ISAI 8 - Pathien Lekhabu Inthieng (BSI)

Zâwlnei naupa hming

¹ Chun, Lalpa chun ka kuomah, “Lekha ziekna phêk lientak la la, mihriem kawlawmin a chungah, ‘Mahersalal-has-baz ta ding,’ tiin ziek rawh;

² chuongchun, hretu ringum, thiem- pu Uria le Jeberekia naupa Zekaria chu hrietpuitu dingin siem ka tih,” a ta.

³ Chun, zâwlneinu kuoma chun ka fe a, chuongchun, ama chun nau a vawn a, naupasal a nei ta a. Chuongchun, Lalpain ka kuomah, “A hmingah Maher-salal-has-baz sak rawh.

⁴ Naupang chun, ‘Nu, Pa,’ ti nachâng a hriet hma khawmin Damaska hausaknahai le Samaria inthawka râllâk sumhai chu Assuria lal hmaah an fe hmangpui ding a ni si a,” a ta.

⁵ Chun, Lalpa chun ka kuomah a hril nâwk a,

⁶ “Hieng chihai hin Siloa tui damtêa luong dêl dêlhai chu an dit naw lei le, Rezin le Remalia naupa chunga an lâwm leiin,

⁷ ngai ta, Lalpa chun Vadungpui tui, hrâttakhai le tamtakhai, (Assuria lal le a ropuina po po chu) an chungah inluongtir a tih; chuongchun, a kuong po po chu hung liem dûl dûlin, a pang po poa chun hung liem dûl dûl a tih;

⁸ chun, Juda ram chenin chîm tlum dum dum a ta, a liemin luong tlang dum dum a ta, rîng khawm chîm phâk hiel a tih; chun, a thla zar chun, Aw Immanuel, i ram khang tieng po po hi aw vawng a tih.

⁹ “Chi tinhai, buoi nuoi nuoi ta unla, kawinawiin in um ding a nih; ram hlataka mi po pohai, na sit unla, inrâlthuom ro; kawinâwiin in um ding a nih; inrâlthuom ro, kawinâwiin in um ding a nih.

¹⁰ Inrâwn khâwm ro, iengkhawm ni hliek naw ni; thu hril ro, puitling chuong bawk naw nih; Pathien ei kuomah a um si a,” tiin.

Lalpa chu in iṭi chu ni raw se

¹¹ Lalpa chun kut hrâttakin hieng ang hin ka kuomah a hril a, hi chihai lampuia hin ka fe ve nawna dingin a mi thunun a ni hi:

¹² “Hi chihai hin, ‘Phier an nei,’ an ti nazawng chu, ‘Phier an nei,’ ti ve naw ro; an ṭi khawm chu ṭi ve lovin, ṭi ve naw ro.

¹³ Sipaihai Lalpa, ama ngei chu in sukthieng ding a nih, ama chu in iṭi chu ni sienla, ama chu in iṭi chu ni raw se.

¹⁴ Chun, ama chu hmun inthieng nîng a ta. Israel sûng hnihai ta ding ruok chun tlûkna lung le dangna lungpui ni lem a tih. Jerusalema umhai ta ding chun châng le bil ni bawk a tih.

¹⁵ Chuongchun, mi tamtakin chu chu insuiin tlûng an ta, suknâwiin um an ta, âwk an ta, manin um an tih,” tiin.

¹⁶ Inhriettirna thu ziel hi khuop la, dân thu hi ka inchûktirhai lai namin inchik rawh.

¹⁷ Kei chun Jakob sûnghai laia a hmai thuptu Lalpa chu nghâk ka ta, ama chu thlîr zing ka tih.

¹⁸ Ngai ta, kei le Lalpa mi pêk naupanghai hi, Israelhai lai hin sipaihai Lalpa Zion tlânga um kuoma inthawka inchikna ding le thilmakhai ding dâm kan nih.

¹⁹ Chun, miin, “Khawhri aisân- thiem zâwl le, dawithiem thûm bul bul le chier hmur hmurhai chu râwn ro,” an ti pha cheu chun hieng ang hin dawn ro; “Mihaiin an Pathien chu an râwn ding a ni lem naw am a nih? Mi hring ta ding chun mithi an râwn ding am a nih?

²⁰ Dân thu le Inhriettirna Thu chu râwn lem ding a nih,” tiin. Chuong ang thu ang peia an hril naw chun an ta dingin khuo hrim hrim var dêr naw nih.

²¹ Lunginzîngtak le phîngṭâm pumin ram chu fang an ta, an phîng a ṭâm pha chun an lung chu sen êm êm a ta, an lal le an Pathien chu ṭawngsie inphur bawr bawr an ta, vân tieng dâk rak rak an tih;

²² chun, hnuoi tieng nghâng an ta, ngai ta, lunginzîngna le inthimna, thlaphâng ngûina chu nîng a tih; chuongchun, inthim sâmupa hnawt hmangin um an tih.