ISAI 9 - Pathien Lekhabu Inthieng (BSI)

Inremna lal piengna le a rorêlna

¹ Nisienlakhawm, lunginzînga umnu ta ding chun nguina hrim hrim um ta naw ni a. Tienlai chun Zebulun ram le Naphtali ram chu hmusitumin ân umtir a; nisienlakhawm, hun nuhnunga chun ropuitakin ân umtir ta a, dîl pangah, Jordan râlah, hnam tin Galili chu.

² Mi inthim hnuoia fehai chun var nasatak an hmu ta a; thina hlim rama umhai chunga ngei chun var a hung var ta a.

³ Hnam chu i suktam ta a, an hlimna khawm i sukpung ta a; bu sîk laia hlim angin i hmaah an hlim ta a, miin râllâk sum an sema an hlim ang elin.

⁴ A rikphurna rîngkawl le a liengkoa zâwnfung, a nêksâwrtu hembâwk chu, Midianhai hne ni ang khan i suktliekpêk ta si a.

⁵ Sa mur mura mi râlthuoma ân thuomna po po le, silfên thisen le inchiepawl niei nuoi po po chu, rawa meia ti ding el chau a ni si a.

⁶ Ei ta dingin naupang a hung pieng a, naupa pêkin ei um ta a; rorêlna chu a liengkoah chuong a ta, a hminga chun Remruottu Mak, Pathien Hrât, Chatuon Pa, Remna Lal an ti ding a ni si a.

⁷ David lalṭhungpha chunga le a ram chungah a rorêlna pungzie le inremnain tâwpintai nei naw nih, sukdet ding le tuta inthawka chatuon chen khawma rorêlna le felnaa tungding dingin. Sipaihai Lalpa ṭhahnemngaina chun chuong chu thâwng a tih.

Israel chunga Lalpa lungsenna

⁸ Lalpa chun Jakobhai rama chun thu a thawn a, Israelhai chungah a tla ta a.

⁹ Chuongchun, mi po po, Ephraimhai le Samaria um, chapotak le lungrila uongtaka,

¹⁰ “Ṭêkleihai chu chim sienla khawm, lungthîr sutin rem el ei tih; theichang thinghai chu sât bawngin um sienla khawm, sidar thinghaiin thleng el ei tih,” tituhai chun la hrieng an tih.

¹¹ Chuleiin, Lalpa chun Rezin dotuhai chu ama do dingin chawisâng a ta, a hmêlmahai chu chawktho a tih.

¹² Saktieng Suria mihai, thlangtieng Philistin mihai chun bau kain Israelhai chu fa zo an tih. Chuong ang lâwma a thaw khawm chun a lunginsen chu a la bo chuong si naw a; a kut chu a lân let ta rawp a.

¹³ Nisienlakhawm, mihai chun anni vawtu tieng chu an ngha chuong si naw a, sipaihai Lalpa chu an zawng chuong bawk nawh.

¹⁴ Chuleiin, Lalpa chun Israelhaia inthawk chun a lu le a mei, intûm kau le thielkuong ni khat thilah sawk tâwl a tih.

¹⁵ Upa le mi inzaumhai chu a lu chu an na, khêl inchûktir hlak zâwlneihai chu a mei chu an nih.

¹⁶ Hieng mihai ṭhuoituhai hin an ṭhuoi suol hlak a nih, an iṭhuoihai chu sukbohmangin an um hlak a nih.

¹⁷ Chuleiin, Lalpa chu an tlangvâlhai chungah lâwm naw ni a, an naufahrahai le hmeithaihai chu lunginsiet bawk naw nih; an rêngin Pathien inzâ naw mi le thil ṭha naw thawtu an ni vawng a, bau po po chun thu teplo a hril seng si a. Chuong ang lâwma a thaw khawm chun a lunginsen chu a la bo chuong si naw a, a kut chu a lân let ta rawp a.

¹⁸ Rîtlona chu mei angin a chawk dur dur hlak si a, buor le hlohlingneihai chu a kâng hmang hlak; anih, ramhnuoi thing bitna hmunahai chun a kâng dur dur a, a khu ân tung ngut ngut hlak.

¹⁹ Sipaihai Lalpa lunginsenna leiin ram chu a kâng siet a, mihai khawm chu meia ti ding thing ang an na; tukhawma mâni unau ngei khawm an hla nawh.

²⁰ Chuongchun, miin an changtienga mi inchûng an ta, nisienlakhawm, an phîng la ṭâm ta rawp a ta, an vawitienga mi fâng an ta, nisienlakhawm, tlai chuong naw ni hai, mi tinin mâni bân taksa fa seng an tih.

²¹ Manassehaiin Ephraimhai fâng an ta, Ephraimhaiin Manassehai fâng an tih; chun, an pahni chun Judahai do hmunkhat an tih. Chuong ang lâwma a thaw khawm chun a lunginsen chu a bo si naw a, a kut chu a lân let ta rawp a.