JAKOB 1 - Pathien Lekhabu Inthieng (BSI)

Chibai bûkna

¹ Jakob, Pathien le Isu Krista suokin, Hnam sâwm le pahni indarhai chu chibai a bûk.

Ringna le varna

² Ka unauhai, thlêmna tinrêng in tuok hnungin lâwmna ruokah ngai ro,

³ in ringna fiena chun selna a siem ti hrein.

⁴ Chun, iengkhawm tlasam lova in famkima, in puma in him theina dingin, selna chun thaw famkim raw se.

⁵ Nangni laia tûkhawmin varna a tlasam chun, mi po po kuoma hal lo le inro lova pe hlaktu Pathien chu hni raw se; chuongchun, a kuomah pêk nîng a tih.

⁶ Nisienlakhawm, ringhla hlek lovin, ringna neiin hni raw se, ringhlatu chu tuisuoriet fâwn thli imût lêng le vawr ang a ni si a.

⁷ Chuong ang mi chun Lalpa kuomah iengkhawm hmu inring naw raw se,

⁸ mi lungril bulbâl nei naw, a thil thaw po poa det naw mi chun.

Retheina le hausakna

⁹ Unau daikilkâra mi chu chawimawia a um leiin lâwm raw se.

¹⁰ Hausa ruok chu suktlâwma a um leiin lâwm lem raw se; hlohna pâr angin a la bo el ding a ni si a.

¹¹ Nisa a hung suok a, thli lumtak a hung hrângin, hlo chu a sukvuoi a; chun a pâr chu a rêm a, a um dân mawizie chu a bohmang hlak; chuong ang bawkin mi hausa chu a fenaa chun a la vuoi ding a ni si a.

Infiena le thlêmna

¹² Thlêmna tuor hrâm hrâmtu chu a hamṭha, fiea a um phâleh hringna lallukhum Lalpain ama hmangaituhai kuoma a tiem chu a hmu ding a ni si.

¹³ Tûkhawmin thlêmna an tuok laiin, “Pathien ithlêm ka nih,” ti naw raw hai se; Pathien chu suol ithlêm ruol a ni nawh, ama khawmin tûkhawm a thlêm ngai nawh.

¹⁴ Mi tin mâni châknaa ṭhuoi hmang le hîpa an um chun, thlêmna an tuok lem a nih.

¹⁵ Chun, châkna chun tê a vawn a, suol a nei hlak; chun, suol chu a hung puitlingin thina a hung suksuok hlak.

¹⁶ Ka unau dittakhai, hlêmin um naw ro.

¹⁷ Thilpêk ṭha le thilpêk famkim po po chu chung tienga inthawkin, varhai Pa kuoma inthawkin a hung ṭum hlak a nih, amaa chun danglamna le inherna hlim hrim hrim a um thei nawh.

¹⁸ A thilsiemhai hma ṭhuoitu ang ei lo ni theina dingin ama dit zâwngin thutaka inthawkin a mi nei a nih.

Thu ngaithlâk le thu zâwm

¹⁹ Unau dittakhai, chuong chu in hriet; nisienlakhawm, mi tinin ngai inchu sienla, thu hril inchu lovin, lungril sukuoi raw se;

²⁰ mihriem lunginsenna chun Pathien felna chu a siem si nawh.

²¹ Chuleiin, inthieng nawna po po le suol sip liem chu sie hmang unla, thu tu, in thlarau sandam thei chu thuhnuoirawl takin pawm ro.

²² Nisienlakhawm, mâni inhlêm a, thu ngaituhai chau ni lovin, thu zâwmtuhai lo ni lem ro.

²³ Tûkhawm thu ngaitu nia, zâwmtu ni si lo chu, mi hlimenah a hmai pienpui nguntaka inen ang chu a nih.

²⁴ Nguntakin ân en a, a fe hmang a, mi ieng ang am a ni a theinghil nâwk si hlak a.

²⁵ Amiruokchu, tûkhawm dân famkim, zalênna dân hi bia, chuong anga um zinga, ngaia theinghil nâwk el hlaktu ni lova, zâwma sin thaw rawptu ni lem chu, ama chu a thil thawah malsâwmin um a tih.

²⁶ Tûkhawm sakhaw ngaisak nia inringa, a lei vêng ṭha si lova, mâni lungrila inhlêm lemtu chu, chu mi sakhaw biek dân chu iengkhawm a ni nawh.

²⁷ Ei Pathien le Pa mithmua sakhaw biek dân inthieng le, suol ṭhang naw chu hi hi a nih, fahra le hmeithaihai an rimsik laia kan le, khawvêl inthieng nawna kai lova insiem hi.