a chang a ni naw am a nih?

²⁶ Thlarau ṭhang naw chun taksa chu thi a nih, chuong ang bawkin thilthaw ṭhang naw chun ringna khawm chu a thi a nih.