ISAI 7 - Pathien Lekhabu Inthieng (BSI)

Ahaz kuoma Isai thucha hmasa tak

¹ Uzzia nau Jotham naupa Ahaz inlal lai chun, Suria lal Rezin le Israel lal Remalia naupa Peka chu Jerusalem rûn dingin an hang fe a; nisienlakhawm, an hne thei naw a.

² Chun, David sûnghai chu, “Suria chu Ephraim leh an ṭhang hmunkhat tah,” tiin an hril a. Chuongchun, a lungril le a khuoletuihai lungril chu, ramhnuoi thinghai thliin a sukhnîng suou suou ang hin, sukhnîngin a hung um ta a.

³ Chuongchun, Lalpa chun Isai kuomah, “Nang le i naupa Sear-jasub chu, dîl sakhnung lem tuilâkna tâwpah, puon sâwptu phûl lamliena chun, Ahaz chu tuok dingin fe suok unla;

⁴ a kuomah, ‘Fimkhur la, um ṭawk ṭawk rawh, meiser bawng khu mei mei pahni, Suria le Rezin le Remalia naupa lunginsenna nasatak chu, ṭi naw la, i lungril chu inlau naw raw se.

⁵ Suria le Ephraim le Remalia naupa chun an phierrûk che a,

⁶ Juda chu hang thawin hang sukbuoi inla, chutaka chun ei ta dinga lûtna ding siemin, a lai takah Tabeel naupa chu lalah inṭhungtir ei tiu, tiin.

⁷ Chuleichun, Lalpa Pathien chun hieng ang hin a ti a: An thu phier chu puitling naw ni a, tluongtlung bawk naw nih.

⁸ Suria lu chu Damaska a na, Damaska lu chu Rezin ringawt hi a ni el si a; kum sâwmruk le kum nga bo hmain Ephraim chu chi ti tlâk lova um dingin suksiet vawngin um a tih;

⁹ chun, Ephraim lu chu Samari a na, Samari lu chu Remalia naupa ringawt el hi a ni si a. In ring det naw chun sukdetin um ṭhuoi naw ti niu, tiin,’ ti rawh,” a ta.

Immanuel chungchânga Isai thucha

¹⁰ Chun, Lalpa chun Ahaz chu a biek nâwk a,

¹¹ “Lalpa i Pathien kuomah inchikna hni rawh; inthûka manih, chungtieng insângtaka manih hni rawh,” a ta.

¹² Ahaz ruok chun, “Hni naw ning ah, Lalpa khawm infie bawk naw ning ah,” a ta.

¹³ Chun, ama chun, “Aw David sûnghai, tuhin lo ngai ta u, mihriem suksâwl hi thil chiretekah in ruot a ni maw? Ka Pathien chen khawm suksâwl in nuom rawp hi.

¹⁴ Chuleiin, Lalpa ngei chun inchikna pêng a ti cheu a, ngai ta u, nunghâk inthieng pakhat inrai a ta, naupasal nei a ta, a hmingah Immanuel sak a tih.

¹⁵ Ama chun thil ṭha naw tieng dit naw dân a hriet a, thil ṭha tieng dit nachâng a hriet pha chun nênetui kîng le khuoizu fa hlak a tih.

¹⁶ Naupang chu thil ṭha naw tieng dit naw nachâng le thil ṭha tieng dit nachâng a hriet hma khawmin lal pahni i theidahai ram chu rausanin um a tih.

¹⁷ Ephraim chun Juda a ṭhe nia inthawka la tlung ngailo nihai chu Lalpa chun i chunga le, i khuoletuihai chunga le, i pa sûnghai chunga chun intlungtir a tih; Assuria lal ngei chu,” a ta.

¹⁸ Chu nia chun Lalpa chu Aigupta vadung tâwp rêta tho um le, Assuria rama khuoi um chu ko dingin faifûk a tih.

¹⁹ Chuongchun, hung an ta, an rêngin vadung ruom se rek rukahai, lungpui pûka dâm, hlohlingnei po poa dâm, ran tlatna hmun po poahai fûng an tih.

²⁰ Chu nia chun Lalpain rêpvâw haw, Vadungpui khêl rama, Assuria lal um chu hmangin, lu le ke hmul chu mêt fai a ta, khâk hmul khawm mêt fai vawng a tih.

²¹ Chuongchun, chu nia chun mi pakhatin bâwngla pakhat le berâm pahni chau vâi a tih;

²² nisienlakhawm, nênetui tamtak an la pêk ding a ni leiin nênetui kîng fa hlak a tih; ram sûnga la umhai po chun nênetui kîng le khuoizu an la fâk seng ding a ni si a.

²³ Chun, chu nia chun hmun tin, grêp hrui sâng, tangka sâng man umna taphawt chu, buor le hlohlingnei hmun el hung ni tâng a tih.

²⁴ Ram po po chu buor le hlohlingnei hmun ruok a hung ni tâk leiin chutaka chun thal le thalngul chawiin fêng an tih.

²⁵ Chun, tlâng bâwngtuthlawa cho ta po poa chun, buor le hlohlingnei ṭi leiin hung naw ti ni a, bâwngchalhai intlâttirna le berâm ichîl el ding ni ta lem a tih.